2 Kronikas 4 - DAWAN BÎLA AISKA

Tempel bilara diara nani bâra kaia ba

¹ Baha purkara altar kum bras ni daukan, 30 pît bîla yahpika, 10 pît yarika, 15 pît pura tani.

² Baku sin lî alkaia watla krukma tara kum paskan, bras ni 7 pît pura bakriki, bîla yahpika 15 pît bara 45 pît raun tawan ba.

³ Baha lî watla tara bras ni paskan ba, tnaya bani ra bara mununhta tani ra sin bîp wainhka lilka ni prana daukan.

⁴ Bîp lilka 12 baha lamara swin kata, yumhpa ba ai mawan lalma ra kaiki kata, yumhpa wala nani ba yu dimuya tani ra mawan lakan kata, wala yumhpa ba waupasa tani ra, lâs yumhpa ba lika yahbra tani ra kata. Bara laya watla ba baha lilka nani ba purara swin kata, daiwra nani mina ba, bîla tani ra diman kata.

⁵ Lî alkaika watla utla tnaya ra bâra kata ba, twaknika lika 8 sintimita bri kata, naha tnaya ba wain diaika kapka lilka talika bri kata, apia kaka tangni kum talia nani; bahara 66,000 litro lî alkaia sip kata.

⁶ Lî alkaika sin matawalsip paskan bras ni, diara sikbaia dukiara bara sikbaika dukia nani matsip ba mihta aihkika tani ra mangkan, wala matsip nani ba smihka tani ra. Bahara ya ya sakripais daukan ba ai mihta sikbi kan, sakuna lî alkaika kau tara bara prîs nani baman ai mihta sikbaia dukiara mangkan kata.

⁷ Kiandil bapi angkaika matawalsip paskan walpa klauhira ni, baha ba tempel ra mangkan, mihta aihkika ba ra matsip bara smihka ra sin matsip swin.

⁸ Ba purkara tibil matawalsip daukan, bara baha ba tempel ra mangkan, matsip mihta aihkika ra bara matsip wala mihta smihka ra. Baku sin kâp tara 100 daukan.

⁹ Ba purkara prîs nani dimaika durka ba, dimaika tara bara durka nani ba sin bras ni lalauban.

¹⁰ Bara lî alkaia watla tara ba tempel tnaya waupasa tani ra paskan.

¹¹ Hiram dikwa tara nani sin daukan ayan sâtka ni, mihta alkaika nani bara kâp tara nani sin. Bara baku warkka nani ba paski tnata alkan Salaman dukiara, Gâd tempelka watla ra.

¹² Naha warkka ba playka tara nani wâl kata ba, utla ra dimaika krukma nani bâra kan ba, tempel watla pura tani ra,

¹³ 400 kiwa ni pitbanka painkira daukan, pitbanka bani painkira kan bara baha ni dimaika pura ba aiska biki bri kan, wibia kaka playka tara nani ba pura tani ra.

¹⁴ Bapanka matawalsip nani ba, lî alkaika matawalsip baha pura sunan kan ba,

¹⁵ lî alkaika dukia tara pali ba, bîp wainhka matawalsip lilka nani baha mununhtara bâra kata,

¹⁶ baha purkara dikwa, nani, subil nani bara park nani sin paskan ba purkara. Diara wala nani sin Hiram paskan ba king Salaman ra yan Dawan tempelka watla ba dukiara, dukia nani ba bras painkira ni paskan.

¹⁷ Jordan langnika ra, Sucot Saretán wal lilapas ra, braska nani ba slilki auhya ra salhki bahara laiki dukia nani ba paskan.

¹⁸ Diara watla nani ailal Salaman bras ni paskan, nahki wirha kabia ba dukiara lika lukras kan.

¹⁹ Salaman sin adar yan Gâd tempelka dukia wala nani sin paskaia: gul ni altar ba paskaia, Dawan ra yaia britka nani kahbi kaia tibilka nani ba sin,

²⁰ baku sin kiandil bapaia mina nani ba, lampka nani ba sin gul aihwa ni paskan, holikira pali pliska ba ra angki kaia, baha nahki daukaia win ba baku daukan.

²¹ Tangni baku paskan nani ba, lamp nani ba, wisbaika nani ba, baha nani sut ba gul ni paskan;

²² alahmi wisbaika nani ba, kâp tara nani ba, ispan tara nani ba bara masku auhbaika nani ba sut gul aihwa ni paskan. Tempel ra dimaia bilka ba, bilara dur nani dus wahia baku paskan ba, tempel bilara Holi Pali Pliska ra dimaika ba sut gul aihwa pali ni lalauban.