Blasi Sturka 33 - DAWAN BÎLA AISKA

Jekob Isau wal kupia kumi takan ba

¹ Bara Jekob kaikan Isau 400 waitna nani aikuki aula kan, bara witin ai luhpia nani ba daknika yumhpa ra lakan: Lea daknika, Raquel daknika bara ai albika mairin nani ba daknika.

² Ai albika mairin nani ba, luhpia nani aikuki, baha nani tâura wapaia mangkan; baha nani ninara Lea ai lupia nani aikuki wapan, bara lâs ra Raquel Josep wal wapaia mangkan.

³ Bara Jekob witin lika baha nani sut tâura aimaki wapan, bara tasba ra 7 taim ai lal makupi kangbi wapi kan, ban ai muihni lamara wan ba kat.

⁴ Sakuna Isau ai muihni wal prawaia mapara plapi wan, witin ai nana ra kiaubi alki mawan kiawalan, wal ai biartaya alki ni. Witin nani wâlsut inan.

⁵ Baha ningkara, Isau ai lal buki mairin bara tuktan nani ba ra kaikan; ningkara witin ra makabi walan: —Bara naha nani na, ¿ya nani sa? Jekob witin ra win: —Naha nani sika, Gâd wina nampakan ra luhpia nani yaban ba.

⁶ Bara alba mairin nani ba balan, ai luhpia nani aikuki; witin nani Isau mawanra, tasba kat ai lal makupan.

⁷ Ningkara Lea sin balan ai luhpia nani aikuki, bara witin nani sin baku daukan. Bara baha nani sut ningkara Josep bara Raquel wal sin balan bara witin nani sin, witin ai mawanra tasba kat bawi ai lal makupi lakula daukan.

⁸ Bara Isau mahka witin ra makabi walan: —¿Man dîa daukaia luki kapram bara baha daiwan daknika nani ba yang wal prawaia kainamra blikram ba? Jekob pana witin ra win: —Baha lika man bui yang ra yamni ai lukma dukiara.

⁹ Isau pana win: —Apia, muihki; yang sin daiwan aitani brisna. Man daiwram nani ba bris.

¹⁰ Sakuna Jekob pana win: —Apia pali, muihki. Naiwa yawan wal kli prawan na yang ra yamni lukisma kaka, naha prisantka nani na bris. Man mawan kaikri ba ra, Gâd mawan kaikri baku daihra walisna. Man kupiam yamnika lâka tara wal, yamni pali ai brisma bamna.

¹¹ Muihki, mamkabisni naha prisantka nani yang bui man dukiam bri balri na man alks. Gâd bui yang ra sin yuyakira ai daukan sa, nanara yang sin diara nani aitani brisma. Jekob ba kli baku aisi kan ba ra, Isau baha prisantka nani ba brin;

¹² bara witin ai muihni ra win: —Nanara kaisa yawan mahka utla ra waia. Yang lika man kainamra wamna.

¹³ Jekob pana witin ra win: —Muihki laitwankira, man nu sma tuktan nani wîna ba swapni sa; sîp bara bîp luhpia nani ba sin baku sa. Bamna yang baha nani dukiara sin luki kaikaia sna. Witin nani ba swapbia kaka, yu kum bilara sut prui tiwbia.

¹⁴ Kanra yamni sa, man nampakan na kainara man pas mahka wama; bara yang lika man ninamra tawa impaki kamna, daiwan bara tuktan nani tâiura impaki auya ba wapanka ba wal, man wal yang Seír tasbaya ra prawamna ba kat.

¹⁵ Isau pana win: —Sakuna baku sa kaka, yang brin ai daukisa upliki nani balan na, nâra man wal swiaia. Sakuna Jekob pana win: —Apia pali, pliskam man baha dukiara lukpara. ¿Man dîa mata kupiam trabil brisma?

¹⁶ Baha yua Isau kli mahka Seír ra tawi wan.

¹⁷ Bara Jekob sin Sucot yabalka ra tawi wan. Witin Sucot ra ai watla kum mâkan, ai daiwra nani watla sin dus tnawa nani ni mâkan. Baha mita baha tasbaya nina ba Sucot mâkan.

¹⁸ Jekob Padán-aram wina takan yua ba siknis âpu yamni baman, pât nani wal sin yabal ra prawras, ban Kenan ra diman ba kat. Bara Siquem tawanka lama ba kat ai watla mâki iwan.

¹⁹ Witin Hamor luhpia nani wina, aisika nina Siquem, witin nani wina tasba pîs kum atki brin, silbar 100 kum mana. Baha tasbaya ra ai tintka watla bapan.

²⁰ Baha ningkara witin bahara altar kum sin paskan, altarka nina ba “Gâd ba Israel Gâdka” mâkan.