Impakan Sturka 28 - DAWAN BÎLA AISKA

Prîs nani prâka ba

¹ “Muihkam Eran paiws lamamra balaia. Ai luhpia waitna nani ba sin witin nani ba Israel luhpia nani tila wina, yang prîski nani kabia. Eran luhpia nani ba Nadab, Abihú, Eleazar bara Itamar.

² Bara man muihkam Eran prâka nani daukma, prâka ba sin pranakira kabia.

³ Diara daukaia sip uplika nani ba wal man aisas, witin nani ba diara sât sât pain paskaia sinska yabri sa, witin nani Eran prâka nani ba sipaia wis, bara baku witin ba yamni munbia yang prîski baku.

⁴ Prâka nani sipaia ba sika naha: lama prakaika ba, ‘‘efod’’ ba, purak dimaia prâka ba, prâka tara wala mamaia ba, linin ni sipaia lal ra wilkaika ba, bara maisa wila sin.

⁵ Baha prâka sipaia uplika nani ba, naha dukia nani na bri kabia: gul, kwala mapla blu, balianta, paura, bara linin pitban ba sin.

⁶ “Lama prakaika ba gul ni daukan kabia, mapla blu, balianta, pauni, linin ai mihta ni pitban ba,

⁷ bara prâk pahpaya ra prakaika pîska wâl sipi prakbia.

⁸ Lama prakaika ba purara, maisa wila ba wilkaia dukiara, baha sin praki pîs kumi baku daukbia. Bara baha sin gul ni, mapla blu, balianta pauni pali, lininka ba ai mihta ni pitbi daukbia.

⁹ “Bara walpa sangni ba wâl bris, bara bahara Israel luhpia 12 nani nina ba uls.

¹⁰ Walpa sangni kumi ra nina matlalkahbi ulbia, walpa sangni wala bara nina wala matlalkahbi ulbia, baha nani aisubi takan ba tânka kat.

¹¹ Nina nani walpa ra ulbaia ba, gul ni ulbaia sa. Bara diara papaskra kum ra yas, sîl ra ulbi ba baku ulbia. Baha ningkara, pahpaya ra kahbi swiaia kwalka paskma; baha sin gul ni daukma, ningkara lama prakaika awa ba ra wilkma.

¹² Baha walpaya wâl ba, Eran lama prakaika pahpaya purara kabia, Israel luhpia nani nina ba. Baku Eran, Dawan mawanra baha nani nina ba brih wabia, bara Dawan baha nani ra ai kupia krauki kabia.

¹³ Bamna pahpaya ra sunaika ba sin gul ni paskbia;

¹⁴ gul ni pitbi awa wâl dauki, un nani ba kir wilki prana dauks.

¹⁵ “Lama prakaia, lâ daukan dukia nani ra prakan pîska ba sin, lama prakaika aiska, nahki paskan ba baku natka ra paskma, gul ni, mapla blu, balianta, pauni pali, sut ba linin ni pitban kabia.

¹⁶ Baha yahpika ba, yarika ba wal kumi kabia. Bara wâl ba, pîs kumi ra prakan kabia, yarika ba 9 ins, bîla yahpika ba sin 9 ins.

¹⁷ Bara baha purara walpa manakira nani sâtka 12 prakma. Tnaya walhwal kat prakaia: rubi, krisulait, esmeralt;

¹⁸ kli wala yumhpa: esmeralt, sapair, daimans;

¹⁹ kli wala yumhpa: jasint, agat, amatist;

²⁰ kli walhwalka: beril, kalsiduni, jasper. Walpaya nani 12 ba lama prakaika aiska ba lila kat, gul ni lalaubi bahara praki swis.

²¹ Walpaya nani ba 12 kaia sa, Israel luhpia nani nina kulkanka ba kat. Walpaya kumi bani ra nina ba sîl ra ulbi ba baku ulban kabia, baha 12 nina ba.

²² “Lama prakaika ra wilkaia awa nani gul ni pain pitbi daukbia.

²³ Lama prakaika ra praki wilkaika untika nani wal tâ wâl ra daukma, lama tnaya sait wâl ra wilkma.

²⁴ Bara baha wilkaia kiwka wâl pitbi daukbia ba, lama bîla prakaika ba wal tâ prakbia,

²⁵ bara tâ wala wâl ba, baha lama bîla prakaika pahpaya ra wilkaika ba tâura wilkbia.

