Hibru Nani 4 - DAWAN BÎLA AISKA

¹ Baku bamna, Gâd yawan ra pramis wan munan ba witin ai riska ra dimaia, wan dara wali kaia sa, ban man nani tilam wina kumi kra sip dimras kabia dukiara.

² Kan yawan ra sin sturi yamni ba wan smalkan sa, sim witin nani ra smalkan ba baku. Witin nani baha sturka ba walan, sakuna bahki baman wali banhwan, kan witin nani ba kasak lukras kira pali ban walan.

³ Sakuna yawan kasak luki na sika, bahara dimi Gâd wal riska ba bribia. Baha sika witin aisin ba baku: “Baha mita yang bui witin nani aikuki lawi, swer taki sin pramis daukri, witin nani dimi yang wal ris bribia apia.” Ban sakuna, Gâd lika tasba paskan piua ba wina pat ai warkka tnata alkan kan.

⁴ Kan Ulbanka nani wina pîs kumi ra, yu 7 dukiara naku wisa: “Gâd lika ai warkka sut wina, yu 7 ba kat ris brin.”

⁵ Bara kli Ulbanka wala ra wisa: “Witin nani dimi, yang wal ris bribia apia.”

⁶ Baha nani sturi yamni ba pas walan ba, dimi wih Gâd wal ris briras kan, witin nani kasak lukras kan ba mita. Sakuna kau tila nani bâra sa, bara witin nani dimaia sa Gâd wal ris briaia.

⁷ Baha mita, Gâd ba yu wala kum saki marikisa: baha sika “naiwa yua” wi ba. Kan Gâd bui Debit ra aisan ba bâk, kli mani ailal ningkara yawan ra wan aisisa, pat Ulbanka wina aisisata ba baku: “Naiwa, man nani bui Gâd bîla baikra ba walma kaka, kupiam nani karna daukpara.”

⁸ Jasua mita Israel luhpia nani ra ris yaban kata kaka, kau ningkara Gâd ba kli yu wala kum dukiara aisaia apia kan.

⁹ Baku bamna, Gâd uplika nani riska holikira kau kum bâra sa;

¹⁰ kan ani uplika dimi Gâd wal ris bri ba, witin lika ai warkka ba wina ris brisa, sim Gâd ai warkka wina ris brin ba baku.

¹¹ Baku bamna, yawan karna trai muni baha riska ra dimaia sa. Yawan tila wina kumi sin baha nani kasak lukras nani kan ba baku kaia apia sa.

¹² Kan Gâd bîla ba rayaka brisa, bara karnika sin brisa. Baha ba sika sord mala napa wâl bri ba sut purkara kau mala sa, bara wan sulka bara wan spiritka biara pali ba kat dimi wisa, wan lukutbaika bara wan dusa bîla kat sin. Baha bîla ba mita wan kupia lukanka nani ba bara dîa daukaia luki ba sut sin klir pali sakisa.

¹³ Gâd wina yukuwaia dukia kumi sin âpu sa. Diara paskan ba sut param sa bara witin ai nakra ra kwâkan sa; witinka ra sika yawan wan dahra nani saki aisaia ba.

Jisas sika prîs wihta tara ba

¹⁴ Jisas Gâd Luhpia ba sika wan prîs tara, kasbrika pura ba kat dimi wan ba. Baha mita yawan kasak lukan lâka tânka bri ba, ban dutki alki bri kap.

¹⁵ Bamna wan prîska tara ba mita yawan wan swapnika nani bri ba dukiara umpira wan kaikaia sip sa, kan witin pali sin yawan baku traika kaikanka sât sât brin, sakuna saurka lika daukras kan.

¹⁶ Baha mita, kaisa yawan wan kupia brih, wan Gâdka latwankira king iwaika lamara waia. Bahara yawan umpira kaikan lâka bribia, bara witin ai kupia yamnika ba mita, yawan hilp want awarka ra witin hilp wankbia.