2 Samuil 4 - DAWAN BÎLA AISKA

Is-bóset ikanka ba

¹ Saúl luhpia Is-bóset walan, Abner ba Hebrón ra pruan, bara ai lukanka swapni takan, Israel aiska sin sibrin lâka ni aibanhwan.

² Is-bóset ai warkka tilara waitna wâl bri kan, witin nani ba âimplikra nani lalka tara kan. Kumi ba nina Baaná kata, wala ba nina Recab. Beerot Rimón wina ba luhpia nani kan, bara baku bamna, Benjamín kiamka nani, kan Beerot uplika nani ba Benjamín kiamka nani tilara kulki kan,

³ Beerot uplika nani ba Guitaim ra plapan sakuna, baha wina naha yua kat tringsar baku bâra iwi sa.

⁴ Bamna pain, Janatan, Saúl luhpia ba, ai luhpia waitna kum bri kan, nina Mefi-bóset, witin ai mina wâl ba skahwa kan. Mefi-bóset mani matsip bri kan ba ra, sturi ba Jezreel wina wan Saúl bara Janatan wâlsut ba pruan; bamna main kakaira mairin ba Mefi-bóset brih plapan, ai sringka pali plapi kan ba ra, tukta ba batakan bara baha tâka wina skahwa takan.

⁵ Recab bara Baaná wal, Rimón Beerot wina ba luhpia nani, Is-bóset watla ra wan yu wan lal kat pali kan ba ra, witin ai krikrika ra yapi ris bri kan ba piua ra.

⁶ Albika mairin watla durka main kaiki kan ba sin, plawar mâ klin dauki kan ba, witin sin yapi kan bara baku Recab ai muihni Baaná wal upla witin nani ra kaikras kan utla ba ra dimaia sip kan.

⁷ Watla ra witin nani diman ba ra, yapaia rumka ra Is-bóset ba aitniki kan; bamna lal ba klaki dakbi ikan, ningkara lal ba brih tihmia aiska Arabá yabalka ra wapan,

⁸ bara bri si Debit ra yan, witin Hebrón ra bâra kan. Witin nani king ra win: —King tara, Saúl luhpia Is-bóset lal ba nâra brisma, witin king tara wailhka kan, rayakam tikaia pliki kan ba. Dawan bui naiwa king tara ra yan, Saúl dukiara ai kiamka ra pana munaia dukiara.

⁹ Debit pana witin nani ra win: —Dawan nina ra man nani ra swer takisna, kupi wirhika nani wina witin pri ai sakan,

¹⁰ witin ban luki kan yang ra sturi pain kum ai wisa, witin balan ba ai wiaia Saúl pat pruan ba, sakuna baha sturka mana ba yang bui witin ba alki, Siclag kat silak ra mangki ikri.

¹¹ ¡Baha daukri ba baku man nani wal kau tara daukamna, watawikira nani, upla pâtkas kum man nani ikram ai watla pali ra aitniki kan! ¡Baha mita, ai pruanka mana ba maikrika man nani aibapma! ¡Naha tasba wina mai diki mai sakamna!

¹² Ba ningkara, Debit wihta tara nani ra adar yan, bara baha nani ba ikan; mihta nani bara mina nani klakan bara Hebrón ra lî watla lamara baha nani ba pami swin. Baha ningkara Is-bóset lal ba brih ki, Hebrón ra biki banhwan, Abner raitika ra.