Impakan Sturka 40 - DAWAN BÎLA AISKA

Sunukira takaia watla sunu daukan ba

¹ Dawan ba Moses ra aisi, naku win:

² “Kati pas yua pas aimakan ra, tint watla, Dawan wal aisaia tintka watla mâkan ba, yus munaia pura sunbia.

³ Bahara lâ auhbaia watla ba bri si swibia bara pura prakaia kwalka ni pura prakma.

⁴ Tibil ba sin bahara bri si swibia bara kiandil bapi angkaika ba sin, diara nani sut baha purara kahbia bara lampka nani ba sin kahbi swibia.

⁵ Diara kîa pain angkaia altarka gul ni daukan ba, lâ nani auhban watla ba mawan tani ra swima, bara pamaia kwalka ba pams, upla nani ba balbia holi pliska ra asla takaia.

⁶ Baha ningkara daiwan aiska angkaia altarka ba, holi pliska mawanra bri si swima, Dawan wal aisaia pliska ra.

⁷ Baha ningkara Dawan wal aisaia pliska ba ra, altar ba wal lilara swima, lî banhki.

⁸ Bara utla kutbanka tnaya kir pamaia kwalka ba, utla kutbanka dimaika ra pams.

⁹ “Bara lal ra laikaia batanka ba bris, holi pliska ra diara wala bâra ba sut ra laikma. Bara wark daukaia dukia nani sut ba sunu daukma, bara holi sakaia pliska kum sunu kabia.

¹⁰ Bara baku, daiwan aiska altarka ba, wark daukaia dukia nani sut bâra ba, batana ni laikma. Bara baku altar ba sunu daukma, altar kum sunu kabia.

¹¹ Baku sin lî watla ba ra sin batana laikma, bara baha sin sunu sâkma.

¹² “Bara Eran ai luhpia nani ba sin, tint watla ra dimaia durka ra brih wabia, bara aihtabi takbia,

¹³ bara Eran prâka ba yas dimbia. Bara batana ai purara laiki aihka sunu sâkma, yang naipakan kaia.

¹⁴ Baha ningkara luhpia nani ba sin yas witin lamara wabia, bara prâka nani ba yas dimbia.

¹⁵ Bara baha nani ra sin batana laikma, aisika purara laikram ba baku, bara witin nani ba yang naipakan nani kabia, batana laikaia tânka sika, yang prîski ban kaia bara ai kiamka nani sut ra sin.”

¹⁶ Bamna Dawan bui Moses ra dîa win ba kat daukan.

¹⁷ Baku witin nani Idsip wina takan ba wina mani wâl alkan, bara kati pas, yua pas, aimakan ba ra tint watla ba buki mâkaia warkka ba bukan.

¹⁸ Moses mita tint watla ba bukan munhta karnika playka ba mangkan, tatka nani sin mangkan, prihni mangkaia dusa nani mangkan, playka nani ba buki bapan,

¹⁹ bara tint watla bahna prakaika kwalka nani ba sin mangkan, baha pura bâk kli pura prakaika wala mangkan, Dawan bui Moses ra nahki daukaia win ba baku daukan.

²⁰ Baha ningkara, lâ nani ulban walpaya wâl ba Moses brin, bara lâ watla ra mangkan; baha ningkara lâ auhbaia watla buki twilkaika dusa nani ba tnaya untika ra dingkan bara pura prakaika ba sin prakan.

²¹ Bara holi pliska, tint watla lila ba kat bri si swin. Bara pamaia kwalka ba paman bara lâ auhban watla ba yukukan, Dawan mita Moses ra nahki daukaia win ba baku daukan.

²² Baha wina tint watla bilara tibil ba brih wan, kwala yahbra tani ra paman ba kwalka ba lata tani ra swin.

²³ Baha purara brit nani kahban, ai watlika kat. Dawan mawanra, Dawan mita Moses ra dîa daukaia win ba kat daukan.

²⁴ Kiandil angkaia dusa ba sin tint watla ra brih wan tibil ba lama kat, kwala paman ba waupasa tani ra.

²⁵ Bara lamp nani ba angki, Dawan lamara swin. Dawan mita Moses ra nahki daukbia win ba baku daukan.

²⁶ Altar gul ni paskan ba sin tint watla ra brih wan kwala paman ba lama kat.

²⁷ Bara baha purara kîa yamni ba angkan, Dawan bui Moses ra nahki daukaia win ba baku.

²⁸ Ba ningkara pamaia kwalka nani ba sin Moses brin bara dur nani ra paman.

²⁹ Ba ningkara daiwan aiska angkaia altarka ba sin pliska ra bri si swin, tint watlika durka ba kat. Baha purara daiwan aiska angkan, diara diaia prisantka sin Moses ra nahki daukaia win ba baku daukan.

³⁰ Bara lî laikaika bisinka ba sin tint watla ra altar utla ra dimaia ra ba wal lilapas kat, lî banhki swin.

³¹ Moses bara Eran wal baha wina lî brih ai mihta ai mina nani sikbi kan,

³² witin nani tint watla ra dimaia altar ra buaia auya ba ra, witin nani ai mita ai mina nani sikban. Dawan bui Moses ra nahki daukaia win ba baku daukan.

³³ Bara baku Moses tint watla ba, holi pliska ba, altar nani ba, sut pliska kat mangkan. Bara kwala nani ba dimaika kat paman, bara baku wark ba sut daukan.

Dawan tukinka kasbrika ba tint watla ra balan

³⁴ Utla ba sut mâkan ba ra, tint watla ba kasbrika kumi bal Dawan prana ni madiskan, bara tint watla ba Dawan prana ni banhkan kan.

³⁵ Bara Moses watla ba ra sip dimras kan, kasbrika ba baha purara bâra ba mita, bara Dawan prana sin banhkan kan ba mita.

³⁶ Kasbrika ba kli utla ba pura wina purara ulan ba ra, Israel luhpia nani ai kiampka ba buki, ai yabalka ra impaki kata.

³⁷ Sakuna kasbrika ba purara ulras kan kaka, witin nani sin impakras kan, ani yua kasbrika ba impakuya ba kat.

³⁸ Israel luhpia nani yabal ra impaki kan ba piua sut ra, witin nani kaiki kan, Dawan kasbrikika ba kakna ra tint watla ba purara kan, tihmia ra pauta klauhi playka taki kan.