Hibru Nani 10 - DAWAN BÎLA AISKA

¹ Moses lâka ba lika, diara yamni nani naika balaia ba distika baman kan, ai lilka aihwa pali lika apia. Baku bamna, lâ ba ban kaia ra upla nani baha sakripaiska nani dauki bâk, Gâd lamara wi banhwi ba sip kasakkira nani daukras sa, baha sakripaiska nani mani bani dauki ba.

² Bamna lâ ba mita baha nani ra kasak aihwa pali daukaia sip kan kaka, sakripais nani dauki yabi ba mahka swiaia kan; kan sakripais nani dauki yabi uplika nani ba, ai saurka nani wina pat klin daukan sa kaka, witin nani kli saura daukaia luki kaia apia kan.

³ Sakuna kau ni, naha sakripais nani mita mani bani yan ai saurka nani ba ai kupia kraukisa,

⁴ kan bîp wainhka nani bara guts lupia nani tâlia ba, upla saurka nani sip brih sakras pali sa.

⁵ Baha mita, Kraist ba naha tasba ra aula kan ba ra, witin bui Gâd ra wisata: “Man ba daiwan nani iki sakripaiska bara prisantka ba sin brin mai daukras sa, sakuna yang dukira wîna tara kum ridi daukram sa.

⁶ Daiwan nani aiska pali altar ra angkan prisantka nani ba, saurka ba brih sakaia dukiara sakripaiska nani ba sin, man baha ba yamni kaikras katma.

⁷ Bara yang bili: ‘Gâd, yang nâra sni, man kupiam lâka ba kat daukaia, yang dukira lâ wauhkataya ra ulban ba baku.’ ”

⁸ Pas pali wisa, Gâd ba daiwan iki sakripaiska bara prisantka ba, daiwan nani altar ra angki upla saurka brih sakaia dukiara sakripais dauki yabi ba sin, witin brin daukras bara yamni sin kaikras sa. Naha dukia nani na lâ bîla ba kat daukan kan sakuna, witin baku aisin.

⁹ Baha ningkara witin wisa: “Gâd, yang nâra sni, man kupiam lâka ba kat daukaia.” Baku Gâd mita sakripaiska nani ba brih saki, baha watlika ra sakripais wala ni mangkisa.

¹⁰ Jisas Kraist ba Gâd kupia lâka kat dauki, aima kumi baman ai wîna tara ba sakripais dauki yaban; baha ba aitani sa ban kaia ra; baku daukan bamna, Gâd yawan na saura lâka ba wina klin wan daukan sa.

¹¹ Ju prîska nani bahara bûi yu bani prîs warkka ba daukisa, bara sin sakripaiska nani ba aima manis yabisa. Sakuna sakripaiska nani na mita saurka nani ba sip brih sakras kan.

¹² Ban sakuna, Jisas Kraist ba wan saurka nani sakaia dukiara sakripais kumi dauki yan, baha ba ban kaia ra aitani sa, bara baha ningkara Gâd lama pali kat wih iwan.

¹³ Nanara witin bahara bîla kaikisa, Gâd mita ai waihla nani ba ai mina munhtara mangkbia ba kat.

¹⁴ Bamna sakripais kumi ni baman, baha uplika nani saurka wina klin daukan ba, witin mita ban kaia ra kasak aihwa daukan.

¹⁵ Bara Spirit Holikira sin baha dukiara witnis aisisa. Pas pali witin wisa:

¹⁶ “Baha yua nani ningkara witin nani wal lâ daukamna ba, naku kabia wisa, Dawan bila: Yang lâika nani ba witin nani kupia ra mangkamna, bara ai lukanka nani bilara baha nani ba ulbamna.”

¹⁷ Bara baha ningkara wisa: “Witin nani saurka nani bara watawanka nani ra sin yang kli lukamna apia.”

¹⁸ Baku bamna, saurka nani ba pat swih tikan sa kaka, saurka dukiara kau prisant nani yabaia want apia sa.

Yawan ba Gâd lamara waia sa

¹⁹ Baha mita, muihki nani, Jisas Kraist pruanka ba mita, yawan nanara pri pali Dawan wal aisaia watla ba ra dimi waia sip sa, Jisas Kraist tâlia ba mita.

