Hibru Nani 12 - DAWAN BÎLA AISKA

Yawan Jisas kat kaiki kap

¹ Baha mita, yawan lika witnis ailal kutbi kir wan brisa. Baku bamna, dîa dîa yawan mapara wirha wan muni ba bara saurka mita wan blaki ba sin tnaya ra laki swip, bara wan kainara plapaia yabalka bri ba ban bapi buaia lâka ni plapi kap.

² Wan nakra nani na Jisas kat kaiki kap, witinka wina wan kasak lukan lâka ba, tâ wina tnata kat yawan ban bri ba. Jisas ba dus prihni ra pât wahwan, bara bahmuna pruanka saura ba wal pruya ba dukiara ai swira lukras, kan witin kaiki kan pât wahwaia ba ningkara, ai âuyapah kaia kan bara lilia sin; bara nanara, Gâd king iwaika lama pali kat wih iwisa.

³ ¡Man nani Jisas dîa daukan ba kat luki bas, nahki upla saurakira nani mihta ra kasak pât wahwan ba! Baha mita, man nani swappara, dring sin iwpara.

⁴ Kan man nani lika saurka mapara aiklabisma ba ra, kau pruras sma.

⁵ Gâd mita man nani ba, witin luhpia nani baku mai smalki dukia ba, ¿âmya tikram ki? Ulbanka ra naku wisa: “Luhpi, Dawan mita klala maiki wipi ba ra, baha ba bahki baku kulkpara, lawi mai dauki ba ra sin man dring iwpara.

⁶ Kan Dawan ba ani uplika ra latwan kaiki ba, wapnika mangkisa, bara ai luhpia baku bri ba bani ra, klala yabisa.”

⁷ Pât wahwisma ba ban bapi bûi banhwi bas, kan Gâd mita man nani ba ai luhpia nani ra baku mai munisa. ¿Ani uplika bâra sa ai aisika mita wapni mangkras ba?

⁸ Gâd mita ai luhpia sut ra wapnika mangki ba baku man nani ra sin baku mai munras kaka, man nani ba bastar sma, luhpia pali nani lika apia.

⁹ Baha purkara, yawan tuktan nani kan ba ra, wan aisika nani mita wapni wan mangki kan, bara yawan bui witin nani ra ban kulkanka yabi kan. Ban kaka, wan Aisika kasbrika purara ba ra bawaia yawan kau lâ brisa, bara baku mika raya banhwi kaia.

¹⁰ Wan aisika nani tasba ra ba bui piu wiria baman wan wapnika mangki kan, witin nani aitani lukan ba kat. Sakuna Gâd lika wan painka dukiara wapni wan mangkisa, witin holikira ba baku yawan sin holikira nani wan daukaia dukiara.

¹¹ Kasak pali sa, klala wankaia ba baha sim piua ra yawan briaia want apia sa; kan latwan wan munisa, sakuna baha ningkara, klala yaban ba mita lan taki ba, rayaka wapni bara kupia kumi lâka rayaka brih iwi kaia mana ba saki yabisa.

Gâd bîla baikra lulki swiaia trabilka ba

¹² Baku bamna, mihtam nani swapan ba bara lulam nani swapan ba sin karnika raya yabia,

¹³ yabal wapni ba pliki bas. Baku mika ani mina skahwa takan ba rawbia, bara kli warha takbia apia.

¹⁴ Man nani upla sut wal kupia kumi lâka bri kaia trai kaiki bas, bara rayakam ba sin holikira bri kaia trai muns; kan holi lâka âpu kaka, upla kumi sin Dawan ba kaikbia apia.

¹⁵ Man nani damra wali bas, upla kumi sin Gâd yamnika lâka ba wina ai ninara tawbiara sîa. Damra wali bas, man nani wina kumi sin dus tahpla kum pâwi ai puisinka ni upla ailal ra trabil muni ba baku kabiara.

¹⁶ Man nani wina kumi sin marit apia kaka, ai maya bribiara, bara diara holikira ba sin bahki baku kulkbiara; kan Isau sika baku daukan ba, plun plit kum mana witin tawahkia kan lâka ba atkan wan.

¹⁷ Bara man nani pain kaikisma, baha ningkara Isau ai aisika wina yamnika ba want takan ba ra, ai ninara kli lakan kata; bara witin kasak inan sakuna, diara daukan ba lakaia tânka sip pliki sakras kan.

¹⁸ Man nani lika Israel luhpia nani baku, diara kum upla bui ai mihta ni kangbaia sip kan ba, bara pauta ni sin ami kan ba lamara waras katma, bahara tihmu, tihmia tara bara pâsa karna sin kan ba;

¹⁹ trumpit binka ba bara Gâd mita witin nani ra aisi kan bîla baikra ba sin walras katma. Baha bîla baikra wali nani ba makaban, kau witin nani ra aisabia apia.

²⁰ Baha aisi ba lika, adar kum yaban kan bara naku wi ba sip wirhika twilki kan nani ba mita: “Daiwan kum pan il ba kangbia kaka, walpa ni sabi ikan kaia sa, apia kaka langsa ni.”

²¹ Diara kaikan ba ban sibrinkira kata, bara Moses pali naku aisisata: “Yang sibrin mita tatatwisna.”

²² Sakuna, man nani lika Saion ilka ra bara Gâd rayakira tawanka ba lama kat sin balram sa, tânka ba lika, kasbrika purara Jerusalemka ra, bahara insal nani tausin ailal ba ra sin.

²³ Man nani ba Gâd luhpia tawahkia nani asla aidrubanka liliakira lamara balram sa, witinka nani nina nani kasbrika purara ulban ba. Man nani ba Gâd lamara balram sa, witinka upla sut Lâka Dadaukra ba, bara upla yamni nani Gâd mita kasakkira nani daukan ba lamara sin.

²⁴ Man nani lika Jisas lamara balram sa, witinka ba lâ raya daukan ba hilpka witin aimaki ba; witin ai tâlia laiki srikban ba ra sin, baha mita Abel tâlia ba purkara kau diara pain nani wan aisi ba.

²⁵ Baha mita, aman kaiki bas, bara witinka wan aisi ba ra walaia apia lika wipara. Baha nani ba witinka naha tasba ra Gâd dahra aisi kan ba ra walaia apia win ba, swak takras kata; baku bamna, yawan pali lika kau swak takbia apia, witinka kasbrika purara wina wan smalki wan aisi bara wan nina laki tris tawbia kaka.

²⁶ Baha piua ra, Gâd bîla baikra ba mita tasba na yan nikwan; sakuna nanara witin naku wisa: “Kau aima kumi tasba na munrika nikbia, bara tasba na baman apia, sakuna kasbrika purara ba sin.”

²⁷ “Kau aima kumi” bîla nani tânka ba lika latan wisa, Gâd mita paskan dukia nikwi nani ba brih sakan kabia, bara diara nani sip nikras ba ban bâra kabia.

²⁸ Gâd king aimaki lâka wanki ba lika sip nikbras sa. Baku bamna, kaisa yawan tingki wiaia, bara Gâd ra wan pura suni mayunaia witin brin dauki natka ba kat, wan sulka mayunra ni bara kulkanka ba ni sin;

²⁹ kan wan Gâdka ba lika pauta lakni diara angki sauhki tiki ba baku sa.