2 Kronikas 6 - DAWAN BÎLA AISKA

Salaman tempel watla Dawan mihta ra mangkisa

¹ Bara Salaman aisin: “Man, Dawan, aisaram tihmia tilara iwisma.

² Sakuna yang tempel kumi paskri man bahara iwaia, man bahara ban kaia ra iwi kaia.”

³ Ningkara king ai mawan tawi, Israel luhpia nani sut ra yamni munan, bara Israel luhpia nani ba ai mina ra bûi banhwi kan,

⁴ bara win: “Dawan ba yamni pali kabia, witinka Israel Gâdka ba, papiki Debit ra aisin ba witin bui aiska sut daukan sa, naku win ba ra:

⁵ ‘Idsip wina upliki Israel luhpia nani sakri ba piua wina, tawan kumi sin bâk sakras kapri, Israel kiamka tila baha bui tempel kum bapka, yang nini ba bâra kabia dukiara. Upla sin wahbi sakras kapri, king luhpia kaia upliki Israel luhpia nani purara.

⁶ Sakuna Jerusalem ba bâk sakri, bahara yang nini ba bâra kaia, bara Debit ba bâk sakri Israel upliki nani ra tâ briaia.’

⁷ Bara yang papiki Debit ai kupia ra luki kan, Dawan Israel Gâdka nina ra tempel kumi paskaia.

⁸ Ban sakuna, Dawan bui aisiki Debit ra win: ‘Tempel kum yang nini ra mâkaia kupiam ra brisma ba, baha sât lukanka brisma ba lika yamni sa,

⁹ sakuna tempel ba lika man mâkma apia. Ban sakuna, man luhpa waitna kum sâkma ba, witin mita tempelki kum paskbia.’

¹⁰ “Bara Dawan witin dîa ai pramiska aisin ba daukan. Baku bamna, yang aisiki Debit watlika briri, bara Israel kingka iwaika sin briri, bara Dawan Israel Gâdka ba tempelka kum mâkri sa.

¹¹ Baha purkara Israel luhpia nani wal Dawan lâ daukan lâka auhbaia watla ba sin, yang bahara swiri.”

¹² Baha ningkara Salaman Dawan altarka mawan tani ra buan, Israel luhpia nani sut mawanra sin, bara ai mihta nani bukan.

¹³ Tempel bilara purara uli bûi aisaia pliska kum Salaman paskan bras ni, 8 pît skwir 5 pît purara, witin bahara uli Israel luhpia nani sut mawanra, ai mihta purara buki ai lula krikan,

¹⁴ bara makaban: “Dawan, Israel Gâdka, man baku Gâd wala âpu sa kasbrika purara, baku sin naha tasba mâyara sin apia, man alki brisma ba wal lâ daukan lâka bara kupia yamni lâka sut albikam nani ra, baha nani ai kupia aiska kira man dukiam dauki nani ra.

¹⁵ Papiki Debit ra dîa daukaia wiram ba kat pali daukram sa, man bîlam pali ni wiram bara mihtam pali ni dauki tnata alkram, naiwa yua diara taki na.

¹⁶ Baku ba mita, Dawan, Israel Gâdka, yang aisiki Debit man albikam ra dîa pramis munram ba dauks: ai kiamka wina kum man wiram ba baku, Israel kingka iwaika ra iwbia, ai luhpia nani ba ai tânka wapni bribia lâmka kat daukbia bara witin daukan ba baku.

¹⁷ Baku bamna, Dawan, Israel Gâdka, albikam Debit ra dîa man bîlam wiram ba kat daukma.

¹⁸ “Ban sakuna, ¿baha ba kasak sa ki, Gâd ba upla wal naha tasba purara iwi kaia? Bara kaiks kasbrika purara nani ba, bara yahpika ba sip alki briras ba apia. ¡Bara nahki sip kabia naha tempel, yang bui paski maikri na!

¹⁹ Baha sut purkara, man albikam pura sunra ba walma, ai makabanka ba sin, alai, Dawan, yang Gâdki, albikam ai pura suni na man walma.

²⁰ Man naha tempelka na kakna bara tihmia aihwaki kaiki kama, naha tempelka ra man wiram nâra kaia. Man wali kama, albikam naha tempelka ra bal ai pura suni piua ra.

²¹ Baku bamna, albikam pura sunra ba walma, bara uplikam Israel luhpia nani naha watla ra bal ai pura suni ba sin; man iwaikam kasbrika purara pali ba wina wali kama, pâtka ba sin ban swih tikma.

²² “Ban kra upla kum ai uplika mapara saura daukbia kaka, bara witin nani bal Dawan nina ra swer takbia kaka, man tempelkam ra bal naha altarkam lamamra bubia kaka,

²³ man kasbrika purara pali ba wina wali kama bara dîa ba daukma bara albikam nani lâka ba kasak lâka ra daukma, pâtkira ba pâtka yama, bara ai daukanka ba ai lal purara batakma, kasakkira ba kasak kulkma, ai kasakka lâka mana kat yama.