²⁶ Bara kli gul ni, lama bîla prakaika tâ wala mâyara, wilkaia untika wâl dauks. Baha purara prakan pîska ba wal praki wilkaia.

²⁷ Bara nanara kli kau gul ni unta wala wâl dauks, baha lama bîla prakaika ba purara prakan pîska ba wal, bîla tani ra praki maisa lama kat wilkaia.

²⁸ Baha pîska wâl ba, unta nani daukan bâk wilkaia kiwka ba mapla blu kabia, bara wal praki wilkan kabia ba kauhbia apia dukiara.

²⁹ Bamna baku, Eran Dawan watla holi pliska ra wih dimbia. Bara ai lama prakan ba purara, lâ dauki dukia nani ba ra, Israel luhpia nani nina ba sin bri kabia Dawan mawanra, baku Dawan bui witin nani ra luki ba ban kabia.

³⁰ Bara ai lama purara, lâ dauki dukia Urim bara Tumim wi ba, baha sin bri kabia; baha nani ba Eran ai kupia purara bri kabia, witin Dawan mawanra wih bubia ba ra. Bara sin Eran piua bani ra ai kupia purara, baha Dawan lâ daukaika dukia nani ba ban bri kabia.

³¹ “Lama prakaika munhtara dimi pîska ba kwalka, mapla ba blu dauks,

³² ai lal dingkaia untika ba lila kat swis. Bara klakanka un ba, kir pitban kiwka ba ni, mami swis kalwaia apia, prâk nana un karnika sipi ba baku.

³³ Baha prâka un ba sakahkaia sa, dus mâ nani sâtka kwala blu kwala balianta kwala pauni pali ni daukan ba wal, bil lupia nani daukan ba ni sin;

³⁴ baha wibia kaka naku daukaia sa: gul ni daukan bilkka kum wilkaia, baha wina dus mâ kwala ni daukan ba kum wilkaia. Bara kli gul ni daukan bilkka kum wilki, baku sin kwala ni dus mâ daukan ba sin kum kli wilkaia, baku ban prâka un kir ba sakahkaia.

³⁵ Naha munhtara dimaia pîska na sin, Eran prîs baku, witin wark daukaia auya ba ra dimi kaia sa, Dawan mawanra. Holi pliska ra dimbia ba ra, kli bal takbia ra sin, baha bilkka nani lingbi ba wali kabia, bara baku witin prubia apia.

³⁶ “Gul ba pruki tanta dauki bara sîl ra ulbi ba baku naha bîla na bahara uls: ‘Dawan ra yaban’.

³⁷ Bara baha ulbanka wilkaika mapla ba blu daukma, bara ulbanka ba lal ra wilkaika pîska ba ra wilki swis.

³⁸ Bara baku Eran lal wilkaika ra ulbanka ba bâra ban kabia, bara Israel luhpia nani Dawan ra diara yabaia lâka ra pirwi ba, baha wirhika ba Eran twilki kabia. Witin nani ai prisantka brih aula ba ra, baha ulbanka ba mita Dawan baha prisantka ban bribia.

³⁹ “Bara prâka pîska wala kum, linin kwalka pain mami baha ni daukma, ai lal ra bapaika sin kum linin mapla pranakira daukma. Maisa wila ba sin maman painkira daukma.

⁴⁰ Eran luhpia waitna nani ra sin prâka pîska nani dauki yas, pahpaya purak wilkaika, maisa wila sin, sut pranakira kabia.

⁴¹ “Baha sât prâka man muihkam Eran ra, luhpia waitna nani ra dimaia yabaia sma. Bara baha ningkara witin nani lal ra batana laikma, tânka ba witin nani ba yang prîski aimaki kaia karnika yabisma upla sut mawanra.

⁴² Bara linin kwalka ni witin nani draska sin sipi yas, ai maisa wina lula kat biki kabia,

⁴³ Eran bara ai luhpia nani ba sin dras dimi tint watla kutbanka ra, apia kaka Holi Pliska ra sin dimbia, altar lamara waia kaka sin baha dimi wabia, witin nani prîs warkka dauki ba piua ra, ai swira ba yukukras dimi pruaia apia ba tâwan. Naha lâka na witin kulki ban kaia, ai kiamka nani sin kulki ban kabia, naha lâka na ban kabia ai kiamka nani kat.