Apastil Nani Sturka 19 - DAWAN BÎLA AISKA

Pal Epesus ra

¹ Apolos ba Korint ra kan ba ra, Pal lika laih il nani tasbaya nani bâk impaki ban Epesus kat balan. Bahara kristian tila nani wal prawan.

² Bara baha kristianka nani ra makabi walan: —¿Man nani pas kasak lukatma ba ra, Spirit Holikira ba brisatma ki? Witin nani bila: —Yang nani Spirit Holikira bâra sa sapa tânka sin walras pali.

³ Bamna Pal witin nani ra makabi walan: —Baku kaka, ¿dîa sât tahbi daukanka man nani brisatma ki? Witin nani bila: —Jan tahbi daukanka ba kat baman.

⁴ Pal bila: —Jan lika upla tahbi dauki kan wan saurka nani wina wan kupia lakan tânka ba kat, bara Israel luhpia nani ra sin win, witin ai ninara kum aula ba ra kasak lukbia, bara baha ba sika Jisas.

⁵ Naha walan ba ningkara, sut Dawan Jisas nina ra mâki tahbi daukan kan.

⁶ Pal ai mihta baha nani purara kahban ba ra, sut purara Spirit Holikira bal iwan. Bara mahka witin nani bîla sât sât aisin, Dawan sturka sin aisi kan, Gâd wina yan bamna.

⁷ Baha nani sut lika asla 12 waitna kan.

⁸ Pal lika kati yumhpa pali Ju nani priaska watla ra impaki wih, ai kupia aiska ni smalki, bara aikuki sin aisi kan. Witin lika upla nani ba kupia lakaia muni kan, Gâd king aimaki lâka ba dukiara.

⁹ Sakuna tila nani ai kupia karna daukan, kasak sin lukan daukras kan, kau ni upla nani mawanra sturi yamni ba mapara saura ni aisin. Bara Pal baha nani swi si, kristian nani ba Tirano skulka watla ra brih wan; bahara witin yu bani aisi kan.

¹⁰ Baha ba dauki kan mani wâl prais, bara Asia tasbaya ra iwi nani ba sut Dawan Jisas sturka ba walan, Ju nani bara Ju apia nani sin.

Esceva luhpia nani ba

¹¹ Bara Gâd mita Pal bâk sain aihka nani ailal pali dauki kan.

¹² Ban angsar nani sin, apia kra kwala wala nani sin witin ra kangban ba, kwalka nani ba siknis uplika nani ra brih wan, bara baha ni siknis uplika nani ba rakan, pirit saura nani ba sin upla nani wina taki kan.

¹³ Sakuna tila Ju nani, impaki tauki pirit saura nani kangbi saki kan ba mita trai kaikan Dawan Jisas nina mâki pirit saura nani kangbi sakaia. Pirit saura nani ra naku win: “¡Pirit saura nani, Pal smalki ba Jisaska nina ra mai wisna, bal taks!”

¹⁴ Naha na dauki kan Ju prîska tara kum nina Esceva wi ba luhpia waitna 7 ba mita.

¹⁵ Sakuna piua kum pirit saura ba mita pana win: “Yang Jisas ba kakaira sna, Pal ba sin. Sakuna man nani lika ya sma sapa mai kaikras.”

¹⁶ Pirit saura bri kan waitnika bui witin nani ra pâli alkan, bara ai karnika aiska ni dingki alkan. Bara ban baha nani pura luan, saura pali sin munan, bamna utla ba wina kwala sin âpu kasak insauhkan kira ban taki plapi banhwan.

¹⁷ Baha sut Epesus ra iwi nani kan ba walan, Ju nani, Ju apia nani sin, bara witin nani sibrin pali takan, bara Dawan Jisas nina ba tara pali mayunan.

¹⁸ Baku sin kasak lukan nani ba ailal bal ai dahra sakan, saurka nani piua luan ra daukan ba sut pali.

¹⁹ Sukia warkka lan takan uplika nani ailal sin ai wauhkataya nani bri sal, upla nani sut mawanra angkan. Baha wauhkataya nani atkan praiska ba kulkan silbar mâ 50,000 kata.

²⁰ Baku sika Dawan sturka yamni ba kau aiska pali pâwi kan, ai karnika ba tânka sin mariki kan.

²¹ Naha diara nani ningkara, Pal brin daukan Macedonia bara Acaya ba wih kaikaia, bara baha wina ban Jerusalem ra waia. Witin sin aisi kan, Jerusalem ra wabia ningkara, Rom ra sin waia.

²² Bamna witin ra hilp muni waitna wâl saki Macedonia ra blikan, baha sika Timoti bara Erasto wal. Witin lika piua wiria Asia ra takaskan.

