Aiseya 25 - DAWAN BÎLA AISKA

Dawan ra mayuni aiwananka

¹ Dawan, man ba sika yang Gâdki sma; purara mai bukamni, ninam mayunamni, kan man lika diara aihkakira nani ba daukram, blasi pali wina man lâ smalkram bîla nani ba, kasakka lâka ban ba mita.

² Tawan tara nani ba walpa kiaubi paskan nani baku dauki swiram, tawan karnakira nani ba sauhki swiram; waihla nani watla tara nani ba sut slingbram, baha nani kli sin paskan kabia apia ban kaia ra.

³ Baha mita upla karna nani ba yamni mai kulkisa, prautkira nani tawanka tara ba man ra sibrin lukbia,

⁴ kan umpira nani watla man aimakram bamna, diara luha, ai sarka bri nani karnika man sma, skwal mapara yukuwaika, lapta mapara distika. Kan upla tataibra nani karnika ba, skwal kumi kauhla piua ra kutbanka kum ra platukbi ba baku sa,

⁵ apia kaka tasba tawan pliska ra bitni ba baku, tringsar nani prautka lâka ba taibi brisma wina batakma bitni lapta kasbrika distika ra taiban ba baku. Upla ra saura rausasauhkra nani ba taibi brisma witin sâp kaia.

⁶ Saion ilka ra, Dawan karnika sut bri ba mita, nisan nani sut ra lilia kum daukbia, pata piaia auhni bara wain laya pain ba ridi daukisa.

⁷ Naha ilka ra pura bikaika kum bâra ba, upla nani sut pura praki ba witin mita sauhki tikbia, kwala nisan nani sut ra sruki bri ba.

⁸ Ban kaia ra ban prura ra, Dawan mita sauhkan kabia; mawan nani wina, Dawan mita nakra laya nani sut diki sâkbia bara tasba aiska wina ai uplika nani swira lâka ba bri sâkbia. Dawan ba aisin.

⁹ Bara baha yua ra witin nani wibia: “Kaiks, naha sika yawan wan Gâdka, yawan lika witin ai bîla kaiki kan, nanara witin swaki wan sakan, yawan lilia kap witin swaki wan saki ba mita, yawan lilia daukpi.”

¹⁰ Dawan mita Saion ilka ba kaina kahbi kabia, sakuna Moab lika ai mina ra taiban kabia, dipasta lulkan wan mina ra taiban ba baku.

¹¹ Moab ai klahkla sâkbia lî yayawra kum ai klahkla sakbi ba baku, sakuna ai klahkla lulki ba ni ai prautka ra kau rungwi kabia.

¹² Bara Dawan mita tawanka walpaya kutbanka nani ba batakbia, slingbia, tasba kat lulki swibia.