Apastil Nani Sturka 22 - DAWAN BÎLA AISKA

¹ “Muihni nani bara aisa nani sin, yang tâinka param aisaisna bamna, man nani pliskam pain wals.”

² Hibru bîla ra aisi kan walan bâra sut ba kau sâp pali takan kan. Bara Pal ba aisi kan:

³ “Yang lika Ju uplika Tarso tawanka, Cilicia kuntrika ra aisubi takri, sakuna naha tawanka Jerusalem ra pâwri. Gamaliel skulka ra sin dimri, wan damika nani lâka ba sin pain pali ai smalkan. Piua bani ra kupi aiska ni Gâd dukia dauki katna, man nani naiwa daukisma ba baku.

⁴ Pas piua ra, yang sturi yamni wali uplika nani ra nina bliki rausauhkri, ban ikaia kat; waitna bara mairin nani sut alki priski silak ra mangkri.

⁵ Prîs wihtka tara bara almuk nani sin witnis sa, witin nani wina wauhkataya nani briri wan muihni Ju uplika Damaskus ra iwi nani ra brih waia. Kristian nani pliki wari, bara alki Jerusalem ra bri sal klala yaia dukiara.

Pal ai kupia lakan ba dukiara aisisa

⁶ “Sakuna yang yabal ra auna kan, pat Damaskus dimaia man kapri, yu ba 12 aklak kan. Tisku baku kan, kasbrika pura ba wina ingni tara kum yang ra kir aiska ingwan,

⁷ bara tasba kat kauhri. Ningkara, bîla baikra kum walri naku ai win: ‘Saulo, Saulo, ¿dîa kan man nini bliki rau ai sauhkisma ki?’

⁸ Bamna yang makabi walri: ‘¿Man na ya, Dawan?’ Bara ai win: ‘Yang sika Jisas Nasaret wina, man bui witin ra waihlam sakisma ba.’

⁹ Baha nani yang wal kan ba ingni kaikan ba ra, sirang iwi banhwan, sakuna yang ra aisi kan ba bîla baikra lika walras kan.

¹⁰ Bara yang bîli: ‘Dawan, ¿yang dîa daukaia sna ki?’ Bara Dawan bui ai win: ‘Man mahka Damaskus ra was; bahara mai wibia man dîa daukaia kama ba.’

¹¹ Ingni ba mita diara kaikras takri kan bamna, pâinika nani mihti ra alki Damaskus ra ai brih wan.

¹² “Bahara waitna kum bâra kan, nina ba Ananías, Moses lâka bîla wali dadaukra pali kan, bara Damaskus ra Ju nani iwi ba witin dukiara pain baman aisi kan.

¹³ Ananías balan ai kaikaia, bara naku ai win: ‘Muihki Saulo, man namkra ba kli bris.’ Bara baha sim piua ra naikra kli briri, sip kapri kli diara kaikaia.

¹⁴ Bara witin ai win: ‘Wan damika nani Gâdka ba mita kan piua wina man ba bâk saki mai brin ai kupia lâka tânka kaikaia, bara sin kaikma baha kasakkira ba, ai bîla pali wina sin diara walaia.

¹⁵ Bamna man mita witin ai dukiara tasba aiska ra wih aisi smalkma, dîa man kaikram bara walram ba sin.

¹⁶ Bara nanara, ¿man dîa bîla kaikisma ki? Mahka, yas tahbi mai daukbia, Dawan nina kat luki, saurkam nani sut sikbi sakaia dukiara.’

Pal aisisa nahki witin Ju apia nani ra blikan ba

¹⁷ “Jerusalem ra kli balri ba ra, yang tempel ra wih puri suni kapri ba ra, diara aihka kum kaikri.

¹⁸ Dawan ba kaikri, bara yang ra ai win: ‘Mahka aihni pali trai kaiki Jerusalem na wina taks, kan yang witniski man aisama ba, naha uplika nani walbia apia bamna.’

¹⁹ Bara yang wîri: ‘Dawan, witin nani pain kaikisa nahki yang Ju nani priaska watla nani ra wari, man ra luki uplika nani ba wipi silak ra brih wari ba sin.

²⁰ Man witniskam aisasara Stiben ikan ba ra, yang pali sin baha lamara kaiki kapri, dîa tâwan iki banhwi kan ba sin aitani lukri, Stiben ra iki kan uplika nani kwalka sin main kaiki katna.’

²¹ Sakuna Dawan bui ai win: ‘Man mahka was, yang bui man ba laihura mai blikaisna, Ju apia nani tilara.’ ”

Pal kamandanti ba mihta ra

²² Naha bîla kat baman sip kan upla nani ba Pal ra wali kaia, bara witin nani mahka karna wini banhwan: “¡Baha waitnika ba mahka ikaia aitani sa! ¡Naha sât waitnika ba sip apia kau raya kaia!”

²³ Witin nani ban ai pura wini, ai kwalka nani balhbi, tasba yuya nani brih purara lulki kan bamna,

²⁴ kamandanti ba adar yan Pal ba kwartil ra bri si dingki, klala ni wirâ wipbia, baku munka ai dahra saki aisabia, dîa tâwan upla nani ai mapara wini kan ba dukiara.

²⁵ Wipaia wisi mihta priskan kan, bara Pal baha kiaptin ai lamara bûi kan ba ra win: —¿Man nani mampara aitani sa ki, Rom suliarka waitnika kumi ba lâka sin daukras ban wipaia?

²⁶ Kiaptin ba naha walan ba ra, kamandanti ra wih win: —¿Dîa daukaisma ba man damra walisma ki? Aman kaiks, naha waitnika na lika Rom suliarka waitnika kum sa bamna.

²⁷ Bara kamandanti ba Pal lamara bal makabi walan: —¿Kasak man ba Rom suliarka sma? Pal bila: —Âu.

²⁸ Kamandanti ba bila: —Yang lika lalah tara aibapi Rom suliarka takri. Bara Pal bila: —Kuna yang lika bahara aisubi takri.

²⁹ Pal ba Rom suliarka sa walan ba ra, kamandanti nani witin ra wipaia wisi ridi taki lamara kan ba, kitwi laihura taki buan. Kamandanti ba sin, Pal baku kan ban priskan ba dukiara sibrin takan.

Pal ba Ju lâka dadaukra wihtka nani mawanra

³⁰ Yu wala, suldiar kiaptinka ba pain kaikaia want kan, dîa dukiara Ju nani mita Pal mapara bûi kan sapa. Bara Pal mihta ra sîn wilkan ba lanhkan, bamna adar yan prîs tara nani ba sut asla aidrubia. Bamna Pal ba sakan baha nani mawanra.