2 Kronikas 8 - DAWAN BÎLA AISKA

Salaman diara wala nani daukan ba

¹ Salaman bui Dawan tempelka ba bara witin ai watla ba sin mâkan ba wina 20 mani luan ba ra,

² Salaman kli mâkan Hiram bui tawan nani yabata ba, bahara yan Israel luhpia nani iwaia.

³ Ningkara Hamat Sobá mapara aiklabaia wan, bara baha tawanka ba brin.

⁴ Bara Tadmor sin mâkan upla iwras tasbaya ra, baku sin kli paskan Hamat ra tawan bani wina plun auhbaia watla mâkan ba.

⁵ Bara sim baku Bet-horón pura tani tawanka nani ba, mâya tani tawanka nani ba sin kli karna paskan, kutbanka ba dimaika ba ayan ni paskan,

⁶ bara Baalat ra bara baku sin tawan nani bani ra Salaman plun auhbi bri kan ba, bara wagin nani swiaia pliska bri kan tawanka nani, baku sin aras âiulra nani watla bara dîa dîa sut Salaman Jerusalem paskaia lukan ba, Líbano ra, bara witin king aimaki tawanka nani sut ra sin,

⁷ bara upla nani sut naha tawanka ra kau takaskan nani ba, hitita nani, amorreo nani, heveo nani, ferezeo nani bara Jebús uplika nani ba, witin nani Israel luhpia nani apia kan ba,

⁸ sakuna baha tasbaya ra takaskan nani ba, ningkara witin nani ra Israel luhpia nani bui kumi sin sauhki tikras kan. Sakuna Salaman baha nani ra wark karna yan takan, naiwa yua ba kat.

⁹ Sakuna Israel luhpia nani ra lika yan diara karna nani daukras kan, baha nani ba aiklaklabra kan, wihta tara nani kan, kiaptin nani, war wihtka tara nani bara aiklabaia aras âiulra nani kata.

¹⁰ Bara Salaman 250 wihta tara nani tâura mangkan, baha Israel apia nani ba pura kaiki kabia dukiara.

¹¹ Bara Salaman king fero luhpia mairin ba lakan Debit Tawanka ba wina witin tawan raya mâkata ba ra, king luhpia mairin watla wisi witin win kan: “Yang mayi ba Debit Israel kingka ba watla ra iwi kabia apia, kan baha watla nani ra sika Dawan Gâd lâka auhbaia watla ba swiaia kan, bamna watla holikira kulkan sa.”

¹² Bara tempel dimaika ba kat Salaman bal, aiska angki sakripaiska nani ba angki Dawan ra yan.

¹³ Diara nani sut ai piua kat daukaia dukiara, Moses lâ mangki yan ba baku, ris yua nani ra, kati raya yua nani ra, yua tara mani bani aima yumhpa dauki kan ba, baha sika, brit îs âpu daukaia yua, Utla Papakni nani yua sin daukaia.

¹⁴ Prîs nani ai awarka daukan, ai warkka daukaia dîa ai aisika Debit daukata baku, bara Libait nani ai warkka kat Dawan ra mayuni kan, bara prîs nani ra tâ baiki kan, dîa dauki ba sut ai piua kat. Baku sin dur main kakaira nani dur bani ra ai adarka kat aihwaki kan, baku sika daukan Gâd waitnika ba.

¹⁵ Bara baku king lâka yan ba wina, kitwi takras kan; prîs nani, Libait nani bara lalah kukanka tempel bilara alki kan nani ba.

¹⁶ Kan Salaman wark nani sut daukaia kan ba, baha yua utla playka Dawan watla daukata ba wina, tnata alkan kat. Baku Dawan tempelka watla aiska paskan ba, pain pali paskan kata.

¹⁷ Bamna Salaman lika Esión-guéber bara Elat ra wan Edom kabu un tasbaya bâk.

¹⁸ Bara Hiram ai suldiarka wihtka nani bâk kabu dwarka tara nani bri kan ba blikan, kabu ra taukaia uplika nani ba bara Salaman suldiarka wihtka nani aikuki dwarka tara Ofir ra blikan wan, bara Ofir wina gul 16 ton prais brih balan.