Impakan Sturka 25 - DAWAN BÎLA AISKA

Dawan tintka watla dukiara prisantka nani ba

¹ Dawan ba Moses ra aisi, naku win:

² “Israel luhpia nani ra wis yang ra aikaia prisant nani wahbia. Sakuna wahbaia sa upla nani un ai kupia wina yaia brin dauki nani dukia sâtka nani.

³ Bara naha dukia sâtka nani wahbaia sa: gul, silbar bara bras sin,

⁴ kwala nani mapla blu, balianta, pauni, linin kiwka, guts taya,

⁵ sîp wainhka iki taya ink pauni dingkan ba, taya painkira, akasia dusa,

⁶ batana laya lamp nani ra laikaia, tangni laya kîa painkira, yamni munaia batana laya ra laiki bara angki kîa painkira daukaia dukia nani sin,

⁷ bara walpa klauhira karnilian wi ba, bara walpa pranakira wala nani sin, prîs tara ‘‘efod’’ ra ba prâka pîska wala ra pamaia dukiara.

⁸ Yang dimi takaskaia watla sin kum man nani mâkma, bara yang bal muni witin nani tilara takaski kamna.

⁹ Sakuna baha watla yang bal takaski kaia sna ba, baha bilara iwaika nani sut ba sin nahki daukaia ba yang bui man ra mamrikamna bara baku daukaia sma, sât wala lika apia.

Lâ nani auhbaika watla

¹⁰ “Akasia dusa ni, lâ auhbaika watla kum pasks, yarika ba ins nani 45 bri kabia, bîla yahpika ba ins nani 27, bara paknika ba lika ins nani 27.

¹¹ Baku sin lata bara bîla tani aiska ba gul slilki lalaubi praks, maisa kir ba sin gul ni maisa wila baku mangks.

¹² Dus dingkaika untika walhwal gul ni dauks, bara mina nani walhwal ra mangks, tnaya bani ra wâl.

¹³ Akasia dusa ni twilkaika dusa nani ba dauks, bara taya ba gul ni lalaubaia.

¹⁴ Lâ auhbaika watla tnaya untika ba ra dingki swis bahara alki buki twilki kaia,

¹⁵ bara dusa ba kli sâkpara untika ba wina; bahara ban swis lâ auhbaika watla ba wal,

¹⁶ bara lâ auhbaika watla yang maikamna ba baha bilara mangks.

¹⁷ “Gul ni pura bikaika kum pasks, yarika ba 45 ins, bara bîla yahpika ba 27 ins.

¹⁸ Bara gul ba, amar ni pruki pain dauki, baha ni insal lilka wâl paski bara baha pura bikaika daukram ba purara kahbi swis, tâ wâl.

¹⁹ Pura bikaika ba bara insal nani ba sut pîs kumi daukan kaia sa, bara insal kum ba pura bika tâ kum ra swiaia sa, bara wala ba pura bila tâ wala ra,

²⁰ bara insalka nani ba ai mawan kat kaia sa, sakuna ai nakra nani ba naha pura bikaika ba kat kaiki kaia. Ai tnawa nani ba ni, baha pura bikaika aiska ba pura biki kabia.

²¹ Pura bikaika ba paskma ba ra, lâ nani auhbaia watlika ba purara praks, bara yang wina lâ maikamna lâka ba, baha auhbaika watla bilara mangks.

²² Baha wina man nani wal yang aisamni, pura bikaika purara, insal nani wâl ba lilapaska ba wina, lâ nani auhbi watla ba wina, yang bui man nani ra mai wi kamni, yang dîa Israel luhpia nani ra wiaia brisna ba.

Brit nani kahbaia tibilka ba

²³ “Akasia dusa ni tibil kum paskma, yarika ba 36 ins, bîla yahpika ba 18 ins, mina ba 27 ins.

²⁴ Bara taya aiska ba gul ni lalaubaia, maisa wila ba sin gul paski prakaia.

²⁵ Tibilka un kir ba sin gul ni ins yumhpa kutbi laks;

²⁶ tibilka mina kumi bani ra unta kum bâra kaia dukiara, kâp talia walhwal gul ni paskbia. Bara mina kumi bani ra, baha tibil karnika alki tatka ba lama kat sabi swibia,

²⁷ baku tibil mina ba, mina karnika alki ba, kapka kiama untika ba sut asla alki kabia, baha twilkaia dusa ba dingki twilki kabia ba ra.

²⁸ Baha twilkaia dusa ba akasia dusa ni paskaia, bara sin aiska ba gul ni lalawbia,

²⁹ plit nani bara diara wala nani sut ba sin gul ni paskaia, ispan tara, sumi, bara plapta nani ba sin, diara laya prisant nani bri balaia.

³⁰ Baha britka yang ra aikisma ba, piu bani baha tibil purara kahbi bas, yang kaikaia.

Kiandil mina gul ni paskan ba

³¹ “Kiandil bapaika sin kum gul aihwa wal, amar ni pruki tisbi pasks. Lilara dusa ba, tnawa nani, slaunhka, tangnika nani sut ba, lila ba ra prakan kabia,

³² tnaya nani wina, klahkla nani matlalkahbi takan kaia sa, tnaya kum wina yumhpa, bara tnaya wala wina sin yumhpa.

³³ Klahkla bani kiandil bapaika dusa wina takan ba, kakauka baku yumhpa bri kaia sa, amans tangnika baiwi ba baku, slaunhka tangnika bri kaia sa.

³⁴ Baha bilara dusa mina ba sin baha kakauka tangni walhwal ba bri kaia sa, baha sin amans slaunhka tangnika ba baku kaia sa.

³⁵ Kiandil bapaika dusa wina klahkla bani kilwi takan ba playka ra, tangni urhwi taki kaia sa.

³⁶ Naha tangni baiwi kakauka ba, kiandil bapaika dusa wina klahkla nani sut ba, lila dusa ba ra asla prakan kaia sa. Baha sin gul pali aihwa ba, amar ni pruki tisbi paskan kaia sa.

³⁷ Lamp nani sin 7 paski baha dusa ba purara kahbi swis, ingnika ba ai kaina tani ra ingwi kaia,

³⁸ bamna lamp amaika ba bara laya banhki ba sin, gul aihwa pali ba ni paskan kaia sa.

³⁹ Gul 75 paun bris, baha kiandil bapaika ba bara pîska nani ba sut paskaia,

⁴⁰ bara aman pali damra wali wark ba dauks, il ra yang pat mai wîri baha yarika yahpika diara wala nani ba sin sut nahki daukaia sma ba.