Hibru Nani 13 - DAWAN BÎLA AISKA

Nahki Gâd yamni kaiki ba

¹ Man nani pana pana walkam nani aikuki, muihkam nani baku latwan lâka ba ban bri bas.

² Upla tringsar nani wamtla ra dingki briaia ba kupiam krauki bas. Upla tila nani naku dauki, ai dara walras pali insal nani ai watla ra dingki brisata.

³ Silak ra mangkan uplika nani ba kupiam krauki bas, man nani sin witin nani aikuki silak watla ra kapram kan baku. Rausauhkan uplika nani ba ra luki bas, man nani sin witin nani wal baku pât wahwi kapram kan baku.

⁴ Upla sut mita marit lâka ba pain pali kulki kabia, bara marit waitna nani ba ai maya mairin wal sunu kasak kaia sa. Marit takras si tâski lâka dauki nani ba bara marit lâka sasauhkra nani ba sin, Gâd mita lâka daukbia.

⁵ Man nani lalah ra latwan kaikpara; man nani dîa brisma ba wal liliam bas, kan Gâd mita naku aisisata: “Yang sip ban mai swimna apia, mahka lulki sin mai swimna apia.”

⁶ Baku bamna, yawan sip sa kasak luki kira wiaia: “Dawan sika yang ra hilp ai muni ba; yang sibrin lukamna apia. ¿Upla yang ra dîa ai munbia ki?”

⁷ Man nani tâm brin uplika nani ba kupiam krauki bas, witinka nani Gâd sturka yamni mai smalkan ba. Witin nani nahki iwi kan bara nahki pruan ba sin man nani luki bas, bara ai kasak lukan lâka natka nani ba kat dauki bas.

⁸ Jisas Kraist ba lika sim ban sa, nahwala, naiwa bara ban kaia ra.

⁹ Smalkanka sât aihka nani bara tringsar nani mita yarka yabal kasak ba wina mai brih wabiara. Wan sulka nani ba Gâd kupia yamnika lâka ba karnika bribia ba kau pain sa, plun lâka nani bîla wali daukaia ba wal; baha nani naha lâka nani bîla wali dauki banhwi na wina hilp kumi sin briras sa.

¹⁰ Patitara Dawan wal aisaia watla ra prîs nani kan ba lâ âpu sa yawan wan altarka sakripais dauki ba wina pi banhwaia.

¹¹ Ju nani prîs tara ba mita Dawan wal aisaia watla bara daiwan nani tâlia ba bri si dingkisa, baha ba saurka nani dukiara sakripais dauki yaia wisi; sakuna daiwra nani wîna tara nani ba lika kiamp lata tani ra angkisa.

¹² Baku sin, Jisas ba tawan getka lata tani ra prura pâtka ba wahwan, witin ai tâlia ni upla nani holikira nani daukaia dukiara.

¹³ Baku bamna, yawan kiamp lata tani ra taki Jisas ra wap, bara witin ra bahki kulkan ba sin wal aikuki twilkpi.

¹⁴ Naha tasba ra ban kaia tawanka ba yawan âpu pali sa; naika balaia tawanka ba yawan pliki taukisa.

¹⁵ Baha mita, piu bani Jisas Kraist bâk yawan bui Gâd ra mayunra yabaia sa. Naha mayunra sika yawan sakripais dauki yabaia ba; tânka ba lika, wan bîla baikra nani wal ai nina ba mayunaia.

¹⁶ Diara yamni daukaia bara dîa dîa bri nani bani upla wala nani ra hilp munaia ba, man nani âmya tiwbiara; kan nahmuna sakripaiska nani sika Gâd yamnika kaiki ba.

¹⁷ Man nani tâm bri uplika nani ba bîla wals, bara ai adarka nani kat dauki bas. Witin nani sika ris âpu pali sulkam nani main kaiki ba, kan kaikisa ai warkka daukan ba tânka Gâd ra saki aisaia sa. Witin nani bîla walma kaka, ai warkka nani ba liliakira daukbia, sarikira lika apia; kan baku daukma kaka, baha ba man nani mampara hilp kumi sin apia kabia.

¹⁸ Yang nani dukira puram suni bas. Kasak luki banhwisni yang nani kupi dahra walra na wapni pali brisni, yang nani diara sut mapara yang nani pain tauki kaia want sna bamna.

¹⁹ Kau pali puram sunra nani ba yang makabisni, Gâd mita pat pali ai blîkka man nani aikuki kamna dukiara.

Pura sunra bara prakaia lakula nani

²⁰ Gâd mita wan Dawan Jisas Kraist ba pruan wina kli bukan sa, witinka ba ai tâlia ni ban kaia lâka ba karna saki, sîp nani Sepadka Wihta takan ba.

²¹ Kupia kumi lâka Gâdka ba mita kasakkira nani bara diara sut mapara yamni nani mai daukbia, ai kupia lâka kaia dukiara; bara Jisas Kraist bâk, yawan sut ra dîa daukaia luki ba witin daukbia. ¡Kraist ra mayunra yan kabia, ban kaia ban kaia ra! Baku kabia.

²² Muihki nani, yang bui man nani ra mamkabisna, kupia kraukanka bîla nani na kupiam takaski kira wali kama, wauhkataya mai ulbri na uya yari apia sa bamna.

²³ Man nani ra maisam pakisni wan muihni Timoti ba pat silak wina takan. Witin pat pali balbia kaka, man nani mai kaikaia wamna ba ra, witin ba sin brih wamna.

²⁴ Tâm bri uplika nani sut ra bara Gâd uplika nani sut ra sin lakula wis. Italia ra wan muihni nani ba mita sin lamkula blikisa.

²⁵ Gâd yamnika man nani sut puramra laikbia.