Hibru Nani 9 - DAWAN BÎLA AISKA

Dawan wal aisaia watla naha tasba ra ba, bara kasbrika purara ba

¹ Bamna pas lâka daukan ba, Gâd ra pura suni mayunaia lâka nani bri kan, sakuna baha ba Gâd wal aisaia watla kumi ra dauki kata.

² Tintka watla ba naku daukan kan: Pas kutbanka ba nina ba Plis Holikira mâki kan, bahara kiandil bapaika ba, tibil ba bara yamni munan britka nani sin bâra kan.

³ Tempel kwalka paman wala ba nina wala ra bâra kan, baha sika Plis Holikira pali mâki kan ba.

⁴ Bahara dus mâka kîa pain angkaia dukiara gul altarka kum bâra kan bara lâ auhbaia watla ba sin, baha ba aiska pali lalah pali ni lalaubi prakan kata. Lâ auhbaia watla ba gul ni lalauban kan kir ba bahara kâp kum bâra kan bara bahara manâ ba bri kan; Eran bri kan dusa urhwi pâwata ba sin lâ auhbaia watla bilara kata, bara lâ daukan bîla ulban walpaya wâl ba sin.

⁵ Lâ auhbaia watla ba purara kirubin nani ba bahara kan, baha nani ba lika Gâd pali bahara iwi kan watlika ra bri kan, bara ai tnawa nani wal lâ auhbaia watla ba praki bri kan. Sakuna nanara lika baha dukia nani tânka bani ba, aisaia piua apia sa.

⁶ Naha dukia nani naku ridi daukan ningkara, prîs nani ba yu bani tint watla pas kutbanka ba bilara pat pat wih dimi kan, Gâd ra pura suni mayunaia warkka ba daukaia.

⁷ Sakuna kutbanka wala kum ba ra lika, prîs tara nani baman dimisa, bara baha ba lika mani bani bilara aima kumi baman. Witin dimi auya ba ra, daiwan nani tâlia brih waia sa, baha ba Gâd ra yabisa, ai saurka nani dukiara bara upla wala nani saurka nani dukiara sin.

⁸ Naha dukia wina Spirit Holikira param pali smalkisa, tint watla kutbanka pas ba kau ban bûi kan sakuna, Dawan wal prawaia yabalka pali ba lika kau kwâkras kan.

⁹ Naha dukia sut na lika naha piua nani dukiara lilka kum baku sa. Tânka ba lika wisa, bahara prisant nani bara sakripais nani sin Gâd ra yabi ba, baha nani ai pura suni mayuni kupia nani ba sip kasak aihwa daukras sa.

¹⁰ Witin nani daukaia sa plun nani wal baman, laya din nani bara ai wîna nani klin sakaia sât sât sin. Naha sut na lika pura tani lâka nani baman sa, bara tânka aihwa kumi sin âpu sa, Gâd diara nani sut kli aihka lakbia piua kat mika.

¹¹ Sakuna Kraist pat balan, bara nanara witin sika nahara diara pain nani pat nâra nani na prîska tara. Witin prîs warkka dauki tintka watla ba lika kau pain bara kau kasak aihwa sa; baha ba upla nani mita paskras sa, tânka ba lika, naha tasba dukia apia sa.

¹² Kraist ba Dawan wal aisaia watla ba kat dimi wan, bara guts lupia nani bara bîp wainhka nani tâlia sin sakripais yabaia wisi dimras kan, sakuna ai tâlia pali; bamna bahara aima kumi baman dimi wih ban kaia swaki sakan lâka ba alki yawan ra wankan.

¹³ Kasak pali sa bîp wainhka nani bara guts lupia nani tâlia ba, bîp mairin lupia yamhpuska nani altar ra angki ba bara baha ni tâski uplika nani ra srikbi ba sut mita sin, baha nani ra holikira bara pura tani mapa klin daukaia karnika brisa.

¹⁴ Sakuna baku sa kaka, ¡Kraist tâlia ba kau karnika tara pali brisa! Ban kaia Spiritka bâk, Kraist witin ai wîna tara pali ba sakripais tâski âpu baku dauki, Gâd ra yaban. Witin ai tâlia ba mita wark bahki nani ba wina wan kupia dara walra ba klin daukisa, yawan bui Gâd rayakira dukia nani ba daukaia sip kabia dukiara.

¹⁵ Baha mita, Jisas Kraist ba lika lâ daukan raya kum lengstarka sa. Kraist pruanka ba takan sa, upla nani pas lâka daukan munhtara nani kan saurka daukan nani ba swih tikaia, bara Gâd mita paiwan uplika nani ba ban kaia dukia nani Gâd mita yaia pramis munan ba, witin nani briaia sip kabia dukiara.

¹⁶ Bamna anira lâ kum dauki swin sa kaka, baha ba latan marikan kaia sa, lâka daukan uplika ba pat pruan sa.

¹⁷ Kan lâ kum dauki swin ba lika bahki sa, baha daukan uplika ba kau raya sa kaka; baha uplika ba pruya kat lika, lâka ba karnika brisa.

¹⁸ Baha mita, pas lâka daukan ba sin tala laikan wal pain daukan kata.

¹⁹ Moses mita lâ bîla wina lâ nani ba sut upla nani ra aisan; baha ningkara, witin ba sîp tâwa pauni bara hisop tnawa kum brih, bîp lupia nani bara guts lupia nani tâlia ra yuki, lî sin mangki, lâ wauhkataya purara srikban, upla sut purara sin.

²⁰ Bara witin nani ra win: “Naha tâlia sika Gâd bui man nani wal lâ daukan bara baha kat wali daukaia adarka maikan ba, karna saki ba.”

²¹ Moses sin Dawan wal prawaia watla ba bara Gâd ra pura suni mayunaia dukia yus muni kan ba sut sin, tala ni srikban.

²² Lâ bîla wisa, diara nani aihkika ba tala ni klin daukan kaia sa; bara tala saki laikras kaka, saurka nani ba sip swih tikras sa.

Kraist sakripaiska ba mita saurka nani ba brih sakisa

²³ Baku bamna, naha diara nani kasbrika purara dukia lilka nani na diki sakaia, sakripais nani na want kan; sakuna kasbrika purara dukia nani pali sin baha nani purkara kau sakripais yamni nani want sa.

²⁴ Kan Kraist ba Dawan wal prawaia upla paskan kumi ra dimi waras, baha Dawan wal prawaia watla kasak ba lilka kum baman ba. Witin kasbrika pura pali ra dimi wan, bara nanara Gâd mawanra bahara latan takisa, yawan wan hilpka dukiara.

²⁵ Prîs tara ba Dawan wal prawaia watla ba ra mani bani aima kumi baman dimi kan, witin ai tâlia apia ba yabaia. Sakuna Kraist lika witin ai wîna tara ba aima manis sakripais dauki yabras sa;

²⁶ kan baku kan kaka, tasba paskan piua ba wina witin aima ailal pruaia kan. Baku watlika ra, piua nani na pat aimaki na ra, Kraist ba aima kumi baman latan takan ba, baha ba ban kaia ra aitani sa.

²⁷ Upla bani ba aima kumi baman pruaia sa, bara baha ningkara Gâd mita lâka daukbia.

²⁸ Baku sin, Kraist ba aima kumi baman sakripais dauki yan kata, upla ailal saurka nani brih sakaia dukiara. Bara witin kli aima wala bal latan takbia, saurka nani brih sakaia dukiara lika apia, sakuna ai bîla kaiki uplika nani ra swaki sakaia.