Blasi Sturka 38 - DAWAN BÎLA AISKA

Juda bara Tamar sturka

¹ Baha piua ra Juda ai muihni nani tila wina aihka dakwi taki, Adulam tawanka ra waitna kum nina Hirá, baha waitnika watla ra wih dimi bahara iwan.

² Bahara witin tiara kum wal kakaira takan, aisika nina Súa, Kena uplika kan. Witin tiara ba wal ai maya takan. Witin wal asla takan,

³ bara tiara ba kwihra tiwan; ai luhpia waitna kum baikan, bara ai luhpia ba nina Er mâkan.

⁴ Mairin ba kli kwihra tiwan bara ai luhpia waitna wala baikan, bara baha nina Onán mâkan.

⁵ Bara mairin ba kli kwihra tiwan bara ai luhpia waitna wala baikan, bamna baha nina Selá mâkan. Juda ba Quezib tawanka ra tauki kan ba piua ra, tukta ba aisubi takan.

⁶ Juda ai tawahkia Er ba, mairin kum nina Tamar, baha wal maya baikan.

⁷ Sakuna Er rayaka tânka ba Dawan mawanra saura kan. Dawan bui witin ra yamni kaikras kan, bamna ai rayaka ba tasba wina sakan.

⁸ Bara Juda ai luhpia waitna Onán ra win: —Man mamsaya piarka ba wal mayam bris, muihkam pruan man raitkam brisma ba baku, bara baku man muihkam sin ai kiamka ba man wina bribia.

⁹ Sakuna Onán ai dara wali kan, witin ai luhpia nani Tamar wal baikbia ba, witin ai luhpia nani baku pali kulkan kabia apia ba. Baha mita, aima bani witin ai piarkika ba wal yapuya ba ra saki laiki kan, mairin ba kwihra tiwaia apia ba dukiara, bara baku ai muihni pruan ba, witin ai luhpia baiki ba ni ai kiamka saki bribia apia dukiara.

¹⁰ Onán baha dauki kan ba dukiara, Dawan ba kasak ai kupia sauhkan, bamna Onán rayaka ba sin klakan.

¹¹ Bara Juda ai mula yapti Tamar ra naku win: —Man piarka ban bas bara aisikam watla ra bâra bas, yang luhpi Selá pâwi waitna takbia ba kat. Sakuna Juda baha aisin bara witin ai kupia ra sibrin luki kan, ban kra ai luhpia Selá sin muihnika nani pruan ba baku prubia kra wisi. Bara baku, Tamar ba ai aisika watla ra blikan wan bâra iwi kan.

¹² Piua nani luan ba tilara Juda maya, Súa luhpia mairin ba pruan. Juda ai sarka tara brih luan ba ningkara, Timnat tawanka ra wan. Bahara witin ai sîpka nani bri kan ba ra, ai pânika Hirá, Adulam wina ba sin aikuki wan. Sîp taya irbaia uplika nani ba bâra kan.

¹³ Tamar walan ai dapna ba Timnat ra aula ai sîpka nani taya irbaia.

¹⁴ Bara witin piarka takan prâka dimi kan ba daikan, bara kwala wala tara kum brih, ai lal pura bikan upla ai mawan kaikbia apia dukiara. Bara yabal ra taki wih, Enaim tawanka ra dimaia yabalka tâ ba kat wih iwi kan, upla aula ba bahak bal lui Timnat ra waia yabalka tâura. Tamar baku daukata, kan witin walan Selá ba pat waitna takan, ban sakuna ai aisika witin wal ai maya baikras kan ba tâwan.

¹⁵ Juda bal luan ba ra, mairin iwi kan ba kaikan. Bara witin lukan, baha ba rug mairin kum bâra iwisa. Kan mairin ba ai mawan bikan kan bamna, witin mawan ba kaikras kan.