²⁰ Witin mita tempel kwalka paman bâk, yawan ra yabal kum rayakira param saki wankan sa, baha tânka ba lika, ai wîna tara ba bâk.

²¹ Jisas sika wan prîska tara, Gâd watla tâura aimaki ba.

²² Baha mita, kaisa yawan wan kupia tânka kunin âpu bara kasak lukan lâka sin kasak pali brih, Gâd lamara waia; kan witin mita wan kupia nani ba klin daukan sa, yawan ba saurka dukiara pâtkira banhwisa lukbia apia dukiara, bara wan wîna tara nani ba lî tâski âpu ni sikban sa.

²³ Yawan lika Gâd pliki lâka mita, wan kainara diara briaia bîla kaiki ba aihka lakras pali ban alki bri kap, kan Gâd ba yawan ra pramis daukan ba kat witin daukbia.

²⁴ Bara yawan pana pana wan walka nani ra hilp munaia trai kaikaia sa, latwan lâka bri kaia bara diara yamni nani sin dauki kaia.

²⁵ Yawan asla aidrubi lâka dauki ba swiaia apia sa, upla tila nani dauki ba baku. Baku daukaia watlika ra, yawan pana pana wan walka nani aikuki wan tâ baikaia sa, bara kau pali nanara Dawan yua ba pat baila kan kaiki ba.

²⁶ Kan yawan kasak lâka tânka ba kakaira si, wan kupia wina kaiki saura daukisa kaka, wan saurka nani dukiara kli sakripais wala âpu sa.

²⁷ Yawan diara wala âpu sa, lâ daukan sibrinkira pali ba bîla kaikaia baman, bara pauta klauhan laptikira ba, Gâd waihla nani angki tikaia ba sin.

²⁸ Upla kum Moses lâka ba bîla lulkuya, bara witnis wâl, apia kaka yumhpa witin mapara sa kaka, umpira kaikras pali uplika ba prura pâtka ra mangkisa.

²⁹ Bamna, Gâd Luhpia ra ai mina ni taibi uplika ba, bara tâlia ra bahki kulki ba, bara kupia yamni Spiritka ra sin saura muni ba mapara, ¿nahki kabia ki? ¡Man nani luki kaiks nahki witin ba kau klala saura pali briaia ba! Kan baha tâlia mita sika lâ daukan ba karna saki ba, bara baha ni sin uplika ba holikira daukan sa.

³⁰ Yawan kaikisa Dawan ba naku aisan: “Upla ra klala yaia ba yang mihti ra sa; yang mita sika aibapamna ba.” Bara naku sin aisisata: “Dawan ba ai uplika nani lâka daukbia.”

³¹ ¡Gâd rayakira ba mihta ra kauhaia lika diara saura pali sa!

³² Patitara piua ra man nani ra dîa dîa takan ba, kupiam krauki bas. Baha yua nani ra Gâd ingnika ba, man nani puramra ingwan ningkara, aiklabanka tara kum pâtka nani wahwi, ban bapi buram.

³³ Man nani tilam wina tila nani upla sut mawanra saura mai wih, saura sin mai munan, bara piu wala nani ra lika man nani ba upla wala nani nahmuna trabilka nani bri kan ba aikuki asla brih wahwaia ridi katma.

³⁴ Man nani silak watla ra nani kan ba ra umpira kaikram, bara dukiam nani mihtam dakbi kan ba ra sin liliakira kiki kapram, kan kaiki kapram man nani ba kasbrika purara diara kau pain kum brisma, bara baha ba ban kaia ra bâra ban sa.

³⁵ Baku bamna, lukankam brisma ba tikpara, baha mana tara kum maikbia bamna.

³⁶ Man nani ba wihka bîla kaikaia lâka want sma, bara baku mika sip kama Gâd kupia lâka ba kat dauki, witin mita dîa pramis daukan ba briaia.

³⁷ Kan Ulbanka ba wisa: “Kau piu wiria lupia baman, witinka balaia ba pat balbia; witin kau sin takaskbia apia.

³⁸ Sakuna yang upliki kasakkira ba lika, kasak luki raya iwi kabia, sakuna witin ai ninara tawbia kaka, witin dukiara lilia kamna apia.”

³⁹ Yawan lika ai ninara tawan bara sauhki tiki ba uplika nani apia sa. Sakuna, yawan na kasak lukan lâka brisa bara swaki sin wan sakan sa.