2 Samuil 9 - DAWAN BÎLA AISKA

Debit bui Mefi-bóset ra yamni munisa

¹ Yu kumi Debit makabi walan: “¿Saúl taika kum kau pruras raya bâra sa ki, bara yang bui Janatan ra luki witin ra yamni munaia?”

² Saúl taika wina wark tatakra kum bâra kan, nina Sibá, witin nani mita witin ra paiwan Debit mawanra buaia. Sibá king mawanra buan ba ra, witin ra makabi walan: —¿Man ba Sibá? Witin pana win: —King tara, dukiam daukaia buisna.

³ King bui witin ra makabi walan: —¿Saúl kiamka kum kau bâra sa ki, Gâd nina ra witin ai dukiara yang diara kum daukaia? Sibá pana win: —Âu, Janatan luhpia kum kau bâra sa mina wâl skahwa.

⁴ King ba win: —¿Anira sa? Sibá pana win: —Lodebar ra sa, Maquir, Amiel luhpia watla ra.

⁵ Bara king adar yan, baha pliska wina witin ba bri balaia.

⁶ Mefi-bóset, Janatan luhpia, Saúl mulika, witin Debit mawanra wan ba ra, ai lal makupan yamni kulkan tukinka baku. —¡Mefi-bóset! —Debit karna aisin. Witin pana win: —King tara, man adarkam nani ba kat.

⁷ Debit bui witin ra win: —Si bripara, yang bui man ra yamni mai munaisna, papikam Janatan ra luki. Daukaia sna ba damikam Saúl tasbaya nani kan ba sut kli laki maikaia, bara man lika yang tibilki ra ban kaia ra plun pi kaia.

⁸ Sakuna Mefi-bóset ai lal makupi bara win: —Sakuna, king tara ba, ¿dîa muni ai albika na ra tawi kaikisa, yang na yul prura kum sna na?

⁹ Ban sakuna, king ba Sibá ra winan, Saúl dukia dadaukra almuk kata ba, bara witin ra win: —Man dawankam mulika na mihtam ra mangkuna, witin bara ai taya nani diara bri kan nani ba sut sin.

¹⁰ Baku ba mita man, luhpiam nani bara albikam nani sin sut, tasba baikma witin ai dukiara. Plun mâ nani ba plun watla ra kuki sunma bara baku dawankam taika nani ba kan sunan kabia. Mefi-bóset ai mulika ba lika, ban yang wal tibilki ra ban kaia ra plun pi kabia. Sibá ai luhpia waitna nani 15 bri kan, ai albika nani lika yawanaiska kum,

¹¹ bara witin pana king ra win: —Diara bani king adarkam wiram ba, naha albikam na witin baha daukbia. Bamna piua bani Mefi-bóset lika Debit tibilka ra plun pi kan, king luhpia nani kumika baku.

¹² Baha purkara ai luhpia waitna lupia kum bri kan nina Micaías, baha nani sut Sibá watla ra iwi kan ba, Mefi-bóset dukia dadaukra nani kan.

¹³ Sakuna Mefi-bóset mina wâlsut skahwa kan ba, Jerusalem ra iwi kan, witin king tibilka wina ban plun pi kan bamna.