Impakan Sturka 33 - DAWAN BÎLA AISKA

Dawan adar yaban witin nani ban ai kanra impakbia

¹ Bara Dawan mita Moses ra win: —Man mahka impaks, naha wina taki was upla nani Idsip wina sakram ba aikuki. Man nani was baha tasbaya ra yang Ebraham, Aisak bara Jekob ra yaia wîri ba, yang baha tasbaya ba man kiamkam nani ra yabamna.

² Bara man nani kainamra insal kum blikamna tâm bri waia. Bara kuntrika ba wina, Kenan uplika nani ba, amorreo nani, hitita nani, ferezeo nani, heveo nani bara Jebús uplika nani ba sut kangbi sakamna.

³ Baha tasbaya ra tialka laya nasma wal lî laiwi ba ra man nani was. Ban sakuna, yang lika man nani tilamra wamna apia, kan man nani ba warkki daukaia ra kiamam karna ba mita, ban kra yabal ra âpu pali mai daukamna.

⁴ Baha aisin ba upla nani walan ba ra witin nani sari takan, upla kumi sin gul dukia bri kan ba yus munras.

⁵ Bara Dawan mita Moses ra win: —Israel luhpia nani ra wis: ‘Man nani lika upla kiama karnira pali sma. Ban kra yang na man nani wal wamna kaka, âpu pali mai daukamna. Bamna gul dukia nani wînam ra brisma ba sut sâks, bara yang kaikamna dîa man ra daukaia sna ba.

⁶ Bara baku, Israel luhpia nani Horeb ilka ra kan nani ba, gul dukia nani pami bri kan ba sut saki swin.

Dawan wal aisaia tintka watla ba

⁷ Bamna Moses kiamp ba wina tint watla ba saki, lata tani ra bri si swin, bara nina ba mâkan Dawan wal aisaia tintka watla. Bamna ya Dawan wal aisaia brin dauki ba, baha tintka watla ra waia kan, kiamp lata tani ra.

⁸ Bamna ani piua Moses baha watla ra auya taim, upla sut ba ai watla durka wina kaiki kan Moses ba tint watla ra dimuya ba kat.

⁹ Dawan wal aisaia watla ra Moses wih dimuya ba ra, kasbrika playka ba mâyara bal iwi, utla ra dimaika ba kat takaski kan, Dawan ba Moses wal aisi kan piua ra.

¹⁰ Bamna upla nani sut mita kaiki kan kasbrika playka ba, baha watla dimaika kat bal takaski ba. Bara witin nani sut baha dimaika ba kat ai lula kriwi mayuni kan.

¹¹ Bara Dawan lika Moses wal ai mawan kat kaiki baku, sim upla kum ai pânika wal prawi aisi ba baku aisin kan, bara ningkara Moses kli upla nani ra bali kan. Sakuna ai hilpika wahma Jasua, Nun luhpia ba lika, Dawan wal aisaia watla ba wina takras kata.

Dawan ai prana ba Moses ra marikan

¹² Moses mita Dawan ra win: —Kaiks, man ai wisma yang naha uplika nani na tâ brimna; sakuna ai wiras sma ya yang wal blikaisma sapa. Bara man sin ai wisma yang ra kasak ai kakaira pali sma, baku sin namkra ra yamni ai kaikisma.

¹³ Bara yang ra yamni ai kaikisma kaka, yang mamkabisna warkkam daukaia tânka brisma ba mairiks. Baku mika, yang bui man ra kasak lukamna, bara daira walamna man bui yang ra kasak lukisma ba. Bamna luki bas naha uplika nani na, man uplikam nani sa.

¹⁴ Dawan pana witin ra win: —Man wal yang wamna ba ra, maikrika ris brima.

¹⁵ Sakuna Moses mita pana win: —Man pali ba yang nani wal waras sma kaka, naha wina wan sâkpara.

¹⁶ Kan man ba yang nani wal waras sma kaka, ¿nahki yang bara uplikam nani sin tânka bribia, man bui yang nani ra yamni lukisma sapa? Baku natka ra baman yawan wan tânka briaia, nisan wala nani tila wina aihka wan sakram ba.

¹⁷ Bara Dawan mita Moses ra win: —Man dîa ai wiram ba daukamna, yang sin kakaira pali sna bamna.

¹⁸ Moses bui Dawan ra win: —¡Man pramna ba aik kaikamna!

¹⁹ Sakuna Dawan pana tawi win: —Kaiki bas yang yamniki nani sut ba man mamwanku yarka bal lubia. Bara yang nina mâki sin winamni man mawan kat. Yaura umpira kaikisna ba, yang mita umpira kaikamna; yaura kupi swapni lâka brisna ba, yang bui witin ra kupi swapni brimni.

²⁰ Sakuna param mai wisna, yang maiwan sip kaikma apia. Kan upla kum yang ai kaikbia ba, sip raya ban kabia apia.

²¹ Dawan kau ban aisi, win: —Kaiks, yang laimara plis kum bâra sa, bara man baha walpaya ba purara bus.

²² Yang praina ba bal lui wabia ba ra, yang mita man ba walpa untika kum ra mai mangkamna. Bara yang mihti ni puram prakamna, baha sut lui wabia ba kat.

²³ Baha ningkara mihti ba sakamna, bara man nini wina ai kaikma. Ban sakuna, maiwan pali lika sip kaikma apia.