Impakan Sturka 35 - DAWAN BÎLA AISKA

Ris yua lâka ba

¹ Moses bui Israel luhpia nani sut paiwan, bara naku win: “Naha lâka nani na Dawan wina aikan sa yawan nani daukaia.

² Yu matlalkahbi man nani warkkam takma, sakuna yua 7 ba, aihka yua kum man nani kulki kaia sma, Dawan ra baman kulkanka ba yabaia yua. Ya baha yua ra wark takbia kaka, prubia.

³ Sabat ra, ani anira iwi kama sin, utla kumi ra sin pauta mukan kabia apia sa.”

Dawan watla prisantka nani ba

⁴ Moses ba Israel luhpia nani ra sturi aisi, naku win: “Naha lâka nani sika Dawan mangki wankan ba, yawan nani daukaia.

⁵ Man nani tilamra Dawan ra yabaia prisant kum dauks, ya baha yabaia luki ba ai kupia aiska ni brih balbia; gul, silbar, bras,

⁶ kwala blu, paura, pauni pali, linin kwalka, guts tâwa nani,

⁷ sîp wainhka taya pauni daukan ba, daiwan taya yamnikira pitban ba, akasia dusa,

⁸ batana laya lamp ra laiki ba, isint kîa painkira, lal ra laikaia batanka kîa yamni angkaia dukiara, dus mâka kîa pain ba,

⁹ karnilian nani bara walpa manakira nani ba, prîs prâka lama prakaika, purara praki ba pîska nani ra prakaia walpaya nani sut sin bri sal yaban kabia.

Tint watla ra diara watlika nani ba

¹⁰ “Dawan adar win ba baku, diara paskaia sip uplika nani sut sin balaia sa bara naha dukia sut daukaia:

¹¹ Dawan sunukira watla, ai tintka watla ba, pura bikaika ba, kwala pamaia pînka ba, tat nani ba, playka nani ba, mununhta karnika nani ba,

¹² Lâ auhbaia watla ba dusa nani ba sin, pura prakaika nani ba, kwala nani pura prakaika ba,

¹³ tibil bara ai dusa nani ba, wark daukaia dukia nani ba bara Dawan dukia brit kahbi swin ba,

¹⁴ kiandil bapaika watlika ba ingni yabaia dukiara wark daukaia dukia nani ba, lamp nani ba sin,

¹⁵ kîa yamni angkaia watlika ba, dusa nani ba, lal ra laikaia batanka, awas mâka sâtka kîa painkira ba, dur kwalka Dawan aisaia watla ra dimaia durka ra ba,

¹⁶ daiwan aiska angkaia altarka ba, bras ni yamhpus yakawaika nani daukan ba, alki twilkaia dusa nani ba diara watla nani sin mina buaika ba,

¹⁷ utla kutbanka lata tani pamaika kwalka nani ba bara playka bapanka nani ba mununhta karnika nani ba, lata wina utla kutbanka ra dimaia durka pamaia kwalka nani sin,

¹⁸ tint watla bapaia dusa kusban nani ba bara wilkaika kiwka nani ba,

¹⁹ tint watla ra wark dukaia kwalka pitban nani, Eran prâka sin daukan ba bara Eran lupia nani kwalka sunukira nani ba sut ba brih balbia.”

Upla nani ai prisantka nani bri balan

²⁰ Bara Israel luhpia nani sut Moses mawan wina mahka wan,

²¹ baha ningkara upla bara baha prisantka bri balaia lukan ba, ai kupia param ni Dawan ra diara brih balan, baha dukia nani ba ni tint watla ba paskaia bara dîa diara wala nani sin daukaia kan kaka sin, bara kwala nani ba ni daukan.

²² Waitna bara mairin nani aidrubi balan, witin nani sut ai kupia param ni bri balan, wilkaia dukia nani, mihtadingka nani, bangkil nani, kiama lula nani, gul ni paskan ba dukia sât nani. Upla bani gul dukia nani sât Dawan ra yaia brih balan.

²³ Kwala blu nani, paura, balianta sâtka, pauni pali sâtka, linin kwalka painkira sâtka, guts tâwa nani, guts wainhka taya pauni ba, taya painkira pali ba, bahmuna dukia nani ba bri balan.

²⁴ Baha nani silbar, bras nani bri kan ba bri balan Dawan ra yabaia; bara wala nani akasia dusa tatka nani sâtka bri kan ba brih balan, baha dusa nani wal dîa paskaia kan ba paskaia.

²⁵ Mairin nani sin ai mihta ni diara nani mamaia bara pitbaia sip kan ba kwalka blu, balianta, kwala paura, linin pain ba bri balan;

²⁶ bara mairin nani âuya mâira nani ba, ai mihta ni guts tâwa pitban dukia nani sâtka brih balan.

²⁷ Wihta nani ba karnilian walpaya brih balan, wala nani walpa manakira gul baku sâtka nani ba brih balan prîs tara prâka ra bara lama prakaika pîska nani bara prakaia,

²⁸ isint kîa pain nani, lamp laya batana laya yaia dukiara, lal ra laikaia batanka kîa yamni bara angki daukaia batanka laya.

²⁹ Israel waitnika bara mairka nani sut aitani lukan Dawan ra diara yabaia Moses ra win baku. Witin nani ai kupia param ni ai dukia wina mana luha Dawan ra brih balan.

Tint watla ra diara papaskra nani ba

³⁰ Bara Moses bui Israel luhpia nani ra win: “Man nani kaiks, Juda kiamka ba wina Dawan mita bâk sakan Besalel Urí luhpia bara Hur mulika ba.

³¹ Witin ba Dawan Spiritka ni banhkan sa, sins lâka, diara tânka kaikaia lâka nani bara ai mihta warkka sâtka sut daukaia tânka ba yan sa,

³² witin diara paskaia lilka ba daukbia gul ni, silbar ni bras ni sin daukaia,

³³ walpa nani ba karbi daukaia dukiara, dus nani ni diara paskaia bara wark sâtka wala nani daukaia lilka nani sut daukaia.

³⁴ Bara upla wala ra smalkaia sinska sin yan. Oholiab ra, Ahisamac luhpia ba, Dan kiamka wina ba,

³⁵ witin nani ra diara karbi lilka nani daukaia sinska lâka ba yan kata, bara kwala mamaia sinska sin, kwala paura kwala balianta, kwala pauni pali, bara linin kwalka sin, bara diara wala nani ai mihta ni mamaia warkka sâtka nani daukaia sinska sin yaban.