2 Samuil 21 - DAWAN BÎLA AISKA

Gabaón uplika nani bui pana munan ba

¹ Debit king aimaki kan ba piua ra, mani yumhpa plun âpu kan, mani bani plun tiwi kan. Bara Debit baha dukiara Dawan wal aisin, bara Dawan pana witin ra win: “Plun wahwan ba lika Saúl bara ai taya nani tâka mita balan, witin nani bui Gabaón uplika nani ra ikan ba mita.”

² Debit bui Gabaón uplika nani ba paiwi aikuki aisin. (Witin nani ba Israel luhpia nani apia kan, amorreo nani dakni sirpi lupia kum takaskan kata, Israel luhpia nani witin nani ra swer takan kaina kahbaia. Baha nani ra sika Saúl bui Israel bara Juda wal tâwan lawi, iki âpu daukaia munan.)

³ Debit bui witin nani ra makabi walan: —¿Yang nani dîa man nani ra daukaia sip sna? ¿Man nani ra saura mai munan ba mana dîa dauki bara kli wapnikam daukamna, Dawan uplika yamnika briaia ba?

⁴ Gabaón uplika nani pana witin ra win: —Saúl ai taya nani wal yang nani daukaia brisna ba, lalah dukiara apia sa, yang nani sin brin ai daukras upla kum sin Israel ra pruaia. Debit bui witin nani ra win: —Ban kaka, man nani bui ai wis yang bui man nani tâmwan daukaia sna ba.

⁵ Witin nani win: —Baha waitnika wan sauhki tikaia lukanka brin ba wan sakaia, yawan nani na Israel ra ban takaski iwi kaia apia dukiara,

⁶ brin wan daukisa waitnika ba kiamka wina, taika 7 yang nani mihti ra mangkma, bara yang nani bui pami swimna Guibeá Saúl tawanka ra, Dawan mawanra. Dawan bui bâk sakan kingka ba. King ba aitani lukan baha nani ba witin nani mihta ra mangkaia.

⁷ Witin Mefi-bóset, Janatan luhpia, Saúl mulika ba dukiara lika ai kupia swapni takan, aisika Janatan wal kasakka lâka ra swer takan ba mita.

⁸ Ban sakuna, Rispá, Aiá luhpia mairin Saúl wal sakan ba luhpia waitna wâl ba alkan, kum nina Armoní, wala ba Mefi-bóset, wala Merab luhpia matsip ba sin, Merab, Saúl luhpia mairin, Adriel wal sakan ba, witin lika Barzilai luhpia waitna Meholá wina ba,

⁹ bara baha nani ba Gabaón uplika nani mihta ra mangkan, witin nani baha nani ba il purara bri si Dawan mawanra langki ikan. Baku baha nani 7 ba sut asla pruan, barli mâ namika ra dâki kan ba piua nani ra.

¹⁰ Bamna Rispá, Aiá luhpia mairin ba, sari lâka tukinka krukus kwalka talia dimi, walpa kum purara iwi kau ai pruanka nani ba main kaiki, barli mâ dâkan wina ban lî auhan ba kat, kakna ra tnawira nani sin swin bal piras, tihmia ra daiwan wail nani sin apia.

¹¹ Rispá, Saúl lila mairin daukan ba, witin nani Debit ra win ba ra,

¹² Debit wan bara Saúl dusa yuyaka nani, luhpia Janatan dusa yuyaka nani, Galaad ra Jabés bri kan ba sut wahbi brin, filisteo nani Saúl ra Guilboa ra pura lui ikan bara dusa nani ba, Bet-seán ra pulaia pliska ra swin kan ba wina baha impliki brin kan ba.

¹³ Ningkara Debit adar yan Saúl bara Janatan dusa nani ba, bara langki pruan dusa nani ba sin sut wahbi briaia;

¹⁴ bara aisika Quis raitika ra bri si bikan Selá ra, Benjamín tasbaya ra. King adar win baku, witin nani daukan. Bara baha ningkara, Gâd baha kuntrika uplika nani pura sunra ba walan.

Abisai mita Debit rayaka ba swaki sakisa

¹⁵ Filisteo nani ba kli war aiklaban Israel luhpia nani wal. Bamna Debit ai wihtka tara nani aikuki taki wan, witin nani wal aiklabaia. Baha yua Debit ba swapan pali kan,

¹⁶ bara waitna tarka tara kum bâra kan, nina Isbí-benob, Debit ra ikaia pliki kan. Ai langsika wirhika ba 66 paun pura bri kan, ai maisa ra sin sord raya kumi bri kan.

¹⁷ Sakuna Abisai, Seruiá luhpia ba, Debit hilpka ra wan, bara filisteo ba mapara aiklabi ikan. Bamna Debit waitnika nani bui witin ra win pramis takaia, kli war aiklabaia wabia apia witin nani aikuki, Israel ingnika ba daskaia apia dukiara.

Upla tarka tara nani ba mapara aiklabanka nani

¹⁸ Baha ningkara kli aiklabanka wala Gob ra brin filisteo nani wal. Baha piua Sibecai, husatita ba mita Saf ra ikan; Saf ba upla tarka tara nani ba kiamka kan.

¹⁹ Bara kli war wala Gob ra aiklaban filisteo nani mapara, bamna bahara Elhanán, Jaír luhpia Betlehem wina ba, Goliat Gat wina ba ikan, witin langsika dusa ba lika kahra tara baku kan, utla tisbaika dusa ba baku.

²⁰ War wala kli Gat ra aiklaban. Waitna kum bâra kan yari tara, mihta, mina sirpika nani 24 bri kan, mihta sirpika ba matlalkahbi bri kan mihta bani ra, mina ra sim baku. Naha sin upla tarka tara nani ba kiamka kan,

²¹ sakuna witin mita Israel ra pura luan bara Janatan, Simá luhpia, Debit muihnika ba, baha bui ikan.

²² Naha uplika tara nani walhwal ba sut, Réfah luhpia nani kan, Gat wina atia, sakuna sut Debit bara suliarka nani mihta ra kauhan.