Aiseya 37 - DAWAN BÎLA AISKA

Juda ba Senaquerib mihta wina pri sakisa

¹ Naha sturka ba, king Ezequías walan ba ra ai prâka ba kalkan, ningkara prâk almuk diman sari prâka bara Dawan watla ra dimi wan.

² Bara Eliaquim king watla ra diara nani pura kakaira ba, sturi âiulbra Sebná ba bara prîs kau almuk nani daknika ba sut kira kwala siksa nani dimi bara prapit Aiseya, Emus lupia ra blikan wan,

³ witin ra wiaia: “Ezequías naku aisin: ‘Naiwa yua sari tara yua sa, lawi wan dauki Gâd mapara saura aisin yua; mairin kum luhpa baikaia piua aimakan, sakuna aisubi sakaia karnika âpu ba baku.

⁴ Ban kra Dawan man Gâdkam walbia naha bîla aisanka nani ba, witin ra sika Asiria kingka ai Dawanka ba mita blikan ba Gâd rayakira ra lahtubaia dukiara, bara sturi saura nani wiaia dukiara sin, naha bîla aisanka nani ba sika man Gâdkam pat walan sa, bahamna kau kiamka nani tila takaskan nani na dukiara puram suns.’ ”

⁵ Bara king Ezequías wihtka nani ba, Aiseya kaikaia balan.

⁶ Bara Aiseya mita adar yaban: “Man nani dawankam ra naku wima: Dawan mita naku win sa: ‘Aisanka nani walram ba dukiara si bripara, baha bîla wal sika laihtuban, Asiria kingka albika nani ba mita.

⁷ Kaiks yang mita witin ra sturi binka daukamni, bara witin nani naha sturi binka ba walbia, baku sin ai tasbaya ra kli tawi wabia bara baku yabrika ai tasbaya ra prubia, upla mita ikbia.’ ”

⁸ Asiria war wihta ba, tânka brin Asiria kingka ba Laquis tawanka wina wan. Baku bamna, Jerusalem wina mahka wan bara Asiria kingka ba wal prawan, Libná tawanka mapara war aiklabi kan.

⁹ Ba purkara sin pat walan kan Tirhaca, Etiopía kingka ba mapara war daukaia wan kan ba. Bara witin kli tawan nani kaina aihwawakra nani ba blikan wan Ezequías ra naku wiaia:

¹⁰ “Ezequías, Juda kingka ra naku wis: Man Gâdkam witin ra man kasak lukisma ba, ¿man ra tâm baikbia lukisma ki bara Jerusalem ba, yang karniki mununhtara kauhbia apia lukisma? Baha dukiara upla yarka kunin mai munbiara.

¹¹ ¿Man pat walram apia, Asiria kingka ba mita tasba nani ailal pali sauhki tikan, bara man swak takma lukisma ki?

¹² ¿Yang damiki nani, upla sât wala nani uya sauhki tikan ba, gâdkam nani mita swaki sakan ki: Gozán, Harán, Résef, Bet-edén uplika nani Telasar ra iwi kata ba?

¹³ ¿Hamat kingka ba anira sa? ¿Arpad kingka ba sin, bara Sefarvaim tawanka kingka ba, Hená kingka, Ivá kingka sin?”

¹⁴ Bara Ezequías ba, naha nani ai tawanka bîla twatwilkra nani mihta wina wauhkataya ba brin, bara aisi kaikan. Ba ningkara, Dawan watla ra uli wan, bara Ezequías ba naha wauhkataya na Dawan lamara kwâki mangkan.

¹⁵ Bara Ezequías ba naku ai pura suni, win:

¹⁶ “Dawan karnika sut brisma ba, Israel Gâdka, kirubin nani tilara man iwisma ba, man baman sika king tasbaika nani tasba ra ba, Laih Purara Gâd pali sma; man sika tasba bara kasbrika purara pali ba sin daukram.

¹⁷ Dawan, man kiamam pri tniki yang ra wals: Dawan, namkra nani ba ilingki kaiks bara Senaquerib aisanka ba sin wals, witin sika Gâd rayakira sma ba mampara aisisa.

¹⁸ Dawan, kasak sa Asiria kingka nani ba nisan ailal tasbaika nani sauhki tikan.

¹⁹ Baku sin ai gâdka nani pauta ra angkan baha nani ba, gâd nani apia kan bamna, sakuna upla mita daukan, dus nani bara walpa nani ni daukan kan ba. Baha mita sika sauhki tikan ba.

²⁰ Bamna yang nani ra, Dawan wan Gâdka, nanara swaki wan sâks karnikam ba ni, witin nani mihta ba wina mamkabisna, bara king tasbaya nani kaikbia man baman Dawan Gâd sma ba.”

