Esdras 7 - DAWAN BÎLA AISKA

Esdras ai pânika nani aikuki Jerusalem ra wan ba

¹ Mani nani luan ba ningkara, Persia kingka Artajerjes king aimaki kan yua nani ra, waitna kumi bâra kan ai nina Esdras, witin sika naha uplika nani kiamka wina kan: Seraías, Azarías, Hilquías,

² Salum, Sadoc, Ahitub,

³ Amarías, Azarías, Meraiot,

⁴ Zeraías, Uzí, Buquí,

⁵ Abisúa, Finees, Eleazar bara Eran, prîs pas pali takan ba.

⁶ Dawan, Israel Gâdka Moses ra lâ yan smalkan lâka ba, Esdras ba kakaira pali kan, baha smasmalkrika ba Dawan wina karnika yabi kan, baha mita witin diara nani king Artajerjes ra makaban ba sut yan. Baku natka ra Esdras ba Babilon wina kli tawi balan

⁷ Jerusalem ra Israel luhpia nani dakni kum wal, baha nani tilara kan prîs nani, Libait nani, aiwawanra nani, tempel durka main kakaira nani, bara tempel ra wark taki nani ba sut aikuki balan. Baha piua ra, witin king Artajerjes ba pat king aimakan wina 7 mani bri kata.

^8-9 Esdras Dawan yamnika nani brin ba hilpka wal, witin mahka buan Babilon wina takaia, Artajerjes ba pat 7 mani king aimaki kan ba manka ra, kati pas yu ingwanka pas ra witin impakan. Bara kati matsip, yua pas ba, witin nani Jerusalem ra wih diman baha sim manka ba ra.

¹⁰ Esdras ba ai kupia aiska kira pali Dawan lâka ba laki kaiki, lâka tânka nani ba briaia plikan, Dawan lâka ba yaka upla sut daukaia, bara Israel luhpia nani ra sin ai lâka nani ba smalkaia, baku sin lâ wala ulban nani ba.

¹¹ Naha sika wauhkataya ulbanka kan ba wina, wala sim sât ulbanka kum, king Artajerjes wina prîs Esdras ra yaban ba; witin ba âiulbra kan, bara Dawan lâka nani sut Israel ra ulbi yaban lâka nani ba daukaia tânka ba sin brabrira pali kan:

¹² “King Artajerjes bui Esdras ra lakula daukisa, prîs smasmalkra Gâd kasbrika purara bâra ba lâka kakaira ba.

¹³ “Yang adarki maikisna Israel luhpia nani sut yang lâika ra naha tasbaya ra iwi nani ba, witin nani man wal Jerusalem ra waia luki ba, sip sa waia, Libait, apia kaka prîs nani kabia sin.

¹⁴ Kan king bara witin ra lâ mariki uplika nani 7 ba wina mai blikisa, Juda bara Jerusalem ra sin wama, Gâdkam lâka mihtam ra brisma ba tânka kat, baha nani ai tânka ba laki kaikaia.

¹⁵ Bara king ai uplika nani aikuki, gul bara silbar nani Israel Gâdka ra ai prisantka yaban ba sin brih was, witin ai tempelka ba Jerusalem ra sa,

¹⁶ bamna gul bara silbar Babilon tasbaya aiska wina briaia sip sma ba sin sut bris, bara upla nani prisant maikbia ba, prîs nani maikbia prisantka ba sin brima, baha purara praki Jerusalem ra brih wama Gâd watla ba dukiara.

¹⁷ Bara baha lalahka ba ni, tânkira man nani atkma, bîp wainhka nani, sîp wainhka bara mairin nani, baku sin plun bara wain nani sin atkma; baha dukia nani atkuma ba tempel altarka pura ba ra suni angkaia, Jerusalem ra man nani Gâdkam ra mayunra yabaia dukiara.

¹⁸ Bamna gulka bara silbarka yus munbia tâka ba lika, man nani muihkam aikuki dîa daukaia lukma ba dauks, man nani Gâdkam lâka kat.

¹⁹ Sakuna Gâd tempelka bilara wark daukaia watlika nani maikan ba lika, man bui Jerusalem Gâdka mihta kat bri si yas.

²⁰ “Bara dîa dîa kra kum Gâd tempelka ba dukiara daukaia kaka, king lalahka ba wina briaia sip kama.

²¹ Bara yang, king Artajerjes, adarki yabisna king lalahka main kaiki nani sut ra, Éufrates awala muna tani ra ba, prîs Esdras Gâd lâka smasmalkra kakaira ba, dîa witin makabia kaka alki takaskras mahka pali yabia.

²² Sip sa yaia silbar 3,500 paun, plawar batil 22,000, wain laya batil 2,200, batana laya batil 2,200, bara sâl lika nahki praiska briaia wibia kaka sut yabia.

²³ “Diara sut kasbrika purara iwi Gâdka ba, ai tempelka paskaia dukiara makabia ba isti pali yabia, baku daukbia ba ra, king tasbaya aiska ra bara ai luhpia nani purara sin klala blîkbiara sîa.

²⁴ Baku sin man nani nu kaia sma, naha dukia ba daukaia apia sma ba: prîs nani, Libait nani, aiwawanra nani, dur ra aihwawakra nani, bara tempel ra wark taki uplika nani sut sma ba, man nani lal mana bripara, diara lal mana sin sâkpara.

²⁵ “Bara man, Esdras, Gâdkam ai sinska lâka dîa man ra maikan ba kat, tawan ra wihta sirpi nani bara wihta tara nani sin mangks, sins lâka wal Éufrates awala muna tani ra upla nani ba sut pura kaiki kabia, baha nani sut man Gâdkam lâka kakaira nani ba, bara tânka briras nani ba sin sut man bui witin nani ra smalki mariks.

²⁶ Bara ani uplika man Gâdkam lâka ba bara king lâika ba sin wali daukras kabia kaka, witin nani ai lâka ba mahka daukan kabia, ikaia sapa, tasbaya wina kangbi sakaia, ai lal mana kulkaia silak ra mangkaia, dîa witin nani ra daukaia ba daukbia.”

Esdras pura sunra ba

²⁷ Bamna Esdras naku ai pura sunan: “Dawan ba yamni pali kabia, wan aisika nani Gâdka ba, witin mita king kupia ra mangkan, Dawan watla Jerusalem ra ba pain kulkaia.

²⁸ Bara Dawan bui ai kupia swapnika lâka ba yang ra sin mairikan king ba mawanra, bara ai uplika lâ mariki nani mawanra, lâ dauki uplika tara wala nani mawanra sin, bara kupi lukra bukan karnika sin aikan. Dawanki hilpka karnika ba yang purira kan, baha hilpka wal yang sip katna, Israel luhpia nani kau kulkanka bri nani ba asla daukaia, yang wal balbia dukiara.”