Apastil Nani Sturka 2 - DAWAN BÎLA AISKA

Spirit Holikira bal iwan ba

¹ Pentikus yua balan ba ra, lalukra nani sut plis kumi ra asla takan kan.

² Bara tisku kan witin nani walan bin kum bal iwan, sim pali pâsa karna krawi binka baku. Baha watla bilara witin nani bâra kan ba sut banhkan.

³ Bara pauta klauhan twisa nani baku latan takan, bara witin nani sut purara iwan.

⁴ Kumi bani ba Spirit Holikira ni aibanhwan, bara mahka bîla sât wala nani ra aisin, Spirit mita yan aisan ba kat.

⁵ Baha yua nani ra, Gâd ra luki Ju nani kuntri wala ra kan ba Jerusalem ra wan, baku sin tasba aiska wina.

⁶ Upla nani bâra kan ba baha binka takan ba walan, bara asla aidruban, witin nani sip ai dara walras kan dîa lukaia sapa, kan naha lalukra nani aisi kan ba lika witin nani pali ai bîla kat aisi kata.

⁷ Witin nani tâ iwi, aihka sin lukan, bara pana pana ai walka ra tawi aisin: —Naha uplika nani aisi na, ¿sut ba Galili wina apia?

⁸ ¿Bara nahki kan wan kuntrika pali bîla kat naha uplika nani aisin, yawan wali na?

⁹ Yawan nâra na lika kuntri sât sât wina nani sa: Partia, Media, Elam, Mesopotamia, Capadocia, Ponto, Asia kuntrika tani wina,

¹⁰ Frigia, Panfilia, Idsip, Cirene kuntrika tasbaya lama wina, baha purkara Rom wina sin upla nani nâra sa;

¹¹ baha nani wina tila nani ba Ju nisanka pali, bara wala nani Ju takan nani ba sin. Creta, Arabia wina sin upla nani nâra sa, sakuna ban yawan wan bîla pali kat baha nani aisin yawan walisa, nahki Gâd mita diara aihka tara daukan nani ba dukiara.

¹² Witin nani sut tâ iwan, dîa lukaia sapa sin kaikras kan, bara pana pana ai walka ra tawi naku aisi banhwi kan: —¿Naha na dîa tânka sa ki?

¹³ Sakuna upla wala nani lika lawaska kiki, aisin: —¡Naha uplika nani lika bla atia sa!

Pita bui upla nani ra dîa win ba

¹⁴ Bara Pita mahka buan, apastil wala 11 ba aikuki, bara naku ai bîla baikra karna ni aisin: —Judia uplika nani sut, Jerusalem ra iwi nani sma ba sin, naha tânka na kasak pali kaiki bas, bara yang dîa mai wimna ba sin pain wals.

¹⁵ Naha uplika nani na bla apia sa man nani lukisma ba baku, kan nanara lika kau titan 9 aklak sa bamna.

¹⁶ Sakuna naha dukiara sika prapit Joel mita naku aisin kan:

¹⁷ ‘Gâd bila: Tnata yua nani ra naku daukamna: Yang Spiritki ba upla bani purara laikamni, bamna luhpiam waitna nani bara luhpiam mairin nani ba sin, yang witniski aisabia; wahma nani sin diara aihka kaikbia, almuk nani lika yaprisauhkan kaikbia.

¹⁸ Duki dadaukra waitna nani bara mairin nani sin purara Spiritki ba laikamna, bara yang witniski aisabia.

¹⁹ Diara aihka nani kasbrika purara marikamna, bara sain nani sin naha tasbaya ra marikamna: tala, pauta bara tasba ra kiasma mukuska nani.

²⁰ Lapta ba tihmia takbia, kati ba lika tala baku pauni takbia, Dawan yua tara pranakira kau balras ba ra.

²¹ Bamna, Dawan nina mâki wini nani ba sut lika swaki sakan kabia.’

²² “Israel luhpia nani, pliskam naha na pain wals, dîa pali dukiara aisi kamna ba: Baha Jisas Nasaret wina kan ba Gâd mita witin ba waitna painkira kulkan kata, man nani mamwan kat witin mita diara aihka tara nani, sain nani sin daukan. Bara baha tânka ba pain kaikram.

²³ Blasi piua wina Gâd mita ai Luhpia ba ridi dauki dîa takaia kan ba pain kaiki si, man nani mihtam ra mangkan ba ra, witin ba silak ra mangkram, baha ningkara upla watawikira nani mihta ra mangki bri si dus prihni ra sabi ikram.

²⁴ Sakuna Gâd bui witin ba prura karnika mununhta wina kli bukan, prura sip witin ba ai karnika mununhtara taibi briras kan bamna.

²⁵ King Debit mita Jisas dukiara naku aisin: ‘Yang piua bani maiwanra Dawan ba kaiki katna. Witin sin yang laimara sa, bamna diara kumi sin trabil ai munbia apia.

