Esdras 3 - DAWAN BÎLA AISKA

Dawan ra mayunaia warkka ba kli bukan

¹ Israel luhpia nani ba pat kati 7 alkan ba ra, ai pliska nani bani ra ai watla nani mâki iwi banhwi kan, bara upla nani ba aidrubi Jerusalem ra asla taki banhwan.

² Bara Jasua, Josadac luhpia ba, ai pânika prîs nani ba aikuki, baku sin Zorobabel, Salatiel luhpia ba, ai muihni aikuki, witin nani buan Israel Gâdka altarka ba paskaia, daiwan iki baha purara aiska angki Gâd ra yabaia dukiara, Moses, Gâd waitnika, ai wauhkataya ra ulban ba baku, witin nani daukan.

³ Altar playka ba karna pali bapan, upla nani baha tasbaya ra iwi ba sibrinka bri kan ba mita. Bamna titan bara tutni bani, daiwan iki aiska angki Dawan ra pain kulki yabi kan.

⁴ Baku sin Utla Papakni liliaka ba daukan, lâ ra ulbanka ba kat, yua bani sakripais dauki kan ai natka ba kat, daiwan iki aiska angki yabi kan, yu kum ra nahki yabaia kan ba kat,

⁵ baku sin yu bani sakripaiska angki dauki kan ba, baku sin kati raya sakripaiska nani Dawan ra mayunaia liliaka holi nani ba, upla sut ai kupia lâka kat Dawan ra prisantka nani yabi kan.

⁶ Kati 7 aimakan yua pas ba wina, daiwan iki aiska angki Dawan ra yaban, Dawan tempelka ba kli paskaia kau tâ krikras kan ba ra.

⁷ Walpa bara dus ni utla mâmakra nani ra lalah yaban, bara plun, wain bara batana laya nani Tiro bara Sidón uplika nani ra yaban, Líbano wina kabuk yalam tatka nani ba Jope kat bri balaia dukiara, Persia kingka Ciro adarka baku daukbia win kan ba kat dauki banhwi kan.

Tempel watla paskanka ba tâ krikisa

⁸ Zorobabel, Salatiel luhpia waitna ba, bara Jasua, Josadac luhpia waitna, witin nani ai pânika prîs nani wal asla ba ra, Libait nani ba aikuki, baku sin kangbi sakan kan kli tawi balan uplika nani sut kira asla pali, mahka kli tempel ba paskaia warkka tâ krikan, naha lika kli Jerusalem ra balan piua wina mani wâl pura kati wâl ra tâ krikan, bara Libait nani 20 mani bri ba wina ai purara uplika nani ba mihta ra mangkan, Gâd tempelka mâkaia warkka ba.

⁹ Bara Jasua, ai luhpia nani aikuki, ai muihni nani sin, Cadmiel luhpia nani aikuki asla kumi takan witin nani ba Juda kiamka sa bamna, bara Henadad muihka nani, luhpia bara kiamka nani sut taki banhwan ba aikuki, tempel ra wark dauki nani ba tâ briaia dukiara ridi takan kata.

¹⁰ Bara tempel mâmakra nani ba mahka Dawan watla playka nani bapi kan yua ba, prîs nani ai prâka diman, bara lamara bûi kan bara trumpit nani sin puhban. Bara Asaf kiamka Libait nani ba lika bin daukaia pânka tara nani ba bri kan Dawan ra mayunaia dukiara, Israel kingka Debit dîa win ba kat daukaia.

¹¹ Upla tila nani Dawan ra aiwani mayuni kan, bara wala nani lika wini aisi kan: “Dawan ra tingki wis, kan witin ba yamnikira pali sa, witin lika Israel dukiara ai kupia swapnika ba ban kaia ra ban sa bamna.” Bara upla nani sut ba Dawan ra wini ai kupia aiska ni mayuni kan, Dawan watla playka nani ba bapi kan ba liliaka.

¹² Bara prîs nani, Libait nani bara utla lalka nani manis pat almuk nani ba, witin nani tempel almuk ba kakaira kan, baha mita ai bîla baikra tara saki ini banhwi kata, kan witin nani kaikisa tempel ba kli raya mâkuya ba dukiara; sakuna wala nani lika lilia mita ai pura wini banhwi kan.

¹³ Ba mita upla nani na inisa sapa, apia kaka lilia mita ai pura winisa sapa sip tânka briras kan, kan baha binka ba laih wina walaia sip kan.