Hibru Nani 6 - DAWAN BÎLA AISKA

¹ Baku bamna, yawan ban wan kainara wap, upla aitani pâwan nani baku takaia, Kraist smalkanka nani pas tâura wan smalkan ba wan ninara swih. Playa bapanka dukia nani ba yawan kli bapaia apia sa, bara baha sika prura ra wan brih wi ba, warkka nani ba swih wan kupia lakaia ba, Gâd ra kasak lukan lâka bri kaia ba,

² tahbi daukaia lâka smalkanka nani, lalukra nani purara upla ai mihta nani kahbi lâka ba, pruan nani kli buaia ba bara ban kaia lâka daukanka ba sin.

³ ¡Yawan ban wan kainara wap! Bara yawan naku sika daukbia ba, Gâd mita baku wan swika daukbia kaka.

⁴ Kan baha nani pat kauhi ba, ¿nahki sip kabia kli bri balaia ai kupia kli laki nani ba? Pat aima kumi witin nani ba Gâd ingnika ra tauki nani kan. Witin nani ba kasbrika pura wina prisantka ba pat bri trai kaikan, bara Spirit Holikira wina sin ai dukia brin.

⁵ Witin nani lika Gâd bîla painkira ba, bara naika balaia tasbaya karnika ba sin pat brih trai kaikan sa.

⁶ ¡Bara ban witin nani kauhan! Sip apia pali sa baha nani kli raya daukaia ai kupia kli laki nani ba dukiara, kan witin nani pali ba sika kli Gâd Luhpia ba dus prihni ra sabi, upla sut mawanra witin lawaska kiki ai swira daukisa.

⁷ Tasba purara lî auhaia bani tasbaya mita laya ba di ba baku, witin nani sin baku sa: tasbaya ba witin purara wark taki nani ba ra, mâ yamni nani saki yabisa kaka, Gâd mita yamnika yabisa.

⁸ Sakuna kiaya nani bara rahra nani sakisa kaka, baha lika bahki sa; witin ba Gâd mita lahtubia trabilka ra sa, tnata kat pauta wal angki sauhki tikan kabia.

Wan kainara diara briaia ba mita yawan ra ban bapi wan bri ba

⁹ Sakuna muihki laitwankira nani, yang nani baku aisi kamna sakuna, man nani dukiamra lika diara pain pali lukisna. Yang nani kaikisna, man nani ba kau yamni pain nani swaki sakan lâka wal aula ba brisma.

¹⁰ Gâd lika kasakkira sa. Man nani wark daukram ba witin ai âuya tiwbia apia; kasak lukan lâka mapara muihkam nani ba ra hilp muni, witin ra latwan lâka marikram ba sin ai âuya tikras sa, bara baha dukia ba ban daukisma.

¹¹ Sakuna yang nani want sna, man nani kumi bani ban tnata kat, baha wilin lâka ba dauki kama, bara baku mika diara bîla kaikisma ba aiska pali takbia.

¹² Yang nani want apia sna man nani ba sringwaskira takma, sakuna baha nani kasak luki bara wihka bîla kaiki, Gâd ba diara yaia pramis munan bri nani ba baku, man nani sin kama.

¹³ Gâd ba Ebraham ra pramis yaban ba ra, witin ai nina mâki swer takras; kan witin purkara wala kau tara kum nina mâki swer takaia âpu kan.

¹⁴ Bara witin bila: “Yang pramis mai munisna, yamni mai munamna bara kiamkam sin ailal maikamna.”

¹⁵ Ebraham wihka bîla kaikan, bara baku Gâd ba diara yaia pramis munan kan ba witin brin.

¹⁶ Upla kum swer takisa ba ra, witin purkara upla wala kum kau tara nina mâki swer takisa; bara swer taki diara kum karna daukisa ba ra, baha mapara kau blahwanka kumi sin âpu sa.

¹⁷ Gâd want kan baha nani ra diara pramis munan ba briaia ba ra, param pali marikaia witin dîa daukaia luki kan ba sip pali lakras kan bara wilin kan baha kat daukaia; ba mita witin ai pramiska ba swer taki kira daukan.

¹⁸ Baku bamna, diara wâl bâra sa sip lakras pali, bara baha dukiara Gâd sip kunin aisaras sa. Bara baku yawan lika Gâd hilpka pliki pain trabil âpu nani, bara wan kainara diara briaia lâka wankan ba kat alki bri banhwi ba ra sin, witin mita maisa nihkra tara kum wankisa.

¹⁹ Yawan wan kainara diara briaia lâka bri ba mita, wan sulka ba ban bapi brisa bara sip sin yaban kitbras, sim grapin ba duri tara bapi bri ba baku. Naha grapinka yawan bri ba lika kasbrika purara tempel dur pamaika kwalka nina mapa wina alki brisa,

²⁰ bara bahara sika Jisas yawan dukiara dimi wan ba, yabal kum kwâki wankaia dukiara. Baku Jisas ba ban kaia ra prîs tara kum takan sa, Melkisedek prîska lâka ba baku.