Emus 5 - DAWAN BÎLA AISKA

Dawan ra kli tawi balaia paiwanka

¹ Israel luhpia nani, bîli nani na wals; man nani mampara sarikira inisna ba wali banhs.

² Israel, kasak bara painkira ba kauhan sa; kauhan sa, kli buaia dukiara. Ai tasbaya pura kat prawisa, bara upla sin âpu sa baha wina bukaia.

³ Israel luhpia nani ra Dawan naku aisisa: “Tawan kum wina upla 1,000 war aiklabaia wabia kaka, 100 baman kli ai watla ra balbia; bara upla 100 kum taki wabia kaka, upla matawalsip baman kli ai watla ra tawi balbia.”

⁴ Israel luhpia nani ra, Dawan naku aisisa: “Man nani, yang ra bal, bara raya kama.

⁵ Man nani Betel ra wapara, Guilgal ra sin apia, Beerseba bâk sin lui wapara, kan Guilgal uplika nani ba priski tasba wala ra brih wabia, bara Betel tawanka ba slingban kabia.’’

⁶ Dawan ra pliks, bara man nani raya kama; natka wala ra kaka, witin mita pauta klauhan blîkbia Israel luhpia nani purara, bara Betel ra upla âpu kabia naha daskaia.

⁷ ¡Alai kama man nani lâ wapni ba, tahpla pali daukisma, bara kasakka lâka daukaia ba tasba kat batakisma!

^8-9 Slilma nani daknika: Pupu, Kiswa paskan Dawanka ba, witin mita sika tihmia ba ingni ra laki ba, bara kakna ba tihmia tara dauki ba sin; witin mita sika, kabu laya nani ba paiwisa bara tasba purara laikisa. Diara karna nani purara sauhki tikanka nani blikisa, bara yan wisa kan kahbaika pliska ba purara. Dawan, baha sika witin ai nina ba.

¹⁰ Tawan dimaika nani kat, man nani ra lâ tânka mai smalki uplika nani ra misbara kaikisma ba, bara upla kasak nani ra misbara kaikisma ba.

¹¹ Man nani mita upla umpira nani ba bahki kulki lawaska kikisma, bara lal mana tara kulkisma, plawar ni mai aibapaia dukiara, man nani ban iwi kama apia, baha wamtla nani walpa ni mâki brisma ba ra; wain nasla nani dauki mangkram pain pâwisa, sakuna baha wainka laya wina sin dima apia.

¹² Yang kakaira sna, man watawankam nani ailal, bara saurkam ban dauki auma ba. Upla kasak nani ra taibi munisma kunin lâka ba brih, bara lâ daukaia pliska ra umpira nani ra raitka yaras munisma.

¹³ Baha mita sins brih uplika nani ba diara aisaras sâp takisa, kan piua ba saura sa bamna.

¹⁴ Yamni ba dauki kaia pliki bas, saura dauki kaia lika apia, bara man nani raya kama. Bara baku lika aisisma ba kasak kabia: Karnika sut pali brih Dawanka ba, man nani wal kabia.

¹⁵ ¡Diara saura daukaia ba, man nani misbara kaiki bas! ¡Bara diara yamni daukaia ba latwan kaiks! Aman kaiks lâ pliska nani ra lâ kasak ba daukbia, baku daukma ban kra karnika sut pali brih Dawanka ba, Israel luhpia nani kau bâra ba, ban umpira kaiki bâra swibia.

¹⁶ Dawan karnika sut pali bri ba naku aisisa: “Asla takaia pliska nani sut ra, yahwi inanka bâra kabia; yabal nani sut ra sari pali ai pura wini ini kabia; insla dadaukra nani ra sin paiwbia, witin nani ai tilara bal inaia wibia, upla wala nani ra sin mana aibapi kabia, witin nani ai pura mata inbia dukiara.

¹⁷ Wain nasla bani ra sin upla nani ai pura mata ini kabia, ani piua ra yang klala maikaia balamna yua ra.” Dawan baku aisisa.

¹⁸ ¡Sarkam pali ai daukisa, man nani Dawan yua balka kaikan pali mai dauki ba! ¿Tânka brisma ki baha yua ra man nani ra dîa takaia ba? Baha yua ra yu ingnika ba lika lap tiwbia, tihmia tara baman kabia.

¹⁹ Upla kum layan kaiki sîa plapi kan, bara wingku tara wal prak prawaia ba baku kabia; upla kum ai watla ra dimi, ai mihta ni utla tnaya ra prakan ba ra, baha wina piuta taki ai mihta kat samuya ba baku kabia.

²⁰ Dawan yua ba ingni âpu, tihmia tara pali baman kabia; wan nakra baikan baku kabia, ingni kumi pan kaikras.

²¹ “Man nani aidrubanka tara dauki, mayunra priaska nani daukisma ba sut misbara kaikisna, saura pali kaikisna man nani asla taki banhwisma ba.

²² Man nani daiwan iki wîna aiska angki, prisantkam nani dauki aikisma ba, kupia kumi lâka ai daukaia dukiara. Yang baha brin ai daukras. Daiwan batanira batanka nani saki angki, kli wal kupia kumi takaia prisantka nani dauki aikisma ba sin brin ai daukras.

²³ ¡Man nani, yang maiyunaia lawana aiwanisma ba aiwanpara! ¡Arp kangbi aiwani bin daukisma ba sin walan ai daukras!

²⁴ Lâ wapni dauki kaia lâka ba yarka lî laiwi baku kabia; kasakka lâka ba awala laya sip lâwras ba baku kabia.

²⁵ “Israel luhpia nani: 40 mani bilara upla iwras tasbaya yabalka ra man nani tâm briri wapi katma ba ra, ¿wîna angkan prisantka, bara prisant wala nani sin dauki angki aiki katma ki?

²⁶ Man nani kingkam Sicut bara ai slilmika Quiiún mihtam ni paskram ba gâd bahki nani lilka ba, nanara bahara puram sunaia man nani baha ba ban twilki kaia sma.

²⁷ Baha tâwan, yang daukamna man nani mai priski mai alki, Damaskus kainara kau laihura mai brih wabia alba mai briaia.” Baku aisisa karnika sut pali bri ba Dawanka, baha sika witin ai nina ba.