²⁶ Baha mita yang kupi ba lilia pali takan, bara twisi sin mahka lilia ni aiwanisa, bara yang wîni tara ba wihka bîla kaiki kabia.

²⁷ Man lika yang sulki ba pruan nani bâra ba pliska ra ban swima apia; dukiam dadaukra holikira ba wîna tara sin sukwi luaia adarka yama apia.

²⁸ Man mita sin raya kaia ra waia yabalka nani sut pain pali ai marikram, baha purkara man mamwanra lilia ai daukma.’

²⁹ “Muihki nani, ai swis yang wan damika Debit dukiara param mai wimna. Witin ba pruan, bara tasba ra bikan, ban naiwa yua kat ai raitika ba kau yawan brisa.

³⁰ Ban sakuna, Debit lika prapit kum kata. Bamna witin pain pali kaiki kan, Gâd swer taki kira witin ra pramis munan tânka ba, nahki ai kiamka ba wina kumi ai iwaika ra iwbia.

³¹ Baku bamna, Debit lika kan wina witin ra kaiki baku, Misaya pruan wina bubia ba dukiara naku aisin: ‘Witin sulka ba pruan nani pliska ra ban swibia apia, bara ai wîna tara ba sin swika sukwi lubia apia.’

³² Bamna sim Jisaska sika Gâd mita pruan kan ba wina kli bukan. Bara yang nani sut baha witniska nani sna.

³³ Baku bamna, Gâd mita ai mihta aihkika ba ni witin ba purara pali bukan, bara Spirit Holikira witin ra yan, Aisa mita pramis munan kan ba. Bahamna, diara nani sut man nani walisma na bara kaikisma na sin, witin wina atia sa.

³⁴ Kasbrika purara uli wan ba lika Debit apia, kan Debit pali sika naku aisin: ‘Dawan mita yang Dawanki ra win: Man bal yang laimara iws,

³⁵ waihlam nani sut yang minam munhtara mangkamna ba kat.’

³⁶ “Israel nisanka ba sut naha diara na dukiara pain ai dara walaia sa: Baha sim Jisaska man nani dus ra sabi ikram ba, Gâd mita witin ba Dawan bara Misaya sin mangkan sa.”

³⁷ Upla nani naha walan ba ra, sari pali takan, bara witin nani Pita ra bara apastil wala nani ra sin makabi walan: —Muihki nani, ¿yang nani dîa daukaia sna ki?

³⁸ Bara Pita baha uplika nani ra win: —Man nani daukankam saura nani ba swi si mahka Dawan ra taws, bara kumi bani sin yarka lî ni tahbi mai daukan kabia Jisas Kraist nina ra; baku mika saurkam nani swih tikan kabia, bara Dawan mita Spirit Holikira ba maikbia.

³⁹ Naha pramiska na lika man nani bara luhpiam nani sut dukiam sa, bara upla nani laihura banhwi ba sut dukia sin; wibia kaka Dawan wan Gâdka paiwaia luki uplika nani ba dukia sin.

⁴⁰ Bara Pita lika naha bîla nani aisin na purara, kau kupia kraukanka ailal baha uplika nani ra yabi, naku smalki win: —¡Man nani naha uplika nani tiwan banhwi na tila wina bal taki, swaki sakan lâka ba alks!

⁴¹ Baku bamna, ai smalkanka bîla alki brin nani ba sut pali tahbi daukan; bara baha yua lika 3,000 lama upla kau lalukra nani wal asla prakan kata.

⁴² Baha uplika nani lika yu bani takaskras kira, apastil nani smalkanka nani wina diara lan taki kan, bara witin nani sin pana pana ai walka dukiara luki kan, ai pura sin suni banhwi kan, sut sin asla taki brit kriki pi kan.

Pas kristian nani rayaka ba

⁴³ Bara upla nani sut tâ iwan pali taki kata, kan apastil nani ba wark aihka nani uya, sain nani sin manis dauki kan bamna.

⁴⁴ Baha uplika nani kasak lukan ba, sut lika kau asla pali takan, bara dîa witin nani ai tilara bri kan ba, sut bakahnu bri kan.

⁴⁵ Ai tasbaya nani bri kan ba, dîa dîa wala nani sin bri kan kaka, baha sut pali wauhi atkan, bara lalahka ba ai walka nani diara âpu umpira ba wal aikuki yui bri kan.

⁴⁶ Yu bani witin nani tempel ra asla taki kan, bara utla bani ra asla taki, liliakira ai kupia kumi lâka ra ai pata pi kan.

⁴⁷ Witin nani Gâd nina mayuni kan, bara upla nani sut mita pain pali kaikan; bamna yu bani Dawan mita swaki sakan uplika nani ba kau kau sal witin nani daknika ra asla praki kan.