Epesus ra bin takan ba

²³ Baha piua ra bin tara turban kum takan, sturi yamni dukiara.

²⁴ Baha takan ba lika waitna kumi nina Demetrio, silbar warkka dadaukra ba mita. Naha waitna mita silbar ni gâd bahki Diana tempelka lilka lupia dauki wauhi atki kan, bara witin wal wark taki nani ba lalah manis saki kan.

²⁵ Bamna Demetrio mita baha uplika nani, bara ya ya wala nani sin bahmuna warkka dauki nani kan ba, sut aikuki asla paiwan, bara naku win: “Upliki nani, man nani pain kaikisma yawan lika naha warkka na wina nahki lalah pain saki ba.

²⁶ Ban sakuna, man nani pain kaikisma bara sin walisma, nahki naha waitnika Pal wi ba smalkisa, gâd nani upla ai mihta ni paskan ba lika bahki pali sa. Baku smalki ba mita upla manis kupia alkan, naha Epesus tawanka ra baman apia, sakuna Asia tasbaya aiska ra sin.

²⁷ Bamna naha diara nani na mapara yawan aman kaikaia sa, baha apia kaka, wan warkka nani sut ba bahki ra tawbia. Baha baman apia, kuna wan gâdka tara Diana tempelka nina tara bukan ba sin bahki ra tawbia. Baha purkara, wan gâdka mairin nina tara ba, ai prana ba sut bahki kulkan kabia, naha Asia tasbaya ra baman apia, kuna tasba aiska ra sin.”

²⁸ Naha diara na walan ba ra, sut ai kupia baikan, bara ai bîla baikra tara ni wini, aisin: “¡Tara sika Diana Epesus ra ba!”

²⁹ Tawan aiska ba kupia turban kan. Bara Macedonia wina waitna wâl, Gayo bara Aristarco, Pal wal tauki kan ba, baha nani purara tawan ba kauhan bara alki raski pulaia watla tara ra brih wan.

³⁰ Pal naha nani tilara dimi aisaia want kan, sakuna kristian nani mita win dimbia apia.

³¹ Baha purkara, Asia tasbaya wihtka kum kum Pal wal ai uplika kulkan kan ba mita ai bîla blikan, Pal bahara dimbia apia.

³² Bamna baha aidrubanka ra, upla tila nani ba diara kum dukiara wini aisi kan, wala nani sin wini diara wala baman aisi kan, upla nani sut kupia turban bamna. Witin nani sin ai dara walras kan, dîa pali dukiara asla takan sapa.

³³ Baha aidrubanka tilara upla tila nani bâra kan ba mita tânka ba param Alejandro ra win, bara Ju nani tila mita witin ba platukbi upla nani mawanra sunan kan. Alejandro ai mihta ni upla nani ra sain munan sâp taki banhbia. Bara mahka witin ai tânka ba param saki baha nani dukiara aisaia munan.

³⁴ Sakuna upla nani ba kaikan kan nahki witin ba Ju kan, bamna witin nani sut ai bîla baikra karna pali wini banhwi kan, awar wâl prais: “¡Tara sika Diana Epesus nani tilara ba!”

³⁵ Bara baha tawanka ra wauhkataya âiulbra ba mita upla nani bin dauki ba takaski muni, witin baha nani ra naku win: “Man nani Epesus nani kaikisma, upla sut sin kaikisa wan gâdka Diana tempelka ba Epesus nani mita main kaikaia sa, witin lilka kasbrika pura wina kauhan ba sin.

³⁶ Upla kumi sin baha ba kunin sa sip wiras. Bamna sâp taks man nani, bara diara kumi sin tânka briras kira daukaia munpara.

³⁷ Naha waitnika nani man nani mita nahara alki bri balram na, witin nani tempelkam wina diara implikras, man nani gâdkam ba mapara diara saura sin aisaras.

³⁸ Bamna Demetrio ai warkka uplika nani aikuki upla kum dahra kwahkaia brin kan kaka, baha dukiara wihta tara nani bâra sa, lâ dadaukra nani sin. Sip kan baha nani mawanra wapni daukaia, bara kumi bani sin ai raitka dukiara aisaia.

³⁹ Bamna diara wala man nani makabisma kaka, man nani lâ ba kat aidrubanka kum briaia kapram, bara bahara diara sut wapni dauki banhwaia katma.

⁴⁰ Bamna naiwa diara takan na dukiara wan dahra kwahkan kabia baku sa. Yawan nani na war babukra nani baku takan sa, bara naha aidrubanka na dukiara wan makabi walbia ba ra, yawan pana dîa wiaia sapa kaikras.”

⁴¹ Naha diara aisin ba ningkara, witin mita naha aidrubanka ba prakan.