Aiseya 20 - DAWAN BÎLA AISKA

Asiria mita Idsip bara Etiopía wâlsut pura lubia

¹ Piua kum bâra kan, Asiria kingka Sargón mita, war lalka tara kum Asdod tawanka ra blikan. War lalka tara ba bahara wih aiklabi pura luan.

² Baha piua ra Dawan, Emus luhpia Aiseya wal aisi, win: “Man krukus kwalka dimisma ba daiks, minam ra sûskam ba sin.” Bara Aiseya baku daukan, ai prâka tara ba daiki ai mina man tauki kan.

³ Bara Dawan bila win: “Yang duki dadaukra Aiseya ba mani yumhpa sûs âpu bara ai prâka tara ba dimras tauki kan, Idsip bara Etiopía wal mapara sain baku mariki kan.

⁴ Asiria mita, Idsip uplika nani ba priski brih wabia, baku sin Etiopía wina kangbi sakan nani ba; wahma nani, almuk nani, kwala luha, ai mina man, tnata pura bikras, Idsip uplika nani ba swira daukaia dukiara.

⁵ Bara witin nani ai kupia trabil munbia, ai swira sin lukbia Etiopía ra kan bahara bîla kaikanka bri kan ba, bara Idsip ra, ai mayunra kan ba.

⁶ Bukra kabu un ra iwi uplika nani ba sut baha piua ra witin nani aisabia: ‘Man nani kaiks baha waitnika ra yawan bîla kaikanka bri kata ba; witin dîa kat bal takaskan ba, yawan bui witin ra plapi hilp makabi kata ba, Asiria kingka mihta wina pri wan sakaia dukiara. ¿Nanara yawan nahki swak takaia?’ ”