Impakan Sturka 23 - DAWAN BÎLA AISKA

Diara wapni daukaia lâka nani

¹ “Sturi kunin twilki bri si aisapara. Upla saurakira watawi man dauki uplika ba tâwan aimaki, witnis kunin aisi man mita tâ baikpara.

² “Upla ailal pali witin ai saurka dauki auya ba nina blîkpara. “Witin nani diara warha daukaia dukiara lâ mapara aisi nani wal ba lâka ra tniwpara;

³ umpira nani ra taiban lâka ra diara makabi ba wal sin tniwpara.

⁴ “Waihlam kum bîpka wainhka, apia kaka birikuka kum tiwan bara man mita sâkma kaka, kli laki yas witin ra.

⁵ Baha uplika misbara mai kaiki ba, hilp munras kapara; kainamra ai birikuka kauhan kaka, bara diara wirha ai purara bri kaka, hilp muni baha wirhika ba pura wina sâks.

⁶ “Upla umpira kum lâ mawanra lâ dimisa kaka, ai lâka wapni dauki yaia ba âmya tikpara.

⁷ “Kunin aisi upla dahra kwahki ba wina laihura bas. Upla kum pâtkas kaka, lâka dauki ikpara, kan baha pâtkira ba yang mita pâtkas kulkamna apia bamna.

⁸ “Upla kum taiban lâka ra ai lâka ba wapni dauki yama wisi lalah maikbia kaka, alkpara; kan baku lalahka alki uplika ba, nakras takisa bara upla pâtkas ba ban yan pâtkira daukisa bamna.

⁹ “Upla tringsar nani ra sarka paskpara, kan man nani sin Idsip tasbaya ra tringsar kapram ba ra, man nani upla wala tasbaya ra iwaia ba nahki ba tânka pain brisma.

Lâ ba mita ris briaia

¹⁰ “Mani nani 6 ba bilara namsla nani dauks, bara patam mâ nani sin kuki bris,

¹¹ sakuna mani 7 aimakbia ba ra, wark daukpara: namsla nani swis ailal kabia upla umpira nani tasbayam ra iwi nani ba baha wina piaia, bara daiwan wail nani sin kau dîa ailal ba pibia dukiara. Wainkam nasla nani bara albikam nasla nani wal sin baku dauks.

¹² “Yu nani 6 ba bilara dîa warkka nani daukaia sma ba sut dauks, sakuna yua 7 ba aimakbia ba ra, ris bri bas, bîpkam wainhka nani, birikukam nani sin ris bribia, bara tringsar nani, albikam nani sin kli ai karnika briaia ba mata baku dauks.

¹³ “Diara nani sut yang mai wîri ba kat dauki bas. Bara aikrika, gâd wala nani kumi sin dukiara man nani unam nani wina walamnara.

Liliaka yua tara yumhpa ba

¹⁴ “Yang ra mayunra aikaia dukiara mani kum bilka ra aima yumhpa lilia tara dauki kama.

¹⁵ Brit îs âpu dauki yua ba, lilia dauki kaia sma, dîa daukaia yang mai wîri ba kat, baha yua nani ba wik kum ba brit îs âpu pi kaia sma. Baha yua tara ba sika Abib katka ba, baha katka ra sika man nani Idsip tasbaya wina takram ba, bara upla kumi sin ai mihta bîla baman yang ra bal ai kaikaia apia sa, sut diara kum bri balaia sa.

¹⁶ “Namsla ra patam nani mangkram ba wina, mâ tawahkia nani ba yabaia yua liliaka ba sin kulki kaia sma. Bara sin mani tnata ra patam nani sut insla wina kuki dingkisma yua ba sin, yua tara kulkaia sma.

¹⁷ “Mani kum bilara upla sut ba, aima yumhpa Dawan mawanra baku bal kaia sa.

¹⁸ “Yang ra daiwan sakripais dauki aikisma piua ra, tâlia ba brit îs wal daukan ba aikuki kumi ra aikpara, baku sin batanka ba swipara yu wala titan kat dukiara.

¹⁹ “Patam mâ tawahkia kanra yamni nani ba, Dawan tempelka watla ra brih waia sma. “Guts lupia ba, ai yaptika tialka laya ra mangki piakpara.

Dawan insalka ba

²⁰ “Kaiks, yang insalki man nani tâmra blikamni kainam kaiki kaia ba dukiara, bara baha tasbaya man nani dukiamra ridi sakri ba kat mai bri wabia.

²¹ Witin ba wina laihura takpara, bara ai bîla sin wali dauki bas, ai mapara bupara, kan witin bui yang nini brih wataukisa bara man nani saurkam sin ban swih tikbia apia sa bamna.

²² Sakuna man nani kasak pali witin ai bîla wali dauki kama kaka, yang mai wîri ba kat, yang lika man nani waihlam nani wailhka kamni. Bara baha nani man nani mampara bubia ba, yang mita witin nani mapara buamni.

²³ Yang insalki ba man nani kainamra impakbia bara mai brih wabia amorreo nani, hitita nani, ferezeo nani, Kenan uplika nani, heveo nani bara Jebús uplika nani tasbaya kat, baha nani ba yang mita ai wakia kira daikamna.

²⁴ Baha uplika nani ai saurka nani dauki ba, nina bliki man nani sin daukpara, witin nani gâdka ra sin lulam krikpara, mayunra sin yapara; sakuna gâd bahki nani ai walpaya playka nani aihka yamni kulki bri nani ba sut sin sauhki tiks.

²⁵ Dawan Gâdkam ra puram suni mayuni bas, bara witin mita patam nani ra lî nani ba pura ai yamnika yabi kabia. “Yang sin siknis nani ba, man nani wina laihura sakamni.

²⁶ Yang daukamna, man nani pruma apia kau piuam aimakras ba ra. Baku sin man nani tasbayam ra, mairin kumi luhpia prui takbia apia, mairin biarapara sin âpu kabia.

²⁷ “Yang daukamna sibrin lâka tara kârma kalki inaia lâka nani, kupia kriwan lâka tara sin man nani kainamra ban wabia. Bara ani tasbaya bâk luisma ba ra, yang mita munamna waihlam nani sut man nani kainamra plapi kabia.

²⁸ Yang daukamna sibrin mita kupia sut tiwi kaia ba, man nani kainamra wabia, bamna baku mita heveo nani, hitita nani, Kenan uplika nani sut sin, man nani kainamra plapi kabia.

²⁹ Waihlam nani ba man nani mamwan wina mani kumi bilara kangbi sakamna apia, daiwan wail nani ba âpu takbia apia bara kau ailal taki man nani ra mai sauhki kaia apia ba mata.

³⁰ Witin nani ba tâura kangbi sakamna, man nani luhpa nani ailal briram kabia ba piua ra, bara tasbayam ba alki briram kabia ba piua ba kat.

³¹ Tasbayam piarkika ba sin naku daukri sa: Kabu Pauni ba wina filisteo nani kabuka kat, bara tasba lâwan ba wina Éufrates awalka kat. Upla nani sut baha bilara iwi ba yang mita man nani mihtam ra mangkri sa, man nani mita witin nani ba mamwan wina kangbi sâkma.

³² “Witin nani wal ban kra bara ai gâdka nani wal sin, kupia kumi takaia wisi aisi lâ daukpara.

³³ Witin nani ba man nani tasbayam ra swirka takaskaia lâka sin daukpara, witin nani kra mai munka, yang maipara saura yama kra sîa. Ai gâdka ra kra wih puram suni mayunma kaka, baha ba man nani kauhankam kabia tiwaia lâka ra.”