Blasi Sturka 4 - DAWAN BÎLA AISKA

Ken Abel wal

¹ Bara upla ba ai maya tânka kaikan, mairin ba kwihra tiwan bara ai luhpia Ken baikan, bara win: “Dawan kupia lâka ba mita yang luhpi waitna kum briri.”

² Baha ningkara ai muihnika Abel baikan. Bara Abel lika sîp nani sahwi kan, Ken ba lika insla dadaukra takan.

³ Bara baku takan piua nani impaki kan ba ra, Ken tasba mâ nani ba wina ai prisantka kumi Dawan ra bri balan,

⁴ bara Abel sin baku ai prisantka bri balan, sîp nani tawahkia ba wina kau batana nani ba. Bara Dawan bui Abel prisantka ba kanra yamni kaikan,

⁵ sakuna Ken prisantka ra witin yamni kaikras kan. Bara Ken kupia baiwan pali takan, bara ai mawan sin sât aihka pali takan.

⁶ Bara Dawan bila Ken ra win: “¿Dîa tâwan man ban baku pali kupiam baikisma, dîa muni mamwan aihka takan ba?

⁷ Yamni daukram kaka, man purara mai bukan kaia kan. Sakuna man yamni daukras kapram bamna, saurka ba durkam kat bâra sa. Saura lâka ba puram luaia munisa, ban sakuna man mita baha ba sip muni pura luaia sma.”

⁸ Yu kum Ken ai muihni Abel ra win: “Kaisa yawan impaki waia.” Bara baku takan. Witin nani twi ra kan ba ra, Ken ai muihni Abel mapara buan, bara ai muihni ba ikan.

⁹ Bara Dawan bila Ken ra win: —¿Muihkam Abel ba anira sa? Bara witin pana win: —Yang kaikras, ¿dîa yang na muihki aihwaki kakairika sna ki?

¹⁰ Bara Dawan bui witin ra win: —¿Man dîa daukram? ¡Tasba wina man muihkam tâlia bîla baikra ba, yang ra ai winisa!

¹¹ Baha mita, lamhtubi tasba wina mai saki mai lulkan kabia, man muihkam ikram tâlia tasba ba din bamna.

¹² Man tasba ra insla daukma sin, witin ai karnika kli maikbia apia. Man plis kum ra sin iwaikam âpu, ban tringsar baku tasba ra yukuwi plapi baman watauki kama.

¹³ Bara Ken Dawan ra win: —Yang klailka na tara pali sa, yang twilkaia praiski kat apia sa, puri luan sa.

¹⁴ Kaiks nâra man naiwa tasba wina saki ai lulkram sa, bamna man lama wina sin. Yang yukuwamna, bara tasba ra tringsar ban yukuwi laihura baman watauki kamna, bara ya yang ra ai sâkbia ba ai ikbia.

¹⁵ Sakuna Dawan pana witin ra win: —Kasak pali, ya mita kra Ken, mai ikbia sa kaka, aima 7 witin ra pana munan kabia. Bara Dawan mita Ken ra tukin kum mangkan, ya kabia witin wal prawbia ba, witin ra ikaia apia ba tukinka.

¹⁶ Bamna baku, Ken Dawan mawan wina taki wan, bara witin Nod tasbaya ra wih iwan, Eden lalmika ra.

Ken kiamka nani

¹⁷ Bara Ken ai maya ba tânka kaikan, witin kwihra tiwan, bara ai luhpia Henoc baikan. Baku witin tawan kum paskan, bara tawanka nina ba ai luhpia nina wal mâkan, Henoc.

¹⁸ Bara Henoc luhpia aisubi takan ba Irad, bara Irad Mehujael baikan, bara Mehujael Metusael baikan, bara Metusael Lámec baikan.

¹⁹ Bara Lámec witin ai maya wâl brin, kumi ba nina Adá, wala ba nina Silá.

²⁰ Bara Adá bui Jabal baikan, witin sika twilki taukaia watla nani ra iwi kan bara daiwan nani sahwi ba aisika takan.

²¹ Bara ai muihni nina Jubal mâkan, witin sika baha nani sut arp kangbi bara bra puhbi nani ba aisika takan.

²² Bara Silá sin Tubal-caín baikan, bara witin lika bras bara ayan nani wina diara sut papaskra takan. Bara Tubal-caín lakrika nina ba Naamá mâkan.

²³ Yu kum Lámec ai maya nani Adá bara Silá ra win: “Man nani, yang aisisna na pain wals, yang waitna kum ikri, ai klakan ba tâwan, bara wahma kum sin ikri, ai prukan ba tâwan.

²⁴ Bamna Ken tâwan aima 7 pana munaia kan ba, kasak pali, ya Lámec ra ikbia ba lika kau aima 77 taim pana tawi munbia.”

Set Enós wal

²⁵ Bara Adam kli ai maya ba tânka kaikan bara witin ai luhpia waitna kum baikan, bara ai nina Set mâkata. Kan yaptika aisin: “Gâd wina luhpi waitna wala aikan Abel watlika ra, Ken mita witin ra ikata ba.”

²⁶ Bara Set luhpa kum baikan, ai nina ba Enós mâkan. Bara upla nani ba mahka Dawan ra ai pura sunaia lâka ba tâ krikan.