Impakan Sturka 26 - DAWAN BÎLA AISKA

Dawan wal aisaia tintka watla

¹ “Utla ba mâkma bara durka kwalka ba, linin kwalka matawalsip pitban kabia, mapla blu, balianta bara pauni, baku sin insal wâl lilka ba bahara pain maman kabia.

² Durka kwalka sut ba, yahpika kumi baman bri kabia: yarika ba 14 yar, bîla yahpika ba yar wâl.

³ Kwalka matsip ba tnaya praki sipaia sa, bara matsip wala nani ba sin tnaya praki sipaia sa, bara matsip wala nani ba sin tnaya praki sipaia sa.

⁴ Durka kwalka kum ba un nani ra, unta dauks, baku sin dur kwalka wala matsip praki kumi daukan nani ba sin baku daukbia.

⁵ Bara kwalka pas ba un ra 50 unta nani daukbia, bara sin baku kwalka wala nani ba sin daukbia, Bara unta wilkaika bani ba, ai mawan kat kaia sa.

⁶ Bara baha kwalka nani ba wal praki alkaia dukiara, untika nani ra dingki alkaika dukia gul ni 50 alkaika nani dauks, ningkara utla kumi dauks takbia.

⁷ “Guts tâwa ni kwala tara nani 11 paskma, baha ba utla pura prakaia dukiara kabia.

⁸ Baha kwalka kumi bani ba yahpika bri kabia: yarika ba lika 15 yar, bîla yahpika ba yar wâl.

⁹ Bara kwalka matsip ba asla praki tara kumi sipma, bara wala matlalkahbi ba sin asla praki tara kumi sipma, bara kwala matlalkahbi praki sipan tâ ba wal utla ba pura prakma.

¹⁰ Bara kwalka nani ba un ra 50 unta nani daukma, baha kwala matsip ba asla prakaia, bara kli 50 unta wala nani daukma, baha kwala wala nani ba un ra sin.

¹¹ Baku sin, baha untika nani ra dingki alkaika dukia nani 50 bras ni daukma. Bara kwala tara ba wal praki, pura prakaika tara kumi daukma.

¹² Bara nanara pura prakaika kwalka ba kau yari takan ba mita, tâ ba wal utla ba prakma.

¹³ Baku sin, tnaya wâl ra bîla yahpika wina kau luan tâka nani ba wal, tnaya yumhpa pîska ba prakma.

¹⁴ “Baku kli utla ba dukiara, sîp wainhka taya pauni dauki, baha ni kwala tara wal paskma, bara taya ba ra kli wala kau pain kum paskma, baha purara prakaia.

¹⁵ “Bara akasia dusa tatka nani bris, baha tatka ba ni watla ba kutbi mâkaia dukiara, bara tatka nani ba wapni kaia sa.

¹⁶ Tatka kumi bani yarika ba 15 pît bri kaia sa, bîla yahpika ba lika 27 ins.

¹⁷ Tatka kumi bani, un wâlsut ba, pana pana alkaia napa nani daukaia sa, tat wala ba wal pain prawaia dukiara. Utla mâkaia tatka nani ba sut baku daukma.

¹⁸ Tatka un nani ba daukma ba ra, tat 20 ba waupasa tani tnaya ba prakaia dauks,

¹⁹ bara silbar ni playka nani 40 paskma, tat tâ nani ba mununhtara dingkma, tat un wâl ba praki alkaia dukiara, tat bani ba mununhtara playa wâl.

²⁰ “Bara kli 20 tat wala nani un ba dauks, utla tnaya yahbra tani ba paskaia dukiara.

²¹ Baha sin silbar ni playa nani 40 paskma, bara tat bani ba mununhtara playa wâl kaia sa, bara playa wala wâl ba lika tat wala mununhtara kabia.

²² Watla tnaya muna tani ba mâkaia dukiara, tat matlalkahbi un ba dauks,

²³ bara watla banhta pîska unyukwika mangkaia tatka sin wâl dauks.

²⁴ Naha tatka ba wâl wina kumi ra prakaia sa, bara tâ ba pura wina mâya kat alkaia. Sim baku daukaia sa unyukwika wâl ra tat wâl ba untika ba kat praki alkaia.

²⁵ Baku bamna, tat ba asla 8 kaia sa bara silbar ni paskan playka nani sin 16 kaia sa. Tat tâ nani ba dingki alkaia untika nani sin, tat bani munhtara playa wâl kabia.

²⁶ “Akasia dusa ni dus yari matsip dauks utla tnaya kum tatka nani ba alkaia,

²⁷ bara dusa wala matsip ba lika utla tnaya wala ba alkaia dukiara, bara dusa kau matsip ba lika, utla tnaya muna tani ba tatka alkaia dusa.

²⁸ Baha lila kat mangkaia dusa ba lika purara bukaia, tat ba lila kat tâ kumi wina tâ wala ba kat sabaia.

²⁹ Bara tatka nani taya ba gul ni lalaubaia, bara gul ni baha tâ nani ba dingkaia untika nani daukaia, bara dusa nani taya ba sin gul ni lalaubaia.

³⁰ Bamna utla ba nahki mâkaia patrangka, il purara mamrikatna ba baku mâkma.

³¹ “Pamaia kwalka sin kum daukma, mapla blu, balianta talia, pauni bara linin kwalka painkira ni pitbi daukaia. Baha ba wan mihta ni mamaia bara insal wâl lilka ni sin sakahki painkira dauks.

³² Baha ningkara gul ni paskan pînka nani ba brih, akasia dusa ni playa tara walhwal daukan ba playka ra pami swis. Playka nani taya ba gul ni lalauban kaia sa, silbar playka tara walhwal ba purara kabia.

³³ Bara kwala tara ba, pamaika nani ba ra pami swis, bara baha kutbanka ba bilara, lâ nani auhbaika watla ba bri si swis. Bara kwala paman ba mita Holi Pali pliska ba, aihka dakbi saki maikbia.

³⁴ Baha ningkara lâ auhbaika watlika ba pura prakaika ba bri si pura praki swis, Holi Pali pliska ba ra.

³⁵ Bara tibil ba lika kwala paman ba bilara dingkpara, lamara yahbra tani ra swis, bara tibil ba lamara waupasa tani ra, kiandil bapaika ba swis.

³⁶ “Bara utla dimaia durka ba kat kwala pami swis, blu, pauni pali, linin kwalka ai mihta ni pitbi mami prana daukan ba.

³⁷ Bara akasia dusa wina playa matsip daukma, bara baha ba gul ni lalawma, bara kli playa tara matsip wala bras ni daukma, bara baha purara matsip ba bapi kwala ba ra pami swima.