Apastil Nani Sturka 26 - DAWAN BÎLA AISKA

Pal ai tânka ba Agripa ra aisisa

¹ Bamna Agripa bila Pal ra: —Man tânkam ba dukiara nanara aisaia sip sma. Bara Pal ai mihta buki, naku aisin:

² “King Agripa, lilia lukisna naku sip sna man mamwanra tâinka ba param aisaia, dîa dîa Ju nani bui daihra kwahki ba dukiara.

³ Baha sut purkara, man pain pali kaikisma, yang nani Ju nani tilira lâika nani brisna ba, bara blahwanka nani brih banhwisna ba sin. Baha mita mamkabisna kupiam alki takaski bri yang ra ai wali kama.

Pal kau Dawan ra tawras rayaka ba

⁴ “Ju nani sut pain kaikisa, yang tasbayi ra bara Jerusalem ra sin nahki iwi kapri ba, tuktan katna piua wina.

⁵ Witin nani pain kaikisa, baha dukiara aisaia wilin kaka sip sa aisaia, yang na wahma wina parisi katna, baha daknika sika yang dakniki ra lâ kau karna bri ba.

⁶ Baha nanara witin nani lâ ra ai bri balan na lika, kainira diara bîla kaikisna ba dukiara baku, Gâd mita wan damika nani ra pramis munan ba, witin pruan nani ba kli bukbia sa.

⁷ Israel kiamka 12 ba sut bîla kaikisa naha pramiska na aimakbia, baha mita Gâd ra mayuni, dukia sin daukisa, kakna bara tihmia. Bamna king Agripa, naha sim bîla kaikanka brisna dukiara sika Ju nani daihra kwahki banhwi na.

⁸ ¿Bamna dîa kan man nani, Gâd mita pruan nani wina buki ba dukiara, sip kasak lukras banhwisma?

Pal wisa nahki witin serts ra rausauhki kan ba

⁹ “Kaina piua ra yang pali sin luki kapri, diara manis daukaia Jisas Nasaret nina ba mapara.

¹⁰ Prîs wihtka tara nani wina adar brih, yang baku daukri, bara Jerusalem ra kristian nani manis pali silak ra mangkri; iki banhwi kan ba ra sin, baha ba aitani pali lukri.

¹¹ Aima ailal sin witin nani ra klala yâri, ai kasak lukanka ba swibia wisi. Naha dauki kapri Ju nani priaska watla bani ra. Witin nani mapara sin kupi baiki ban nina bliki rausauhki kapri, plis tringsar nani ra sin.

Pal witin Dawan ra tawan dukiara kli aisisa

¹² “Baha lukanka ba wal, Damaskus tawanka ra auna kan, prîs wihtka tara nani wina karnika bara adar aikan ba wal.

¹³ Sakuna, king Agripa, yabal ra yu 12 aklak kan, ingni kum kaikri kasbrika pura ba wina. Ingnika ba sim yu lapta wal kau karnika bri kan, yang tnaiya kir ingwan, bara baha nani yang wal auya kan ba sut ra sin.

¹⁴ Bamna yang nani sut tasba ra kauhi banhri, bara bîla baikra kum yang ra aisi kan Hibru bîla ra: ‘Saulo, Saulo, ¿dîa kan man rau ai sauhkisma ki? Man minam pata ni silak tatwa ra pruki, wînam ra latwan yabisma.’

¹⁵ Bamna yang mita wîri: ‘¿Man ba ya, Dawan?’ Bara Dawan bila: ‘Yang sika Jisas, witinka ra sika man rausauhkisma ba.

¹⁶ Sakuna man bus, man ra yang balri ba lika, man bui yang warkki daukma bara witniski aisama ba dukiara, dîa dîa nanara yang tâinka kaikram na bara naika kaikma ba sin.

¹⁷ Yang swaki mai sakamna, Ju nani wina bara Ju apia nani wina sin, nanara baha nani tilara mai blikuna ba.

¹⁸ Man baha uplika nani nakra nani ba ilingkma, bara witin nani tihmia ra kau wapbia apia, sakuna ingni ra yarka wapbia. Bara sin Sitan mihta ra ban kabia apia, sakuna Gâd nina blîkbia; yang ra sin kasak lukbia, bara ai saurka nani sut ba swih tikan kabia, bara naika piua ra ai pliska bri kabia Gâd mita holikira sakan nani ba aikuki.’

Pal diara aihka kaikan ba bîla wali daukisa

¹⁹ “Baku bamna, king Agripa, yang kasbrika purara ba wina diara aihka kaikri ba, bîla wali daukras kaia sip apia kapri.

²⁰ Bamna yang pas Damaskus ra sturi yamni ba smalkri, ningkara Jerusalem ra, Judia tasbaya aiska ra, bara Ju apia nani sut ra sin. Witin nani ra wîri ai saurka ba swi si Dawan ra tawbia, ai kupia lakan warkka tânka ba sin marikbia.

²¹ Naha tâwan sika Ju nani mita tempel ra kapri ai alkan, ban sin ai ikaia kan.

²² Sakuna Dawan hilpka ba mita, ban nanara kat bapi buisna, bara sip sna upla sut ra Dawan sturka yamni ba wiaia. Moses bara prapit nani mita dîa takbia aisin ba, diara sât wala kumi sin yang aisaras.

²³ Baha tânka ba lika: Misaya ba pât wahwaia kan, bara sin prubia ningkara, witin sika pruan nani wina pas upla buan kabia ba, bara swaki sakan sturka yamni ingnika ba Ju nani ra smalkbia, bara Ju apia nani ra sin.”

Pal trai kaikan Agripa ai kupia laki kristian takbia

²⁴ Naha diara nani na wal Pal ai tânka param saki aisin ba ra, Festo ai tâ baiki wini, aisin: —¡Pal, man diara uya stadi munram ba mita lamla grisi takan!

²⁵ Sakuna Pal bila: —Wihtki tara Festo, yang tanis apia sna, sakuna diara aisisna ba lika kasak sa, bara luki kaikaia sa.

²⁶ Bamna king Agripa nâra sa, witin naha tânka nani pain kaikisa. Baha mita sika witin mawanra yang tânkira pali aisisna ba, kan pain daira walisna witin naha diara nani sut kaikisa, kan naha diara nani na yukuwi pali daukan dukia apia sa.

²⁷ Bamna, king Agripa, ¿man kasak lukisma ki prapit nani aisin ba kasak sa? Yang kaikisna man ba kasak lukisma.

²⁸ Bara Agripa bila: —Kau wiria kata, kupi laki kristian ai daukaia kapram.

²⁹ Bamna Pal bila: —Wiria, apia kaka manis kra, sakuna yang bui Gâd ra puri sunisna, man bara wala nani nâra naiwa ai wali na sut yang wal baku takbia, sakuna naha ai priskan na wal lika apia.

³⁰ Pal naha diara aisin ba ningkara, king ba mahka buan, wihta tara ba bara Berenice, bara baha nani sut witin nani aikuki iwi kan ba sin.

³¹ Witin nani mahka taki wih, ai mânka taki, baha tânka ba aisin: —Naha waitnika diara kumi sin pruaia pâtka briaia daukras, silak ra kaia sin apia sa.

³² Bara Agripa Festo ra win: —Sip kan naha waitnika lanhkaia, witin ba king tara mita ai lâka daukaia makabras kan kaka.