Aiseya 18 - DAWAN BÎLA AISKA

Etiopía mapara dahra aisin ba

¹ Saura kabia baha tasbaya wina, daiwan lupia nani tnawa binka dauki ba, Etiopía awalka nani baila wala ra bâra ba;

² baha wina Nilo awala bâk kuntri lengstarka nani blikisa, yauhrus dusa ni duri tara nani paski lî bâk impakisa. Bîla twatwilkra nani, man nani isti was, tawan kum upla yakura taya lipni nani bara ani anira nisan wala nani mita sîa ba karnakira, prautkira nani ba tasbaya ra awala man kir bâra iwisa.

³ Man nani sut, tasba aiska ra iwisma ba, tasbayam ra iwisma ba sin. Il nani purara sain nani bukbia ba ra, man nani kaikma, trumpit puhbia ba ra, man nani walma.

⁴ Dawan bui ai win: “Pliski ba wina trabil âpu kira kaiki kamna sin, mani piua ra lapta ingni pali taki baku, diwas laya kasbrika bitni pali piua ra buski ba baku, sâp kamna.

⁵ Mâ krikaia kainara, mâ pain nani tilwan ba ra, tangnika nani ba kauhan, mâ nani ba sukwisa, tnawa lupia nani ba dauhbisa, skiru ni klaki tnawa nani ba sin sakisa.

⁶ Bara baha sut ba unta ra lulki swin kabia, tnawira nani pata kabia, bara daiwan wail nani ba pata swibia; tnawira nani ba, lapta piua ra ai pata piaia awarka bahara bribia, daiwan wail nani bâra ba, kauhla piua ra ai pata piaia awarka bahara bribia.”

⁷ Baha piua ra karnika sut bri ba Dawanka ra, prisantka nani brih balbia, baha uplika nani yakura taya lipni nani, ani anira nisan wala nani mita sîa ba karnakira prautkira nani ba wina, ai tasbaya ra awala nani kir bâra iwi ba, prisantka nani ba Saion ilka ra brih balbia, karnika sut bri ba Dawanka ra baha ra ai pura suni ba ra.