2 Tesalonaika 2 - DAWAN BÎLA AISKA

Dawan kli balbia ba dukiara, param sakanka nani

¹ Bara muihki nani, wan Dawan Jisas Kraist bal, witin wal asla wan daukbia tânka ba mapa ra man nani ra mamkabisni,

² kupiam lukanka ba ban isi pali sins munpara, yarka sirang mai ikbiara, bîla aisin walma kra sin apia, wauhkataya yang nani mai blikri alkram kabia sin apia, baha sut mita Dawan yua ba pat balan mai wibia sin apia.

³ Upla kumi mita sin yarka kunin mai munbiara. Kan baha yua kainara, Gâd mapara buaia lâka ba pas balaia sa, upla saurakira ba bal takbia, witinka tanis tiwaia pâtka ra lulkan ba.

⁴ Naha sika waihla kum, diara sut Gâd nina bri ba mapara bûi ba, baku sin pura suni mayunaia tânka bri ba mapara buisa. Bara ban sin Gâd tempelka ra dimi iwisa, Gâd kan baku, bara witin pali ba Gâd wisa.

⁵ ¿Man nani kupiam kraukras ki, wal aikuki kan ba ra, naha sut mai wi kapri ba?

⁶ Bara nanara man nani tânka brisma, dîa ba mita alki takaskisa, ai piua kau aimakras ba ra latan takbia apia dukiara.

⁷ Baku bamna, saurka dahra yukukan ra ba, pat yabal ra sa; sakuna bîla kaikisa baha alki takaski bri ba tila wina sâkbia ba.

⁸ Bâra mika, baha saurakira ba bal takbia ba ra, Dawan Jisas mita ai bîla wingka puhbanka ni ikbia, bara witin aula ingnika ba wal sauhki tikbia.

⁹ Baha saurakira balaia ba lika, Sitan hilpka wal balbia, bara karnika tara wal balbia, sain nani, diara aihkakira kunin sâtka nani wal sin.

¹⁰ Bara watawi lâka sât sât daukbia, sauhki tikan lâka ra auya nani ba, kunin munaia dukiara; kan baha nani kasakka lâka ba alki briaia bara latwan kaikaia want apia kan, ai swaki sakanka alkaia dukiara.

¹¹ Baha mita, Gâd bui swisa mistikka nani ba mita kunin munbia, bara kunin lâka ra kasak kulkbia.

¹² Naha tâka mita, ya ya kasak tânka ra uya lukras, sakuna saurka lâka ra kau lihki kan nani ba, pât ra lulkan kabia.

Bâk sakan nani sa, swak lâka briaia dukiara

¹³ Muihki nani, Dawan mita latwan mai kaikan ba, yang nani lika piu bani man nani dukiamra Gâd ra tingki wiaia sna, kan patitara piua wina, Gâd mita bâk mai sakan sa, man nani pas sika swak takan lâka briaisma ba, Spirit Holikira karnika bâk Gâd uplika pali mai daukbia, bara kasak tânka ra kasak lukram ba mita sin.

¹⁴ Swaki sakanka sturka yamni, yang nani mai smalkri bâk, Gâd naha dukiara mai paiwan sa: wan Dawan Jisas Kraist prana ra sirkam brima dukiara.

¹⁵ Baku bamna, muihki nani, kasak bapi bûi bas, bara smalkanka nani, yang nani pali mita mai smalkri ba bara wauhtaya ra sin ulbi mai wîri ba, âmya tikpara.

¹⁶ Wan Dawan Jisas Kraist pali mita bara Gâd wan Aisa, witinka ai yamnika ra latwan wan kaikan ba, ban kaia ra maisa nihkra wankan ba, bara bîla kaikanka yamni kum sin wankan sa,

¹⁷ kupiam nani tâ baikbia bara karna sin mai daukbia, diara yamni baman aisama bara daukma dukiara sin.