Impakan Sturka 15 - DAWAN BÎLA AISKA

Moses lawana aiwanan ba

¹ Bara Moses lika Israel luhpia nani aikuki naha lawana aiwani, Dawan ra mayunan: “Dawan ra yamni kulki aiwanamni, pura luanka kum aihkakira brin ba, aras âiulra nani araska kabu ra rungki tikan bamna.

² Laiwana ba Dawan ra yabisna, witin lika yang karniki bara swaki ai sasakra sin ba. Witin ba yang Gâdki, yang bui witin ai nina mayunaia sna; witin ba aisiki nani Gâdka, yang bui witin ba purara bukaia sna.

³ Dawan ba war aiklaklabra tara sa; bara ai nina ba sin Dawan sa.

⁴ King fero, warka wagin nani sut, war aiklaklabrika nani ba sin sut, kabu ra rungki tikan sa; ¡suldiar wihtka kau pain nani kan ba Kabu Pauni ra swin kwapi pruan!

⁵ Witin nani walpa baku kabu tihuka kat rungwi iwan, bara kabu tihuka tara ba witin nani pura bikan.

⁶ Dawan, man mihtam aihkika ba karnika tara sip pali aihwa sa, baha ni wan waihla nani ba kriki yuya baman daukram.

⁷ Man karnikam tara pali ba wal waihlam nani mampara buan ba, minam ra taibram; kupiam baiwanka ba pauta klauhan baku sa, bara witin nani ba twi lâwan baku angkram.

⁸ Kabu laya ba puhbram, aipaswi utla tnaya baku takan. Kabu ripka nani ba tawan kutbanka baku purara uli wan. Kabu lilapas tihuka ba tasba lâwan karna takan.

⁹ Waihla ba lukan: ‘Yang ai nina blikamna, witin nani ba bliki alkamna ba kat, ai dukia nani ba mihta dakbi, yui brimna âiyapah takamna ba kat. Sordki ba sakamna, yang klaihkla ni witin nani ba sauhki tikamna.’

¹⁰ Man wingkam puhbram bara kabu witin nani ba langkan; witin nani ba walpa baku kabu ripka tilara rungwan.

¹¹ Dawanki, ¡gâd wala âpu sa man wal mai prakaia! ¡Kumi sin âpu sa man baku tara, saurka lâka âpu ba! ¡Diara aihka painkira nani daukisma, diara sibrinkira nani sin! ¡Man mamyunra briaia ba aitani pali sma!

¹² ¡Karnikam ba upla mapara param sakram, bara tasba mita langki pin!

¹³ Naha uplika nani swaki sakram na, man lamtwanka lâka ni tapahkisma. Karnikam ni tâ bri auma iwaikam watla holikira ba ra waia.

¹⁴ Nisan nani naha tânka na ai dara walbia ba ra witin nani tatatwi kabia, filisteo nani ai nana dusa warbi lakbia, sarka lâka latwanka taibuya ba luki ba mita.

¹⁵ Kiaptin nani Edom ra ba wingka prahni taki kabia; Moab ra wihta nani ba sibrin tara dauki tatatwi kabia, bara Kenan uplika nani kupia karnakira ba sin, lap tiwan kabia.

¹⁶ Dawanki, swis witin nani sirang iwbia, swis witin nani tatatwi kabia, swis witin nani walpa baku sip aiawras kabia, man klamhkla karnika ba mita, uplikam nani ba sut bal lui wabia ba kat, naha uplika nani na man dukiam saki briram bamna.

¹⁷ Dawanki, wan brih was man ilkam holikira ra bâra iwaia; baha ilka ba man mita bâk sakram, man bahara iwaia, iwaia watla man mihtam ni alki buki bapram ba.

¹⁸ ¡Dawan ba king aimaki ban kaia ra ban kabia!”

Meri lawana ba

¹⁹ King fero araska âiulra nani ba, ai waginka nani aikuki kabu ra wih diman ba ra, Dawan mita daukan kabu laya ba witin nani purara bikaia; sakuna Israel luhpia nani ba lika kabu ra tasba lâwan bâk lui wan.

²⁰ Bamna Gâd prapitka mairin Meri, Eran lakrika ba, bin dauki aiwanaia singbaika ba brin, bara mairin nani sin sut witin ai nina blikan dans puli singbaika singbi kan.

²¹ Bara Miriam witin nani ra aiwani kan: “Man nani bui Dawan ra pain kulkan lâka ra aiwans, aras nani ba, aras âiulra nani ba sin, witin kabu ra rungki tikan bara pura luan lâka aihka painkira, pranakira dauki ai nina mayunan bamna.”

Lî tahpla ba

²² Bara baha ningkara, Moses Kabu Pauni wina Israel luhpia nani ba brih mahka impakan. Witin nani Sur upla iwras tasbaya ba kat wan, yu yumhpa witin nani twi saura tasbaya ra wapan, sakuna lî sakras kan.

²³ Witin nani Mará kat wan ba ra, lî sakan, sakuna laya ba sip diras kan, baha ba tahpla kan bamna. Baha mita witin nani baha pliska ba nina Mará mâkan.

²⁴ Bara upla nani mahka Moses mapara rangbi aisin: “¿Yang nani dîa dimna?”

²⁵ Moses bui Dawan ra ai pura sunan, bara Dawan mita witin ra dus sirpi nani pâwi ba kum marikan. Bara Moses baha dusa brih bara laya ba ra lulkan, bara laya ba damni takan. Bahara Dawan bui witin nani ai tânka ba trai munan. Witin nani dukiara lâ kum mangki yaban wan ai rayaka ra nahki iwaia lâka ba.

²⁶ Witin nani ra win: ‘‘Man nani ra mai wisni, aisisna na man nani aman wali brima kaka, yang, man nani Dawan Gâdkam, man nani ra mai wisni, yang yamni kaikaia brin ai dauki ba man nani daukma kaka, lâika bîla nani ba wali daukma kaka, Idsip uplika nani purara klala blikri ba klalka nani ba, man nani puramra blikamna apia. Yang sika Dawan, man nani ra sikniskam nani wina mai rakisna ba.”

²⁷ Baha ningkara witin nani Elim ra wan, bahara lî kârma nani 12 lî aubi ba ailal kan, 70 kûku dusa sâtka nani sin baha lamara pâwi kan, bamna witin nani ai tintka watla nani bahara bapan lî aubi ba lamara.