2 Tesalonaika 3 - DAWAN BÎLA AISKA

Yang nani maita puram suni bas

¹ Tnata ra, muihki nani, yang nani maita puram suni bas, Dawan sturka yamni ba aihni pali plis plis ra wabia, bara baha ba yamni kulki bribia, man nani tilamra takan ba baku.

² Upla saurakira nani bara watawikira nani wina dakbi wan sakan kabia dukiara sin puram suni bas. Kan upla sut lika sturi yamni ra kasak lukras sa bamna.

³ Sakuna Dawan lika kasak sa, bara witin mita man nani ba karna mai daukbia bara saura ba wina main mai kaiki kabia.

⁴ Bara yang nani lika Dawan kat lukisni, man nani, yang nani mai wîri dukia nani ba daukisma, bara ba kat sin ban dauki kama.

⁵ Dawan mita tâm baikbia latwan kaikaia, Gâd latwan kaiki baku, bara Kraist bapi buanka lâka bri kaia pât wahwanka ra.

Wark takaia tânka ba

⁶ Muihki nani, wan Dawan Jisas Kraist nina ra adar maiki banhwisna, ani uplika nani wark takan daukras ba wina tnaya ra tawma, witinka nani ra yang nani mita smalkanka yabri ba kat sip iwras ba.

⁷ Kan pain pali kaikisma yang nani daukri ba baku, man nani sin daukaia sip sma. Man nani aikuki kapri ba ra, yang nani na sringwaskira apia katna.

⁸ Yang nani upla kumi pata sin aibapras piras kapri. Kuna, kakna bara tihmia wark taki banhri, trabil sin takatna, man nani tilam kat karban wirha kumi sin maikaia apia dukiara.

⁹ Yang nani kasak lâ bri kapri, man nani wina hilp makabaia, sakuna ban wark takri; yang nani baku daukri, man nani sim sât dauki kama dukiara.

¹⁰ Man nani aikuki katna ba ra, yang nani mita naku mai wisatna: Ya ya wark takaia want apia ba, plun sin pibia apia.

¹¹ Yang nani mita naha na mai wisna, kan sturi walri man nani tilam wina upla bâra sa wark takras baman sa, bara diara dauki banhras, upla wala nani bisniska tilara dimaia baman.

¹² Wan Dawan Jisas Kraist karnika mita, baha uplika nani ra smalki wisna bara adar sin yabisna, witin nani sâpkira wark taki kabia, ai pata saki pi kaia dukiara.

¹³ Muihki nani, diara pain daukisma ba ra swappara.

¹⁴ Ya ya naha wauhkataya ra ulbi wisna na bîla wali daukras kaka, uplika ba aman pali kaiki bas, bara witin wal bisnis âpu bas; baku witin ai swira bri kabia.

¹⁵ Bara witinka ba, waihlam baku kulkpara, sakuna muihkam baku lâ yabi bas.

Prakaia lakula nani

¹⁶ Bara kupia kumi lâka Dawanka ba mita, piu bani kupia kumi lâka natka sât sât ra maikbia. Dawan ba man nani sut aikuki kabia.

¹⁷ Yang Pal mihti ni naha lakula na mai ulbisna. Wauhkitaya sut ra yang nini naku sain munisna; naku ulbisna.

¹⁸ Wan Dawan Jisas Kraist, man nani sut puramra yamni mai munbia.