Impakan Sturka 31 - DAWAN BÎLA AISKA

Sunukira pliska dukiara upla ai mihta ni paski dauki ba

¹ Dawan ba Moses ra aisi, naku win:

² “Kaiks, Juda kiamka ba tila wina, Besalel Urí luhpia bara Hur mulika ba, bâk sakri sa,

³ Dawan spiritka ni banhkri sa, sins lâka ni diara tânka briaia ba sin, diara daukaia tânka kakaira âuya mâira,

⁴ diara paskaia, lilka nani daukaia, gul ni diara nani sâtka daukaia, silbar ni bara bras ni sin,

⁵ bara walpa manakira nani ba karbi diara daukaia, dus nani sin karbaia, bara dîa wala warkka nani kabia ba sut baku daukaia.

⁶ Oholiab, Ahisamac luhpia, Dan kiamka wina ba bâk sakri sa, witin ra hilp munaia. Wala nani sin sins tânka bri nani ba ra sin yâri sa, dîa daukaia mai wîri ba sut witin nani daukbia:

⁷ Tint watla ra, lâ daukan lâka auhbaia watla ba, pura bikaika ba, utla bilara wark daukaia dukia nani ba,

⁸ tibil ba, wark daukaia dukia nani ba, kiandil bapaika nani gul ni daukaia, diara wala nani sin yus muni ba, kîa pain angkaia altarka ba sut paskbia,

⁹ daiwan aiska angkaia altarka ba, diara nani bahara yus muni ba sin paskbia, bisin ba, mina buaika nani ba sin paskbia,

¹⁰ kwala nani mambia, prîs nani prâka sipbia, Eran prâka bara luhpia nani prâka sin sipbia, baha prâka dimi wark taki kaia.

¹¹ Lal ra laiki sunu daukaia batanka pliska ba, dus mâka kîa pain angkaia pliska, baha sut witin nani paskan kabia dîa yang mai wîri ba kat.”

Sabat ba

¹² Dawan ba Moses ra aisi, naku win:

¹³ “Man, Israel luhpia nani wal aisi, naku wis: ‘Man nani kasak pali yang riski briaia yua nani ba kulkaia sma; kan baha ba lika yawan wan tukinka kum sa, kiamkam nani sut ban kulki kaia. Witin nani tânka bribia, yang mita man nani ba bâk mai saki mai briri ba.

¹⁴ Man nani lika sabat ba bâk saki bri kulkaia sma, bamna kulkanka yabaia sma. Ya baha yua ba kulkras kabia kaka, prubia. Baha purkara, ani uplika baha yua ra wark daukbia kaka, upla nani tila wina saki lulkan kabia.

¹⁵ Yu matlalkahbi ba wark daukaia yua nani sa, sakuna yu 7 aimaki yua ba ris yua sa, Dawan mita ai yua kulkan ba. Bamna ani uplika baha yua wark daukbia kaka, pruaia pâtka ra lakan kabia.’

¹⁶ Bahamna Israel luhpia nani ba sabat ba kulkaia lan takaia dukiara, baha yua ba wark takaia apia sa, kan wal lâ daukan lâka ba ban kaia tukinka ba mita.

¹⁷ Baha ba ban kaia ra tukinka kum, Israel luhpia nani yang wal lâ daukri tukinka kabia.” Kan Dawan ba kasbrika pura bara tasba na wal paskan yu matlalkahbi ra, sakuna yu 7 aimakan ba ra wark dauki kan ba takaski, ris brin.

Gul ni daukan bîpka lupia ba

¹⁸ Dawan ba Sainai ilka ra Moses wal aisi swin ba ra, Dawan bui witin ai mihta tâ ni baha lâka nani ulban walpaya tanhta wâl ba, Moses ra yan.