2 Kronikas 5 - DAWAN BÎLA AISKA

¹ Salaman bui Dawan tempelka mâkaia win warkka ba witin nani sut daukan ba ra, witin ai aisa Debit Gâd dukia nani gul ni bara silbar ni diara watla nani paskan bri kata ba brih wan, bara baha sut Gâd tempelka ra dingki swin.

Lâ auhbaia watla ba tempel ra brih wan

² Bara Salaman Israel almuk nani asla daukan Jerusalem ra, kiamka bani lalka nani ba, bara Israel luhpia nani watla uplika tâ bri nani ba sin, baha lika Dawan lâka auhbaia watla ba Saion wina Debit Tawanka ra lakaia dukiara.

³ Bara king Salaman ba Israel waitnika nani sut aikuki asla takan kata, baha ba Etanim katka ra kati 7 manka kata.

⁴ Libait almukka nani sut aidrubi balan, baku sin prîs nani ba Gâd lâka auhbaia watla ba brin,

⁵ bara Dawan wal aisaia tintka watla ba sin brin, baku sin tempel ra diara nani holikira kulkan ba sin, baha dukia nani ba prîs nani bara Libait nani bui twilki wan kata.

⁶ King Salaman bara Israel luhpia nani sut witin wal asla takan kan ba, witin nani Gâd lâka auhbaia watla ba tâura banhwi kan, bara sîp nani bara bîp wainhka nani ailal pali iki sakripais daukan, upla ailal pali daukan sip kulki sakras.

⁷ Bara prîs nani Gâd lâka auhbaia watla ba, tempel bilara holikira pali pliska ba kat swin, bahara rayaka lilka nani tnawa mununhtara,

⁸ baha nani ba mita ai tnawa mununhtara bri kan Gâd lâka auhbaia watla ba bara dusa yari nani ba sin.

⁹ Bara dusa nani ba yari pali kan, ba mita holi pliska mawan ba wina kaiki kan, Holikira pali pliska ba wina sin, sakuna lata tani wina lika sip kaikras kan; bara baha ba baku takaskan naiwa yua ba kat.

¹⁰ Gâd lâka auhbaia watla ba bilara diara lika âpu kan, ban sakuna Horeb ilka ra Moses bui walpa tanhta ulban wâl mangkan ba baman kata, bahara Dawan bui Israel luhpia nani wal lâ daukan ba, Idsip tasbaya wina takan ba piua ra.

¹¹ Bara prîs nani ba, holikira Pliska ba wina takan ba ra, witin nani sut ba kau holikira takan kata bara kli ai piua kat aihwakras kan.

¹² Libait nani aiwawanra ba sut Asaf, Hemán bara Jedutún, ai luhpia nani aikuki bara ai taika wala nani kira, linin kwalka dimi bara singbaia nani brih aiwani bin dauki bara altar lalmika tani ra bûi kan. Witin nani wal kan 120 prîs nani, baha nani sut trumpit puhbi kan.

¹³ Witin nani sut asla taki trumpit nani ba sut kumi baku puhban, pan pruki, miusik pulaia dukia wala nani ba sin bin dauki mayuni Dawan ra tingki wih bara aiwani kan: “Man nani bui Dawan ra mayuns, kan witin yamni sa, kan ai latwanka lâka ban kaia ra sa.” Baha minitka kat, Dawan tempelka ba kasbrika ni banhwan,

¹⁴ bara prîs nani takaski ai pura sunaia sin sip apia kan kasbrika nani ba mita, kan pura sunaia watla ba Dawan prana ni banhwan pali kata.