2 Samuil 7 - DAWAN BÎLA AISKA

Dawan pramis takisa Debit ra ai yamnika yabaia

¹ King ba mahka ai watla ra dimi iwan, bara Dawan sin kupia kumi lâka ba witin ra yan, ai waihla nani ai kaina kir sut ba ra sin,

² bara witin prapit Natán ra win: —Nahki man kaikaia sip sma, yang lika yalam ni mâkan watla bilara iwisna, sakuna Dawan lâka auhbaia watla ba lika kwala kutbanka bilara brisa.

³ Natán pana witin ra win: —Dîa daukaia lukankam ra ba sut dauks, Dawan hilpka ra lukisma ba wal.

⁴ Sakuna baha pali tihmika ra, Dawan, Natán ra balan bara win:

⁵ “Yang albiki Debit ra was, wal aisas bara wis, yang Dawan, naku wisni: ‘Man apia sika yang ra tempel kum mâki aikma, yang baha ra iwaia.

⁶ Israel luhpia nani ba Idsip wina sakri ba yua wina naiwa kat, yang tempel nani ra kau iwras, sakuna tint watla nani ra ban taukisna.

⁷ Witin nani aikuki taukri ba piua sut ra, wihta kumi ra sin yang kau makabras, yang upliki nani, Israel luhpia nani tâ bri, yalam dusa ni yang ra tempel kum mâki aikbia.’

⁸ Baku ba mita wis, yang albiki Debit ra, yang Dawan karnika sut brisna ba, witin ra wisni: ‘Yang klar wina mai sakri, sîp daknika ninara wapi tauki kaia ba, baku sin yang upliki Israel luhpia nani wihtka aimakaia.

⁹ Man wal wari, ani anira man waram ba, waihlam nani mampara buan ba sut yang bui âpu daukri, ninam mayunra tara maikri, naha tasba uplika tara nani ai mayunra bri ba baku.

¹⁰ Baha purkara, yang upliki Israel nani dukiara plis kum pat ridi daukri sa, witin nani ba baha ra takaskaia bara ai tasbaya bri iwbia. Bahara upla witin nani ra trabil munbia apia, saura dadaukra nani bara upla tataibra nani sin blasi muni kata ba baku munbia apia.

¹¹ Upliki Israel nani pura wihtka aimakaia nani sakri ba ra yang daukamna, bara man nani kaikma waihlam nani wina pri mai sakri ba. Bara yang mamrikamna, man kiamkam nani maikamna ba,

¹² rayakam ba tnata alki man pruma ba ra, man kiamkam ba wina kum king mangkamna, bara yang bui ai kingka lâka ba karna daukamna.

¹³ Witin tempel kum mâki aikbia, bara ai kingka lâka ba ban karna kaia daukamni.

¹⁴ Yang lika witin ai aisika kamni, witin ba yang luhpi waitna kum kabia, witin ai swakwanka nani daukbia bara klala yamni wal wipamna, aisa nani sut ai luhpia ra muni ba baku.

¹⁵ Sakuna yang yamniki lâka ba lika witin wina sakamna apia, Saúl wina sakri ba baku, witin wina dakbi sakri ai watlika ra man mai mangkaia dukiara.

¹⁶ Yang distiki ra man pali kiamkam ba kingkam lâka ba sin ban kaia ra karna kabia, king iwaikam ba sin ban kaia ra bapi bûi kabia.’ ”

¹⁷ Natán witin kaikan bara walan ba sut Debit ra win.

¹⁸ Bara king Debit bal diman tint watla ra Dawan lamara wal aisaia, bara aisin: “Dawan, ¿yang na ya sna ki, bara yang taiya nani ba sin ya, man mita yang nani na naha kat ai bri balaia?

¹⁹ ¡Naha na diara bahki kum baku kulkram, Dawan, man ban luki bara aisaram albikam kiamka yua nani bîla kaikanka ba dukiara! Dawan, upla kumi sin man baku sip diara daukras.

²⁰ Dawan, ¿yang kau dîa mai wiaia sna ki, man mita yang albikam na kaikaia sma na?

²¹ Naha diara aihkakira nani sut daukram, man brinkam ba kat pramis wiram ba, yang baha diara nani ba tânka kaikamna dukiara.

²² Baha ba mita, Dawanki, tara kaia lâka ba man dukiam. Kan man baku wala âpu sa, gâd wala nani sin âpu sa man tnamya ra, yang nani sut pat walri ba baku.

²³ Israel luhpia nani dukiara, man uplikam nani ba, ¡witin baku wala âpu sa, witin nani ba baman bâk sakan nisanka kumi sa tasba ra! Man, Dawan, witin nani ba pri sakram witin nani man uplikam nani kaia mata, diara tara bara aihkakira nani witin wal daukram ba ra, man ninam ba purara pali bukram. Nisan wala nani sut ba ai gâdka nani wal, uplikam nani mawanra batakram, man bui witin nani ba Idsip wina atki sakram ba ra.

²⁴ Man ban baku lukram, Israel ba man uplikam ban kabia, bara man, Dawan, witin ai Gâdka kama.

²⁵ “Baku bamna, Dawan Gâd, pramiskam ba ban kaia alki bri bas, man albikam bara ai kiamka nani wal daukram ba bara man aisaram ba sin yarka aimakbia.

²⁶ ¡Man ninam ba tara kulkan ban kabia, bara wibia Dawan karnika sut pali bri ba, Israel Gâdka sa! Albikam Debit kiamka ba ban kaia ra distikam ra yukuwi, karnakira kabia.

²⁷ Man, Dawan karnika sut pali brisma ba, marikisma yang kiamki ba man bui ban buki bapi bri kama baha mita, yang diara lika apia, albikam kum baman sna, sakuna kupias taki naha baman mai walan ai daukisa.

²⁸ Man, Dawan, man ba Gâd, man bîlam ba kasakkira sa, albikam ra pramis munram kupia yamni lâka manis aihwa;

²⁹ aitani aihwa ban bas albikam kiamka nani ba yamni munaia, ban kaia ra kaina kahbi bas. Man, Dawan Gâd, pramis munram, yamnikam ba wal, albikam kiamka nani ba ban kaia ra yamni pali munan kabia.”