Hibru Nani 5 - DAWAN BÎLA AISKA

¹ Prîs tara bani upla nani tila ba wina bâk sakan sa, bara Gâd mawanra upla nani dukiara aisaia mangkan sa. Witin ba prisant nani bara sakripais nani sin yabisa saurka nani dukiara.

² Prîs pali ba sin ai wîna swapnika nani brisa, bara baha mita witin sip sa, kan ai dahra walras nani ba bara aimawahki nani ba aikuki sin ai kupia swapni bri kaia.

³ Bara witin ai wîna swapnika nani bri bamna sika, ai saurka nani dukiara sakripais nani yabaia sa, bara upla wala nani saurka nani ba dukiara sin.

⁴ Upla kumi sin kulkan lâka mita prîs tara takras sa; sakuna, Gâd mita sika paiwi baha kulkanka lâka yabi ba, sim Eran kata ba baku.

⁵ Baha sim natka ra, Kraist ba ai karnika mita prîs tara aimakras kan, sakuna Gâd mita baha kulkanka lâka ba yan, witin ra win kan ba baku: “Man ba yang luhpi sma; naiwa yang na man Aisikam takri sa.”

⁶ Ulbanka nani wala ra aisi ba baku sin, witin ra wisata: “Man ba ban kaia ra prîs kama, Melkisedek prîs kan ba baku.”

⁷ Kraist naha tasba ra tauki kan piua ra, witin ai pura sunra nani bara ai makabanka nani ba sin, ai bîla baikra tara ni bara ai nakra laya uya saki sin Gâd ra yaban, witinka mita prura wina swaki sakaia karnika bri kan ba. Witin lika Gâd bîla wali daukan ba mita, Gâd bui witin ra walan.

⁸ Baku Kraist ba Gâd Luhpia kan sakuna, witin pât wahwan, bîla wali dauki lan takan.

⁹ Witinka ra aiska aihwa daukan kan ba ra, witin ba ban kaia ra swaki sakan lâka kârma laya takan, ai bîla wali dauki nani sut dukiara;

¹⁰ bamna Gâd mita prîs tara mangkan, Melkisedek prîska lâka ba baku.

Kasak lukan lâka wina wan ninara tawaia trabilka ba

¹¹ Naha bisniska dukiara yawan diara manis aisaia brisa, sakuna tânka aisi marikaia ba karna sa, kan man nani tânka ba briaia tawa munisma bamna.

¹² Piu wihka luan ba wina, man nani lika pat smasmalkra nani kaia kapram; sakuna kau ban man nani want sma upla kum ba, Gâd bîla tânka sirpi lupia nani ba kli mai smalkaia. Man nani uya swapni takram bamna, plun karna piaia watlika ra tiala laya ni disma.

¹³ Ani uplika tiala laya di ba lika kau tuktan swap lupia baku sa, bara kasakka lâka daukaia mapa ra kau witin lan âpu sa.

¹⁴ Sakuna plun karna ba lika upla aitani pâwan nani dukia sa, kan witinka nani ba ai dara walaia lan, bara pat kaikisa wiaia: naha na pain bara naha na saura sa.