Hageo 1 - DAWAN BÎLA AISKA

Kupia krauki smalkanka tempel ba kli mâkaia dukiara

¹ Darío mani wâl Persia kingka kan piua ra, kati matlalkahbi, lapta yu kum aimakan ra, Dawan ai prapitka Hageo bâk aisin ai bîla dahra ba; Zorobabel, Salatiel luhpia waitna, Juda tasbaya ra wihta tara aimaki kan ba ra wiaia, prîs tara Jasua, Josadac luhpia ra sin wibia dukiara.

² Karnika sut bri ba Dawanka, prapit Hageo ra naku aisin: “Naha uplika nani na aisisa: Nanara yang, Dawan tempelka ba kli mâkaia piua apia sa.”

³ Bahamna Dawan ba, Hageo bâk naha bîla nani baha witin nani ra aisin:

⁴ “¿Bara dîa man nani baman lika utla pranakira ra dimaia piua brisma, bara yang tempelki ba lika kli paskaia piua kau aimakras ba tâka, sauhki tikan ra ban kaia?

⁵ Karnika sut alki brisna Dawanka ba, yang mai wisna: ¡Man nani daukankam ba laki pain kaiks!

⁶ Saumuk ailal tasba ra mangkisma, sakuna mâ wiria man dâkisma; plun pisma, sakuna aitani pisma baku damra walras sma; diara laya disma, sakuna diran mai dauki ban sma; kwala dimisma, sakuna kauhla mai dauki ba ban sma; lal mana wark taki uplika ba, ai warkka mana ba lalah watla kalwan ra auhbi baku sa.

⁷ Karnika sut alki brisna Dawanka, yang mai wisna: Man nani dîa daukisma ba pain pali luki bas.

⁸ Man nani il nani tilara was, baha wina dus nani klaki bri bal, bara tempel ba kli raya mâki banhs, yang bahara âiyapah taki bâra yang praina ba mamrikamni.

⁹ Man nani diara ailal briaia plikisma, sakuna wiria lupia man sakisma; dîa wamtla ra suni brisma ba, baha sin yang bal puhbanki kumi ni sakisni. ¿Dîa muni? Kan yang waitla slingban ba, paskras ban aisawan ra ba mita; man nani wamtla mâki briaia dukiara baman trabil takisma. Yang, Dawan, kasak aisisna.

¹⁰ Baha mita, man nani tasbayam ra lî auhras, tasba sin mâ nani maikras.

¹¹ Yang mita sika tasbayam ra, il nani purara, insla nani purara, wain nasla nani, oliv dusa nani purara, tasba wina diara pâwi taki nani ba sut purara, upla nani purara, daiwan nani purara, bara upla ai mihta warkka nani dauki ba purara lî auhaia ba takaskri.”

¹² Zorobabel, Jasua, uplika wala nani sut sin, prapit Hageo Dawan bîla dahra aisin ba walan, bara witin nani sibrin daukan, baku aisaia sika Dawan Gâd bui witin ra win ba.

¹³ Hageo, Dawan bîla dahra aisasara ba, Gâd nina ra witin nani ra aisin: “Yang, Dawan, kasak aisisna: Yang lika man nani wal sna.’ ”

^14-15 Dawan baha bîla aisin ba wal, Zorobabel, Juda wihtka tara ba, Jasua prîs nani wihtka ba sin, bara upla nani sut ba, kati matlalkahbi, yua 24 aimakan ra, Darío pat mani wâl king aimaki kan ba ra, witin nani mahka buan ai Gâdka, karnika sut alki bri ba Dawanka, tempelka ba kli paskaia.