²⁴ “Israel uplikam nani ra waihla nani bui pura lubia kaka, man lamamra saura daukan ba mita, bara witin nani kli tawi man ninam ra ai saurka dahra sâkbia kaka, ai pura suni banhbia, bara man ra makabi aisabia naha tempelka ra;

²⁵ kasbrika pura ba wina wals, uplikam Israel saurka daukan ba ban swih tikma, bara yarka kli ai damika nani ra yaram tasbaya ra tawi balbia.

²⁶ “Witin nani mampara saura daukan ba tâka mita lî auhras kabia, bara witin nani naha watla ra bal man ninam ra makabi ai saurka sin dahra sâkbia ba ra, ai saurka wina kli tawbia, sari sin takbia kaka,

²⁷ kasbrika purara pali ba wina man wali kama, bara man albikam nani bara uplikam Israel luhpia nani saurka ba ban swih tikma, yabal yamni ba mariki kama bara witin nani bahak impaki tauki kabia, bara ai tasbaya purara lî yabrika auhbia, man bui witin nani ra yaram ba, ai almukka nani tasbaya ra.

²⁸ “Ban kra tasbaya na ra plun tiwbia, siknis nani balbia, plun nani ra sikniska alkbia, tuhtu nani, tristrisia nani, plun sauhkaia yula nani iwbia; witin nani iwi tasbaya ra waihla nani bui bal kutbi bribia kaka, ani ani pâtka, apia kra siknis nani balbia kaka,

²⁹ pura sunra nani, apia kaka makabanka nani kra ani uplika bal daukbia kaka, apia kaka man uplikam Israel luhpia nani sut bui ban kra ya ya ai kupia pâtka ba ai dahra walbia kaka, naha tempelka ra bal ai mihta buki ai pura sunbia kaka,

³⁰ kasbrika purara pali ba wina wali kama, baha man iwaikam ba wina, bara pâtka ba ban swih tikma. Bara man mahka dîa daukaia lukma ba daukma, kumi bani ra ai pâtka ba kat mana yama, man baha nani kupia ba kaikisma bamna. Man baman sika upla nani sut kupia tânka kaikisma ba.

³¹ Baku witin nani yamni mai kulki, bîlam wali dauki kabia, ai damika nani ra tasba yaram ba ra iwi ba yua nani ra.

³² “Bara sin upla nani Israel tasbaya wina, apia kra tasba laih wina balbia man ninam tara dukiara, bara ai mihta karnika, ai klahkla sakbi, witin naha watla ra ai pura sunbia kaka,

³³ man kasbrika purara ba wina walma, iwaikam ba wina tringsar nani mai wini aisi ba kat dauki yama. Baku ba ra tasba ra iwi uplika nani bui ninam ba kakaira takbia, bara sibrinkam sin bribia, uplikam Israel luhpia nani baku baha tânka bribia, man ninam ba mâkan sa naha watla ra, yang bui daukri na ra.

³⁴ “Uplikam nani ai waihla nani mapara aiklabaia taki wabia, man bui blîkma ani ani ra wabia bara witin nani man ra ai pura sunbia, man bui bâk sakram bara luki baku sin tempel yang mita paskri ba ra luki daukbia sa kaka,

³⁵ man bui witin ai pura sunra ba kasbrika purara pali ba wina walma, ai makabanka ba sin, bara baha pâtka man mita wapni dauki yama.

³⁶ “Ban kra mampara saurka daukbia kaka, upla kumi sin âpu sa saura daukras ba, bara witin nani ra lawma kaka, ai waihla nani mihta ra mangkma kaka, witin nani ba alki priski brih wabia waihla tasbaya ra laihura, apia lamara kra,

³⁷ bara witin nani priski brih wan tasbaya ba kat kli brih wabia kaka, ai kupia lakbia kaka, ai pura man ra sunbia priski brih wan ba tasbaya wina witin nani saura yaban ba, diara saura daukan ba, watawika lâka sin daukan ba witin nani,

³⁸ bara witin nani ai kupia aiska, ai sulka aiska lakbia kaka, ai waihla nani tasbaya ra priski brih wan ba wina, ai damika tasbaya nani yaram ba tani ra tawi, naha tawanka man mita bâk sakram na, bara naha watla man ninam ra paskri na tani ra tawi ai pura sunbia kaka,

³⁹ kasbrika purara pali ba wina man walma, man iwaikam watla pliska ba wina baha pura sunra bara makabi ba, hilp munma, saurka sin swih tikma, man uplikam mampara saura yan ba swakwanka nani.

⁴⁰ “Bamna nanara, man, yang Dawanki, mamkabisni pura sunra nani naha pliska wina aisabia ba walma.

⁴¹ “Bus, Dawan Gâd, lâmka auhbaia watla karnakira ba alki, bara anira man ris briaia pliska ba kaiks. Man, Dawan Gâd, man prîskam nani ba swaki sakan prâka dimi kabia, uplikam holikira nani ba lilia kabia kupiam yamnika ra.

⁴² Dawan bara Gâd, man bahki kulkpara king man bui bâk sakram ba. Luki bas kupiam latwanka ra nampakan albikam Debit ra daukram ba.”