Impakan Sturka 2 - DAWAN BÎLA AISKA

Moses aisubi takan ba

¹ Baha piua ra, waitna kum Libai kiamka wina ba ra, mairin kum sin Libai kiamka ba wina wal ai maya takan.

² Bara mairin ba kwihra tiwan, ai luhpia waitna kum baikan, witin kaikan bibi ba painkira kan, bamna kati yumhpa yukuki brin ai watla ra.

³ Ban sakuna, witin nani kau piua wihka sip yukukras kan, bara baskit kum brin, bara untika nani sut tar wal lasbi prakan lî dimbiara sîa. Bara tukta ba baha bilara mangkan, bara Nilo awalka un ra bri si, klisang tilara swin.

⁴ Bara bibika lakrika kum swin, witin ba itwi baku takaski bâra kabia, tuktika ba ra dîa takbia sapa kaikaia dukiara.

⁵ Tisku baku kan, king fero luhpia mairin ba awala un ra bal iwan aihtabaia. Ai albika mairin nani ba, awala unku wapi tauki kan ba ra, king fero luhpia mairin baskit ba kaikan, klisang nani tilara kan ba. Bara ai albika mairin kum blikan wih brih balan.

⁶ King fero luhpia mairin bui baskit pura ba bukutban bara kaikan bilara tuktan waitna lupia kum inisa, bara witin ai kupia ra latwan pali kaikan bara win: —Naha na Hibru nani bibika kum sa.

⁷ Bara tukta lupia lakrika ba bal king fero luhpia mairin ra win: —¿Yang wih Hibru mairin kum pliki bri balamna ki, tukta na tiala dakaki maikaia?

⁸ Bara king fero luhpia mairin bila: —Pliskam, baku dauks. Mairin lupia na naha wali isti pali plapi wan, tukta lupia yaptika kat wih bara bri balan.

⁹ Bara king fero luhpia mairin witin ra win: —Tukta na bris, wamtla ra brih was, bara paki aik. Warkkam mana ba yang mai aibapamna. Bara tukta yaptika bibi ba ai watla ra brih wan, bara pakan.

¹⁰ Naika kan tukta ba aitani tara takan ba ra, witin ba king fero luhpia mairin ra yaban. Nanara king fero luhpia mita tukta ba ai luhpia pali baku daukan. Bara win ai nina ba Moses, kan witin win: —Yang mita witin ba lî wina sakri.

Moses Idsip wina Madián tasbaya ra plapan ba

¹¹ Moses ba pat tara pâwan kan ba ra, impaki taki wan ai uplika Hibru nani ba kaikaia. Baha piua ra kaikan, ai uplika nani ba nahki taiban lâka mununhtara wark karna taki ba. Bara sin kaikan, nahki Idsip uplika kum mita ai uplika Hibru kum ra saura pali pruki kan ba.

¹² Bamna witin ai tnaya kir sut pain pali ai kaina pliki kaikan, upla kumi sin witin ra kaikras kan. Bara witin Idsip waitnika ba iki, auhya ra salhki biki yukukan.

¹³ Yu wala kli witin taki wan, bara kaikan Hibru kum ai tahkia ra aiklabi kan. Bamna witin pâtka dauki ba waitnika ra win: —¿Dîa muni man klauna uplikam ra prukisma?

¹⁴ Bara waitna ba pana witin ra win: —¿Man ba ya mita yang nani tilira wihtka kaia mai mangkan? ¿Dîa, yang ra sin ai ikaia lukisma, Idsip waitnika ra ikram ba baku? Moses baha walan ba ra sibrin takan, kan ai dara walan witin Idsip waitnika ikan ba, upla nani pat tânka brin sa.

¹⁵ King fero baha sturka walan, Moses mita Idsip waitnika kum ikan ba. Bara witin bui upla blikan wan, Moses ba pliki saki alki ikaia. Sakuna Moses ba plapan, Madián tasbaya ra wih yukuwan. Yu kum witin liwanhta kum purara iwan.

¹⁶ Bara Madián prîska Reuel luhpia mairin nani 7 ba balan liwanhta ba ra, ai aisika sîpka nani lî panhki dakakaia bara laya watla nani sin banhkaia dukiara.

¹⁷ Sakuna sepad nani balan, witin nani ra liwanhta ba wina kangban. Bara Moses buan, mairin nani ba tâwan aisin. Bara lî panhki sîpka nani ba sut dakakan.

¹⁸ Baku mairin nani ba, kli ai aisika ra tawi wan ba ra, aisika mita makabi walan: —¿Nahki kan man nani naiwa na, ban pat pali tawi balram na?

¹⁹ Bara mairin nani ba pana win: —Aisa, Idsip wina waitnika kum mita yang nani tâiwan aisin sepad nani mapara, baku sin lî panhki sîp nani sut ba lî dakakan.

²⁰ Bara Reuel bila ai luhpia mairin nani ra: —¿Bara anira sa waitnika ba? ¿Dîa muni witin ba swih balram? Wih paiwi bri bal yawan aikuki plun piaia.

²¹ Naku tâka ba wina, Moses Reuel watla ra takaskan. Ningkara, Reuel ai luhpia mairin Séfora ba Moses wal maya baikan.

²² Séfora luhpa waitna kum baikan, bara Moses bila: “Yang na naha tasbaya ra tringsar sna bamna, witin ai nina ba Guersón mâkamni.”

²³ Mani nani lui ba tilara Idsip kingka ba pruan. Sakuna Israel luhpia nani lika ban alba lâka munhtara pât saura wahwi kan. Witin nani ini ai mâmna lulki makabi kan ba Gâd walan.

²⁴ Bara witin ai kupia krawan Ebraham, Aisak bara Jekob aikuki lâ daukan lâka ba dukiara.

²⁵ Bamna Gâd kaikan Israel luhpia nani nahki pât saura wahwi ba alba lâka mununhtara, bara witin baha nani dukiara lukan.