Aiseya 52 - DAWAN BÎLA AISKA

Saion wina priski brih wan ba Gâd mita pri sâkbia

¹ Rawi bus, Saion, rawi bus, karnikam ba prâmka dims, Jerusalem tawan holikira prâmka kau pranakira ba dims, kan gâdkas, upla tâskikira, kli bal man ra dimbia apia.

² Jerusalem, bus, tasba yuya mai alkan ba singbi sâks; bara iwaikam ra iws. Saion, luhpia mairin, priski mai brih balan ba namna ra wilkan dusa ba lanhki sâks.

³ Dawan ba naku wisa: “Sint kumi sin briras man nani alba baku mai brih wan piua ra; sint kumi sin yabamna apia, nanara yang mita atki mai sakri ba.

⁴ Yang upliki nani ba Idsip ra wih tringsar baku iwan, piua luan ra, baha ningkara, Asiria mita pâtkas pali rausauhkan.

⁵ Bara nanara, ¿yang nâra dîa kaikisna? Upliki nani na pâtkas pali alki Babilon ra brih wan. Ya uplika nani mita taibi bri ba, ai wîna tara puli lâka ni ai pura winisa bara piu bani ra yang maipara sa.

⁶ Sakuna yua ba balbia bara upliki nani ba kaikbia bara tânka bribia, yang aisari ba, yang sika Dawan.”

⁷ Kaiks nahki pranakira ba, baha mina nani il nani purak lilia sturka nani brih aula ba, baha kupia kumi sturka maisa paki ba, baha sturi yamni brih aula ba, bara swaki sakan sturka ba maisam paki ba, bara witin nani Saion ra wisa: “¡Man Gâdkam ba king sa!”

⁸ ¡Aihwawakrikam nani, ai bîla baikra karna wini ba wals! Witin nani asla taki pura luan winanka wini ba, kan witin nani ai nakra pali ni kaikisa Dawan ba nahki kli Saion ra aula ba.

⁹ ¡Jerusalem, liliam mita mayunra tara ba aiwans, Jerusalem slingwanka nani Dawan lika ai uplika nani ba umpira kaiki bamna, Jerusalem ba atki sakan bamna!

¹⁰ Dawan ai karnika ba param ra sakan, nisan nani sut nakra ra. Bara tasba aiska ra sin yawan wan Gâdka swaki wan sakanka lâka ba kaikbia.

¹¹ ¡Bal taks, bal taks man nani Babilon wina baha nani tila wina bal taks, diara tâski ba kangpara, man nani Babilon wina taks! ¡Sunu taks man nani bui Dawan ra sakripais dauki yaia watlika nani twilkisma ba!

¹² Man nani tawa tawa taki wama, plapi lika taki wapara; kan Dawan, Israel Gâdka ba wabia bamna, tnamya bani ra kainam kahbi kabia.

Dawan napakanka ba pât wahwi pura lubia

¹³ Bara kaiks yang warkki dadaukra warkka ba, pain man takbia, purara sin bukan kabia, bara laih purara mangkan kabia.

¹⁴ Upla ailal witin ba kaiki tâ iwan ba baku, witin nani kaikan ai mawan pîska ba sât aihka pali takan ba, kan upla luhpia nani prana ba witin wina lap tiwan kan bamna,

¹⁵ baku nisan nani sin taibia; king nani witin kaiki ai mawanra ai bîla prakbia, kan witin nani ra diara wiras kan ba dukia nani ba marikbia bamna, bara witin nani diara walras pali kan ba baha tânka sin bribia bamna.