Aiseya 31 - DAWAN BÎLA AISKA

Idsip uplika nani wina ai tâ baikanka pliki ba mapara

¹ Saura pali kabia Idsip hilpka briaia pliki auya nani ba, bara aras nani ra ai lukanka mangki bri nani ba, bîla kaikanka nani bri nani ba sin, wagin ailal pali bri ba mita, aras âiulra ailal sin, baha mita ban witin nani ba kupia karna sa; Israel Gâd Holikira bâra ba lika kaikras, witin nani Dawan ra sin plikras.

² Sakuna witin sin sinskira sa, bara klala saura nani bri balbia, bara ai bîla nani aisin ba kli lakbia apia. Witin saurakira nani ba mapara aisabia, baha nani watawika lâka dauki nani bara hilp muni nani ba mapara sin.

³ Idsip uplika nani ba upla sa, gâd apia, ai araska nani ba spirit apia, wîna nani sa; baku bamna Dawan ai mihta sakbia klala yabaia, bara kan kakahbra nani baku sin ai kan kahbi uplika nani sin kauhbia; sim piua ra sut prui tiwbia, sut dring prubia kumi baku.

⁴ Dawan bui ai win: “Layan kum bui sîp kum ra alki ikan ba baku, sepad nani daknika kum aidrubi asla taki witin mapara balbia sin, sakuna ai bîla baikra ni sirang ikbia apia, witin nani binka dauki ba mita ni sin sasibrira takbia apia; karnika sut bri Dawanka ba sin baku aiklabi bal iwbia Saion ilka purara.

⁵ Tnawira nani âpi ai watla purara pâli kaiki ba baku, karnika sut bri Dawanka, Jerusalem ba kan kahbi kabia; main kaiki swaki sâkbia, tâwan aimaki pri sâkbia.”

⁶ Israel luhpia nani, witinka ra kli tawi bal, witin mapara man nani sîa briras pali buram ba.

⁷ Baha piua ra upla nani aidulka silbar ni bara gul ni sin daukan ba sut lulkbia bara baha man nani mihtam ni paski mihtam tâski daukram ba.

⁸ Bâra mika Asiria nani ba sord ni batakan kabia, sakuna upla karnika ni lika apia. War ba mita munka ai uplika nani plapbia, bara ai wahmika nani bara tiara nani ba alba bribia.

⁹ Sibrin mita ai kingka ba taki plapbia bara ai watla karnakira nani ba swih plapbia war aiklaklabra wihtka tara nani ba sin, sibrin tara mita ai plakinka nani ba swih plapbia. Dawan ba naku wisa, witin lika upla angkaia pata klauhanka ba Saion ra ridi brisa, diara angkaika ba sin Jerusalem ra, ai waihla nani ba klala yaia ridi brisa.