2 Samuil 8 - DAWAN BÎLA AISKA

Debit war nani aiklabanka

¹ Baha ningkara Debit filisteo nani pura luan, kingka lâka karnika ba sut mihta wina dakban.

² Moab uplika nani ra sin pura luan, bara yan witin nani sut tasba ra aitnikan, bara kulki kaikaia kiwka brih kulki kaikan: kiwa wâl kulkanka bilara aimakan ba, ikaia pâtka ra lakan, kiwa kumi kulkanka bilara aimakan ba, ikras swin. Baku Moab uplika nani ba sin yan Debit ra bawan, bara ai lal mana sin aibapaia kan.

³ Hadad-ézer, Rehob luhpia, Sobá kingka ra sin, Debit bui pura luan, witin auya kan ba ra Éufrates awala tasbaya lamara, ai tasbaya piarkika kulki briaia.

⁴ Witin nani wina suldiar aras âiulra nani 1,700 alkan, wapi aiklaklabra nani sin 20,000 kum; baha purkara war aiklabaia waginka raski araska mina nani sin sut krikan. Wagin nani 100 kum raski araska nani ba baman ban swin.

⁵ Naika Damaskus wina Siria uplika nani sin wan Hadad-ézer, Sobá kingka ra hilp munaia, sakuna Debit bui Siria uplika nani ra sin pura luan, bara 22,000 ikan.

⁶ Ningkara Debit bui Damaskus Siria ra aiklaklabra daknika mangki swin. Siria uplika nani sin yan witin ra bawan, ai lal mana sin aibapaia kan. Baku bamna Debit ani anira wan ba, Dawan wina pura lui buaia karnika ba yan.

⁷ Baha ningkara Hadad-ézer wihtka tara nani ai kan kahbaika gul ni daukan bri kan ba sut mihta dakban, bara Jerusalem ra brih wan.

⁸ Bras nani sin ailal pali dakbi brin Bétah wina bara Berotai wina sin, naha tawanka nani ba sut Hadad-ézer dukia kan.

⁹ Hamat kingka Toi ba sin walan, Debit bui Hadad-ézer wal war aiklaban bara suliarka nani sut ra pura luan,

¹⁰ bara witin ai luhpia Joram blikan, king Debit ra naha diara nani wal paskan dukia nani: silbar, gul, bras, baha bri si Debit ra lakula daukaia, Hadad-ézer wal war aiklabi pura luan ba dukiara.

¹¹ Naha diara bani sut ba, Debit yamni muni bara Dawan ra yan, gul bara silbar nisan nani sut wina yan ba:

¹² Edom wina, Moab wina, Amón wina, filisteo nani wina, Amalec uplika nani wina, bara war aiklaban ra Hadad-ézer wina sin dakban ba, Rehob luhpia, Sobá kingka ba.

¹³ Debit lika Sâl Ilka bîla ra, Edom uplika nani 18,000 iki si tawi balan ba ra, mayunra ba kau tara daukan.

¹⁴ Ningkara Edom aiska ra suldiar nani mangkan, bara Edom uplika nani sut Debit ra bawan. Ani anira witin wan baha tawanka sut ra pura luaia karnika ba Dawan wina witin ra yan kan.

Debit wihtka tara nani

¹⁵ Debit lika Israel luhpia nani sut kingka aimakan bara kasakka lâka, wapni lâka kat daukan upla sut wal.

¹⁶ Suldiar nani sut wihtka tara ba Joab kata, Seruiá luhpia ba; wala ba Josafat, Ahilud luhpia, king wauhkataya âiulbrika.

¹⁷ Sadoc, Ahitub luhpia, bara Ahimélec, Abiatar luhpia, witin nani sut prîs atia kan; Seraías ba king watla sturi âiulbra kan.

¹⁸ Benaías, Joiadá luhpia ba, quereteo nani bara Pélet uplika nani suldiarka wihtka kan. Debit luhpia waitna nani ba lika prîs nani kan.