²¹ Bara Aiseya, Emus luhpia ba mita, Ezequías ra ai bîla bliki win: “Dawan Israel Gâdka ba, naku wisa: ‘Man Senaquerib Asiria kingka dukiara yang ra makabram ba yang walri.’ ”

²² Naha bîla nani sika Dawan aisan ba, Asiria kingka ba dukiara: “Saion luhpia mairin tiara baku Senaquerib lawaska kikisa. Man ninamra, Jerusalem luhpia mairin ba, ai lal wauhisa man mahka taki auma ba ra wisi.

²³ ¿Ya ninara saura aisi lawaska kikram? ¿Baku sin ya mapara bîlam karna saki aisaram bara Israel sunukira Gâdka mapara namkra nani ba pura kat bukram?

²⁴ Man nani dukiam dadaukra nani bâk Dawan mapara saura aisaram: ‘Yang waginki aiklabaia ailalka ba wal, il purara uli wari, bara Líbano ra tawi dimi wari. Bara ai yalamka, ai awaska kau pranakira bara yari nani ba sin klakri. Bara sin kau unta biara ra dimi wamna, baha untika puka, tangni kau pranakira bâra ba kat.

²⁵ Tasba tringsar ra yang mita liwanhta salhki ai layawanhta ba wina sin diri; bara yang mini bîla nani ba wal sin Idsip tingnika nani aiska ba sin lâkri.’

²⁶ ¿Man aima kumi sin walras kapram ki, yang, Dawan mita naha dukia nani sut daukri kan ba? Patitara yua nani ba wina pat daukaia luki kapri bara nanara yang mita baha ba daukri sa; baha mita sika man bui tawan karnakira pali kutbanka tara nani daukan ba sin, sauhki âpu daukisma.

²⁷ Bahara iwi uplika nani ba, tânka tara, ai karnika âpu pali kan, bara ai swira sibrinkira pali nani kan, baku sin aiblakwi tanis man sin tauki kan, bara witin nina ba sin, inma wahia nani baku takan, ba purkara lalma payaska laptika mita angkan.

²⁸ Yang sut pali kaikisna dîa dîa daukisma ba, taki wisma bara bal dimisma ba sin, bara sin kaikisna, yang maipara kupiam baiki daukisma ba sut.

²⁹ Bara kupiam sauhkram ba kaikisni, praut takram ba sin, bara diara krukma kum kakmam ra klauhbi mangkaisna, bara unam mangkaika sin, baku kli mai lakrika wama ani yabalka balram bâk.”

³⁰ Bara Aiseya, Ezequías wal ra win: “Naha ba sain kum takaia kabia: Naha mani na bara mani wala ba wal plawar mâ nani ban wina pâwbia, bara baha wina man pima, bara mani yumhpika ba lika mangki dâkma, bara wain nani sin mangki saki, baha wina mâ nani pima.

³¹ Bara ya nani pruras swakwan nani ba, Juda ra inta wahia baku pâwi kabia: ai wakia nani sâkbia bara mâ ailal sin sâkbia.

³² Kan Jerusalem ra takaskan yaba sin takbia, bara Saion ilka ra sin pruras swakwan nani ba bâra kabia. Naha ba Dawan karnika sut pali bri ba latwanka lâka ba mita daukbia.

³³ “Bahamna, Dawan mita naku wisa Asiria kingka ba dukiara: ‘Jerusalem ra sip pali dimbia apia, bara sip sin trisba kumi sin mangki lulkbia apia, baku sin witin ai mapara, ai lama prâka aiklabaia dukia kan kahbaika wal sin sip balbia apia, ba purkara sin ai yukuwaika sip sâkbia apia.

³⁴ Ani yabalka bâk balan kaka, bâk kli tawi wabia, sakuna naha tawanka ra lika sip bal dimbia apia. Yang, Dawan, baku aisisni.

³⁵ Kan yang mita sika naha tawanka na kaina kahbamna swaki sakaia mata, yang laitwanka ra bara naipakan Debit latwanka ra sin.’ ”

³⁶ Bara Dawan insalka ba taki wan bara upla 185,000 ikan Asiria nani kiampka ra; witin nani titan buan ba ra, kaikan witin nani wîna tara sut ba, upla pruan man kan.

³⁷ Bara Senaquerib, Asiria kingka ba kli tawi mahka wan Ninibi ra, bahara sika witin takaskan.

³⁸ Bara witin yua kumi ra ai gâdka Nisroc priaska watla ra dimi mayuni kan ba ra ai luhpia nani Adramélec Sarézer wal bui sord wal klaki ikan, bara Ararat tasbaya ra plapi wan. Bara witin ai watlika ra ai luhpia waitna Esarhadón ba king aimakan.