Aiseya 32 - DAWAN BÎLA AISKA

King lâka kasakkira ba

¹ Kaiks king kum aimakbia kasak lâka ra ai kingka ba tâ bribia wihta tara nani ba sin lâ wapni kat tâ bribia.

² Witin nani kumi bani ba, pâsa krawi ba mapara wan yukuki watla baku kabia, lî auhi ba mapara, wan yukuwaika watla baku, tasba lâwan ra lî kârma nani baku kabia, lapta bitni pali piua ra walpa tara distika wanki ba baku upla iwras tasbaya ra.

³ Ai nakra nani ba param pali kaiki kabia, aman walaia ridi pali kabia;

⁴ witin nani ai sringka kira diara daukbia apia, sakuna sins lâka ra aisi daukbia, aisi ba twisa ba param ingni aisabia.

⁵ Upla kupia saura takan nani ba ra upla kupia painkira sa wibia apia, kunin mamunra ba, upla yamni sa wibia apia.

⁶ Kan upla kupia saura nani ba kupia saura lâka aisisa, ai lukanka ba watawi daukaia lâka baman dukiara lukisa, lâ krikaia daukaia dukia baman plikisa Dawan mapara aisisa, plun dauki nani ba mihta ra diara yabras swin auya diran dauki nani ba diranka yabras.

⁷ Kunin mamunra kunin wal ai tâ baikisa, alkaia kiwka nani mangkisa umpira kaikras lâka ra; umpira nani ba kunin ni blakaia, diara luha umpira nani, kasakka lâka ra makabi nani ba mapara.

⁸ Sakuna kasakkira kunin aisaras ba, kunin âpu lâka baman luki kaikbia, bara kunin âpu lâka ba mita purara bukan kabia.

Jerusalem mairka nani daukanka mapara

⁹ Bara mairin nani, man nani trabil taki lukras sma ba, yang bui man nani ra aisisna ba wals. Mairin nani briaia baman bîla kaikisma ba, man nani bui yang bîli nani na wals.

¹⁰ Nanara sâp sma, sakuna kau piua wiria, mani kum ningkara, man nani sirang tara iwma. Kan man nani mâ nani wahbaia âpu kama, mâ nani dakban sin âpu kama.

¹¹ Man nani sâp sma ba tatatwi bas, sari takras mairka nani, man nani trabil taki luks; man nani âmyapah mairka nani, man nani prâmka daiks, sari prâka dims, kwala sukra ni man nani maisam wilks.

¹² Man nani lamam pruki inma insla painkira nani kan ba, wain dusa mâirira kan sauhkan ba sarka.

¹³ Yang upliki nani tasbaya purara, kiaya bara rahra nani pâwbia, tawan tara ra, utla nani kau liliakira nani kan ba purara sin.

¹⁴ Lâ watla tara nani ba sut, upla iwras tasbaya baku takaskbia, tawan tara ra upla kwâra ba âpu takbia; utla karnakira nani ba sin batakan kabia; bahara biriku wail nani ba takaski kabia, bîp wakabi piaia watla bribia.

¹⁵ Sakuna yawan wan purara Dawan papaskra karnika ba kli balbia, bara upla iwras tasbaya ba kli tasba disang takbia, bara tasba disang ba unta tara tasba mâirira pali kabia.

¹⁶ Tasbaya aiska ra kasak lâka, wapni lâka baman dauki kabia.

¹⁷ Kasak lâka daukanka nani ba wina kupia kumi lâka takbia; kasak lâka warkka nani ba wina ris briaia, wan kupia kumi lâka ban kaia ra briaia bal takbia.

¹⁸ Bara upliki nani ba kupia kumi pliska ra iwbia, kli pât munras watla nani ra iwbia, ris bri lilia kabia,

¹⁹ âu, unta tara pâwan nani ba sut klakbia, tawan ba sin sauhkan kabia sakuna,

²⁰ man nani lika lilia pali iwi kama, lî nani lamara saumuk mangki kama, bara bîp wainhka nani, biriku nani sin, pata nani sin manis kabia.