Hibru Nani 3 - DAWAN BÎLA AISKA

Jisas ba Moses wal kau tara sa

¹ Baku bamna, muihki kristian nani sma ba, man nani sin Gâd mita ai luhpia nani kaia wisi mai paiwan ba, Kraist Jisas ra kaiki bas, witinka Gâd mita blikan ba, yawan wan kasak lukan lâka warkka dauki ba Prîska Tara kaia dukiara.

² Bamna Jisas ba Gâd ra ban kasak kan, witinka naha warkka daukbia wisi bâk sakan ba, sim Moses Gâd watla aiska ra ai warkka kat ban kasak kan ba baku.

³ Waitna kum utla kum mâki ba, watla ba wal witin kau pain kulkan lâka brisa. Baha sim natka ra, Jisas ba Moses purkara kau prana tara briaia sa.

⁴ Utla bani ba upla kum mâkan kaia sa; sakuna Gâd sika diara nani sut paskan ba.

⁵ Baku bamna, Moses lika napakan kum baku Gâd watla aiska ra kasak kan; ai warkka ba lika, diara nani Gâd naika aisaia kan ba, witin sin aisaia kan.

⁶ Sakuna Kraist lika baha Gâd watla ba main kaikisa, Luhpia kasak kum baku. Yawan sika witin watla ba, yawan na dîa wan kainara briaia bîla kaiki ba kat liliakira, kasak ban ba kat dutki alki bri kabia kaka.

Gâd uplika ai riska bri ba

⁷ Baku bamna, Spirit Holikira mita Ulbanka ra aisi ba baku: “Naiwa, Gâd bîla baikra ba man nani walma kaka,

⁸ kupiam nani karna dauki banhpara, baha nani upla iwras tasbaya ra kan ba ra Gâd mapara buan, witin traika kaiki banhwan ba baku.

⁹ Bahara man nani damikam nani mita traiki kaikan, 40 mani yang diara nani daukri ba, witin nani kaikan sakuna.

¹⁰ Baha mita yang baha uplika kiamka nani mapara lawi, naku aisari: ‘Witin nani ai kupia ra piu sut aimawahki taukisa, bara yabalki nani ba kakaira takan daukras sa.’

¹¹ Baha mita witin nani ra lawi, swer taki sin wîri, witin nani dimi yang wal ris bri banhbia apia.’’

¹² Muihki nani, aman kaiki bas, man nani wina kumi sin ai kupia saura brih, Gâd rayakira ba wina tnaya ra tawbiara, witin ra kasak lukras ba mita.

¹³ Sakuna, man nani wina kumi sin saurka mita kunin munka bara ai kupia ba sin karna takbia apia, yu bani walkam nani aikuki pana pana tâm baiki bas, “naiwa yua” na kau dimi waras ba ra.

¹⁴ Kan yawan na baha kasak lukanka tâ wina brin ba, ban tnata kat alki bri kabia kaka, baku lika yawan Kraist wal wan uplika takisa.

¹⁵ Ulbanka ra naku wisa bamna: “Naiwa, man nani bui Gâd bîla baikra ba walma kaka, kupiam karna daukpara, baha nani Gâd mapara buan nani ba baku.”

¹⁶ Bamna, ¿ani uplika nani Gâd bîla baikra wali ningkara, witin mapara bûi banhwan? Baha nani lika Moses bui Idsip tasbaya wina sakan kan ba sut.

¹⁷ ¿Bara ya uplika nani wal, 40 mani Gâd lawi kan? Witin lawi kan saura daukan uplika nani ra, bara witinka nani ba upla iwras tasbaya ra kauhi prui banhwan.

¹⁸ ¿Bara ani uplika nani ra Gâd mita swer taki win, witin wal dimi ris bribia apia? Baha aisan ba lika, witin mapara bûi banhwan ba dukiara.

¹⁹ Bamna yawan kaikisa, witin nani ba sip dimras kan, kasak lukras kan ba mita.