Apastil Nani Sturka 11 - DAWAN BÎLA AISKA

Pita ai sturka Jerusalem sertska ra maisa pakisa

¹ Apastil nani bara wan muihni nani Judia ra nani kan ba sturi walan, nahki Ju apia nani sin Dawan sturka yamni ba brin.

² Pita kli Jerusalem ra balan ba ra, Ju lalukra nani mita witin mapara buan,

³ bara win: —¿Dîa kan man Ju apia nani ba watla ra waram, aikuki sin plun piram?

⁴ Bara Pita lika dîa takan ba tâ wina tnata kat, naku win:

⁵ —Yang Jope tawanka ra puri suni kapri ba ra, diara aihka kum kaikri, kasbrika purara ba wina diara kum bal iwuya kan kwala tara kum baku, tâ walhwal ba sut wilkan kan, ban yang bâra kapri pliska kat bal iwan.

⁶ Yang lama pali ra wari, bilara dîa bâra sapa kaikaia, bara kaikri daiwan mina walhwal bri nani ba, daiwan kraskira nani, piuta nani, tnawira nani sin.

⁷ Bara bîla baikra kum walri, naku win: ‘Pita, man bus, bara iki pis.’

⁸ Sakuna yang wîri: ‘Apia, Dawan, kan kau aima kumi sin bîli ra mangkras bahmuna diara saura, tâski nani ba.’

⁹ Bara kasbrika pura ba wina bîla baikra ba kli aima wala ra ai win: ‘Gâd mita klin daukan dukia ba, man tâski wipara.’

¹⁰ Naha diara na aima yumhpa takan ba ningkara, diara nani sut kli kasbrika purara brih wan.

¹¹ Baha sim pali piua ra yang nani takaski kapri ba watla ra waitna yumhpa wan, Sesaria wina yang ai pliki blikan kan.

¹² Bara Spirit Holikira ba mita ai win, witin nani ba wal wamna takaskras pali. Bamna naha wan muihni nani 6 na sin yang wal wan. Yang nani sut Cornelio watla ra dimi banhri.

¹³ Witin ba mita yang nani ra ai win, ai watla ra insal kumi ai tnaya ra kan ba mita win: ‘Waitna nani Jope tawanka ra blîks, Saiman nina wala Pita wi ba bri balaia,

¹⁴ bara witin mita mai wibia nahki sip kama swaki mai sakan kaia, man bara wamtla uplika aiska.’

¹⁵ Yang mahka aisari ba ra, Spirit Holikira witin nani sut purara bal iwan, sim tâ pali piua ra yang nani purira bal iwata ba baku.

¹⁶ Bara yang kupi krawan Dawan naku aisin ba dukiara: ‘Kasak pali Jan lika lî ni upla tahbi daukan, sakuna man nani lika Spirit Holikira ni mai tahbi mai daukan kabia.’

¹⁷ Bamna baha lika param sa, Gâd mita baha nani ra Spirit Holikira yan, sim yawan bui Dawan Jisas Kraist ra kasak lukan ba ra wankan ba baku. ¿Bamna yang na yamna, Gâd mapara buaia?

¹⁸ Bara wan muihni nani Jerusalem ra nani ba naha sturka walan ba ra, mapara aisi kata ba sâp takan, Gâd ra ni mayuni, naku win: —Baku sa kaka, Gâd mita Ju apia nani ra sin sans yaban ai kupia lakaia, bara raya ban kaia lâka briaia.

Antíoco ra lalukra nani ba

¹⁹ Stiben ikan ningkara, lalukra wala nani ra sin mahka rausauhkan, bamna tila nani ba Fenicia ra, Chipre ra bara Antíoco ra sin plapan. Bahara Jisas sturka yamni ba Ju nani ra baman smalkan, Ju apia nani ra lika apia.

²⁰ Sakuna lalukra nani tila Chipre bara Cirene wina kan ba mita Antíoco tawanka ra wan, bahara Dawan Jisas swaki wan saki sturka ba Ju apia nani ra smalkan.

²¹ Dawan karnika ba witin nani purara kan, bamna upla manis ai lukanka almuk nani ba swi si, Dawan ra ni kasak lukan.

²² Bara naha sturka na Jerusalem ra serts bâra ba kiama ra diman ba ra, witin nani mita Bernabé saki blikan Antíoco ra.

²³ Bernabé bahara wan ba ra, kaikan nahki Gâd upla nani ra ai yamnika yaban ba, bamna witin lilia kan. Bara mahka upla nani ra smalkan ai kupia aiska ni Dawan ra kasak lukaia tânka.

²⁴ Bernabé lika waitna kum pain kata, witin Spirit Holikira ni bara kasak lukan lâka ni sin aibanhwan kan. Baha mita witin mita upla manis Dawan ra bri balan.

²⁵ Baha ningkara, Bernabé ba Tarso ra wan Saulo plikaia, bara wal prawan ba ra, witin ba Antíoco ra brih wan.

²⁶ Witin nani bahara serts uplika nani ba wal takaskan mani kum, ban upla nani ra sin smalki kan. Bamna Antíoco ra sika pas lalukra nani nina kristian nani mâkan ba.

²⁷ Baha piua ra, Dawan wina sturi bri aisi uplika tila nani, Jerusalem wina Antíoco ra wan.

²⁸ Witin nani tila wina kumi nina Agabo, witin lika wan muihni nani lilapas kat buan, bara Spirit Holikira mita yan aisin, nahki plun tiwan tara kum tasba aiska purara balbia. Baha ba kasak pali takan Claudio wihta tara aimaki kan piua ra.

²⁹ Bara lalukra nani Antíoco ra iwi ba sut wilin takan hilp kum blikaia, Judia ra wan muihni iwi banhwi ba nani ra, kumi bani sip kan ba kat.

³⁰ Baku bamna, witin nani mita Bernabé bara Saulo wal mihta ra lalah ba mangki, Judia serts tâ uplika nani ra blikan.