Impakan Sturka 6 - DAWAN BÎLA AISKA

¹ Bara Dawan pana witin ra win: —Nanara man kaikma king fero wal yang dîa daukamna ba, yang bui witin ra taibi munrika ai tasbaya wina upliki nani ba swika taki wabia; bara kau ni, witin mita uplika nani ba kangbi sâkbia.

Dawan bui Moses ra kli winisa

² Dawan Gâd ba Moses kat aisi, win: —Yang sika DAWAN.

³ Ebraham ra, Aisak ra bara Jekob ra latan takri bara witin nani ra wîri, yang nini ba Gâd karnika sut pali bri ba, sakuna nini pali ‘DAWAN’ ba lika wiras kapri.

⁴ Baha purkara sin, witin nani wal lâ kum daukri, pramis munri Kenan tasbaya ba witin nani ra yabaia, baha tasbaya ra witin nani tringsar baku pat piua wiria lupia iwi kata ba.

⁵ Nanara Israel luhpia nani ba pât wahwisa, Idsip uplika nani mita taiban lâka ra wark daukaia yabi ba kaikisna, nanara kupi krawisa witin nani wal lâ aisi pramis daukri ba.

⁶ Bamna Israel luhpia nani ra wih wis yang, Dawan mita witin nani alba lâka ra ba wina pri sakaisna, Idsip uplika nani mita wark karna yan taki ba wina sin. Yang karniki ba mariki witin nani ba swaki sakamni, warkki karnakira lâ wapni daukisna lâka ba wal;

⁷ bara man nani ba yang upliki nani mai brimni, bara yang na man nani Gâdkam kamni. Baku mika man nani kaikma yang sika Dawan Gâdkam sna ba, Idsip uplika nani mita wark karna mai dingki kan ba wina pri mai sakri ba.

⁸ Ebraham ra, Aisak ra bara Jekob ra yaia pramis munri ba tasbaya ra mai brih wamna, bara tasbaya ba man nani dukiam maikamni. Yang sika Dawan.

⁹ Moses bui Israel luhpia nani ra naha bîla nani kli win, sakuna witin nani lika witin ai bîla walras kan, ban kra witin nani kupia kriwan alba lâka mununhtara wark karna pali taki kan ba mita.

¹⁰ Bara Dawan bui Moses ra win:

¹¹ —King fero ra wih wis Israel luhpia nani ba swika Idsip wina mahka taki wabia.

¹² Ban sakuna, Moses pana Dawan ra win: —Israel luhpia nani pali sin yang bîli walras sa; ¿bara nahki king fero lika yang bîli walbia, yang aisaia kat sin sip pain aisaras sna na?

¹³ Bara Dawan bui Moses bara Eran ra win: —Was, Israel luhpia nani ra, king fero ra sin wis, man nani adar karna brisma upla nani ba nanara pali mahka Idsip wina bri sakaia.

Moses bara Eran almukka nani nina

¹⁴ Naha nani sika Ruben, Israel luhpia tawahkia ba luhpia nani: Hanoc, Falú, Hesrón, bara Carmí. Naha nani na Ruben taika almuk nani kata. Baha nani sin ai damika nani watla bîla wihtka nani takan.

¹⁵ Simian luhpia nani ba: Jemuel, Jamín, Óhad, Jaquín, Sóhar bara Saúl, Saúl ba Kenan mairka kum luhpia kata. Naha nani sut na Simian masraka kumi wina takan.

¹⁶ Naha nani lika Libai masraka nani, almukka wina ban sirpika nani kat: Guersón, Quehat bara Merarí. Libai ai manka lika 137 mani tasba ra iwan.

¹⁷ Guersón luhpia nani lika, naha nani almukka wina ningka nani ba kat: Libní, bara Simí wal.

¹⁸ Quehat ba 133 mani tasba ra iwan, witin luhpia nani ba naha nani: Amram, Ishar, Hebrón bara Uziel.

¹⁹ Merarí luhpia nani ba: Mahli bara Musí wal. Naha nani ba sika Libai masraka nani, ai kiamka sakan ba kulkanka ba kat.

²⁰ Amram lika ai antika Jocabed wal ai maya takan, witin sika Moses bara Eran wal yaptika ba. Amram lika 137 tasba ra ai rayaka brin.

²¹ Ishar luhpia nani nina lika: Coré, Néfeg bara Zicrí.

²² Uziel luhpia nani lika: Misael, Elsafán bara Sitrí.

²³ Eran lika Aminadab luhpia mairin Elisabet wal marit takan, baha sin Nahasón lakrika mairin kata, wal ai luhpia nani baikan ba: Nadab, Abihú, Eleazar bara Itamar.

²⁴ Coré luhpia nani lika Asir, Elcaná bara Abiasaf. Naha nani lika Coré masraka nani ba.

²⁵ Eran luhpia nani kumika Eleazar, witin lika Futiel luhpia mairin nani kum wal ai maya takan bara Finees baikan. Baha nani ba Libait nani watla bîla wihtka nani kata, ai taya nani tilara.

²⁶ Naha Eran bara Moses wal ra sika Dawan mita wisata ba Israel luhpia nani ba Idsip wina brih sakaia, war aiklaklabra daknika tara kum baku asla dauki.

²⁷ Naha Moses bara Eran wal sika king fero Idsip kingka ra wih aisi kata ba, Israel luhpia nani ba baha tasbaya wina brih sakaia dukiara.

Dawan bui Moses bara Eran paiwan ba

²⁸ Dawan bui Idsip ra Moses wal aisata yua ba,

²⁹ witin ra win: —Yang sika Dawan. Bara king fero Idsip kingka ra wis, diara sut yang bui man ra mai wisna na.

³⁰ Sakuna Moses pana aisin: —Dawan, yang bîli skalwi aisisna na, ¿bara nahki king fero yang bîli walbia?