Impakan Sturka 19 - DAWAN BÎLA AISKA

Israel luhpia nani Sainai ilka ra wan ba

¹ Israel luhpia nani ba Idsip wina takan bara kati yumhpa aimakan, yua pas ba Sainai, upla iwras tasbaya ra wan.

² Refidim wina takan ba ningkara, witin nani Sainai twi tasbaya saura ra wan, Sainai ilka mawanra ai tintka watla nani ba bapan.

³ Bara Moses ba, il bahna ra uli wan Gâd wal prawaia, bamna Dawan il ba wina aisi witin ra winan: —Naha bîla nani na Jekob kiamka bara Israel luhpia nani ra maisa paks:

⁴ ‘Yang bui Idsip uplika nani ra dîa daukri ba, man nani pat kaikram bara nahki man nani sin yang nâra sna na kat mai bri balri na, yakal tara kum tnawa ra mai mangki baku mai bri balri.

⁵ Bahamna man nani diara sut ra yang lâika bîla nani kat wali daukaia mai wîri ba daukma kaka, man nani ba upla wala nani sut tila wina aihka mai saki, yang upliki nani pali mai brimni, tasba aiska ba yang duki sa bamna.

⁶ Man nani ba yang prîski nani, king tasbaya kum kama, upla holikira nani yang upliki nani.’ Man bui Israel luhpia nani ra baku wis.

⁷ Moses bui Israel luhpia nani ba sut paiwan, bara Dawan bui witin ra diara nani sut win ba witin nani ra win.

⁸ Bara Israel luhpia nani sut, ai bîla baikra kumi pana aisi, win: —Diara nani sut Dawan mai win ba baha kat, yang nani daukamni. Bara Israel luhpia nani pana aisin ba Moses bui Dawan mawanra brih wan,

⁹ bara Dawan bui witin ra win: —Kaiks, yang lika man ra kasbrika siksa kum ra balamni ba ra, man wal aisi kamna, upla nani ba wali kabia, bara baku witin nani piu sut man ra tniwi ban kabia. Upla nani aisinka ba Moses kli Dawan ra win,

¹⁰ bara Dawan kli witin ra win: —Was bara upla nani ra wis, naiwa bara yauhka wal ba, witin nani ridi takaia sa yang ra mayunra kum dauki aikaia. Witin nani ai kwalka nani ba tuski sakaia sa,

¹¹ bara yahwanka dukiara sin ridi takaia sa. Yahwanka sika yang Dawan bal iwaisna Sainai ilka ra, upla nani sut ai kaikbia.

¹² Bara il playa aiska kir ba mark muni laks, upla nani baha markka ba wina kau lui waia apia il lamara. Witin nani ra sin wis baha ilka ra uli wabia apia, lama pali ra sin wabia apia, kan ani uplika baha il lamara wabia ba pruaia pâtka ra lakan kabia bamna.

¹³ Il ra kangbi pâtkira takuya uplika nani ba, upla wala nani witin ra ai mihta ni taya ra kangbaia apia sa, kuna walpa ni sabaia, apia kaka trisbaya ni sabi ikan kaia sa. Upla kabia, daiwan kra kabia, sakuna raya swiaia apia sa. Upla nani ba, bîp aringka trumpitka ba puhbuya walbia kat, witin nani sip sa mahka baha ilka ra uli waia.

¹⁴ Moses il wina bal iwan, upla nani ra wiaia ridi takaia, Gâd mayunra dauki yaia ba dukiara. Upla nani ba ai kwalka nani tuski klin takan,

¹⁵ bara Moses bui witin nani ra win: —Ridi taks yahwanka dukiara, bara mairin wal sin yappara.

¹⁶ Bara yu yumhpa alkan yua ba, nan yu baiwi kan ba ra, mahka imyula nani bara alwani nani sin puli kan. Bara kasbrika siksa tara kum, il ba pura kat bal takaskan. Trumpit binka karna pali sin puhbi kan, bara upla nani sut sibrin mita tatatwi kan.

¹⁷ Bamna Moses upla nani ba ai watla nani ba wina brih taki wan Gâd wal prawaia, bara il plahpia kat wih takaskan.

¹⁸ Sainai ilka pura aiska ba kiasma baman saki kan, Dawan baha purara bal iwan bamna. Kiasmika ba pauta mukaika watla tarka tara kum wina taki uli ba baku taki kan, bara il aiska ba sin nikbi kan.

¹⁹ Trumpit binka ba sin aima bani kau karna, kau karna taki kan; Moses bui Dawan ra aisi ba ra, Gâd bîla baikra ba pana Moses ra aisi kan ba alwani binka baku karna kan.

²⁰ Dawan ba Sainai ilka bahna ba kat bal iwan, bara Moses ra makaban bahara uli wabia. Bamna Moses uli wan,

²¹ bara Dawan bui Moses ra win: —Mâyara iwi was bara upla nani ra maisa paks, mark nani mangkram ba wina kau ai kainara lui waia apia sa ai kaikaia dukiara, ban kra witin nani manis kauhi pruaia sip sa baku daukbia kaka.

²² Prîs nani ba sin yang laimara balaia sa kaka, witin nani sin klin takaia sa. Baha apia kaka, yang bui witin nani ba sin âpu daukamna.

²³ Moses pana Dawan ra aisin: —Upla nani ba naha Sainai ilka ra bal ulras, kan man mita wan wiram mark mangkaia, ilka na holikira sa bamna.

²⁴ Sakuna Dawan bui witin ra win: —Mâyara iwi was bara Eran brih, wal uli bal. Ban sakuna prîs nani ba bara upla wala nani sut ba lika, yang nâra sna na ra bal ulaia wisi, mark munan nani ba luaia apia sa, kan yang bui witin nani ra klala yabamna.

²⁵ Moses mâyara iwi wan bara dîa aisin kan ba kli aisi Israel luhpia nani ra win.