¹⁶ Bara Juda yabal ba wina tnaya ra tawi, mairin ba lamara wan. Mairka ba witin ai piarkika ba tânka briras kan, bara witin ra win: —¿Man sip sma yawan wal yapaia? Mairin ba pana witin ra makabi walan: —¿Man wal yapamna bara mana yang ra dîa aikma?

¹⁷ Juda pana win: —Yang daiwri nani ba tila wina, guts kum saki man ra blikamna. Pana mairin ba bila: —Âu, baha pain; sakuna nanara diara kum man brisma ba wina, diara pain kum yang ra aik, guts aikuma ba sirka ra, bara gutski lupia ba blîkma bara dukiam ba kli maikamna.

¹⁸ Juda witin ra makabi walan: —¿Dîa dukia nanara yang mihtam ra swimna brin mai daukisa? Mairin ba pana win: —Sîl ba awa wal ban aik, bara kînkam ba sin. Bara makaban dukia nani ba, Juda witin ra yabi si, mairka ba wal yapan, bara mairin ba kwihra tiwan.

¹⁹ Tamar baha wina buan bara mahka utla ra wan, bara ai mawan bikan kwalka ba daiki si piarka takan prâka ba kli diman.

²⁰ Bara tisku kan, Juda ai pânika Hirá wal gutska ba blikan, mairka ba ra bri si yabaia. Bara mairin ba dukia nani ba brin bara witin ra bri sal yabaia, sakuna Hirá mairin ba pliki sip sakras kan.

²¹ Bara baha tawanka uplika nani ra witin makabi walan: —¿Anira sa baha rug mairin kum Enaim waia yabalka ra iwi kata ba? Baha nani pana witin ra win: —Yang nani naha tawanka ra rug mairin kumi sin kaikras.

²² Bara Hirá witin kli Juda ra wan, bara win: —Mairka ba yang pliki sakras, baha purkara tawanka uplika nani ra makabi walri ba ra, witin nani pana ai win, naha tawanka ra rug mairin kumi sin âpu sa wisa.

²³ Bara Juda pana witin ra win: —Bahamna mairka makaban dukia nani ba ban briras, upla wan lawaska kikaia apia dukiara, yawan baha kat swip. Yang lika ai mana aibapaia guts lupia ba man wal blikri, sakuna witin âpu bara man sip pliki sakras kapram.

²⁴ Baha takan ba wina kati yumhpa prais luan ba ra, upla nani bal Juda ra win: —Mulam yapti, Tamar waitna wala nani wal taukan bara kwihra tiwan. Juda baha walan ba ra, ai kupia baiki ai bîla karna aisin: —¡Man nani bui witin ba alki latara saki, pauta ra angks!

²⁵ Witin nani wan, bara Tamar ba alkan, mahka latara sakan pauta ra angkaia. Bara mairin ba ai dapna ra ai bîla blikan bara naku win: “Naha dukia nani dawanka ba mita sika kwihra ai mangkan ba. Bamna man brih laki kaiks naha sîlka, awa na bara kîn na sut ya pali dukia sa sapa.”

²⁶ Juda baha dukia nani ba kaikan, bara naku win: “Mairin ba yamni daukan, sakuna yang saura daukri, yang luhpi Selá witin wal maya baikras kapri ba tâwan.” Sakuna baha yua wina Juda kli witin ai lamara waras kan.

²⁷ Tamar ai luhpia baikan, bara sutki kan.

²⁸ Tukta nani wina kum ba, ai mihta ba pas latara sakan. Bara grandi mairin ba mita trit pauni lupia kum klahkla ra wilkan, bara witin win: “Naha na tâura balan.”

²⁹ Kuna tukta ba ai mihta kli dingkan, bara muihnika ba pas aisuban. Bara grandi mairin ba mita nina ba Fares mâkan, tânka ba witin mita dur ba kwâkan ba mita: “¡Nahki man yabalkam ba sakram!”

³⁰ Baha ningkara tukta wala ba aisubi takan, baha klahkla ra trit pauni wilkan ba, baha nina Zérah mâkan.